Ani Yehowa Odasefoi Ji Kuu Ko ni Miitao Amɛto Maŋkwramɔ kɛ Jamɔ Shishi Aha Yudafoi yɛ Palestina?

Dabi, jeee kuu nɛɛ mli bii ji amɛ. Yehowa Odasefoi lɛ, Kristofoi ji amɛ, ni amɛhemɔkɛyelii lɛ fɛɛ damɔ Ŋmalɛi lɛ anɔ. Eyɛ mli akɛ jamɔi komɛi tsɔɔ akɛ Yudafoi anaabuamɔ yɛ Palestina lɛ ji Ŋmalɛ naa gbalɛ moŋ, shi Yehowa Odasefoi ehiɛɛɛ nakai susumɔ. Amɛheee amɛyeee akɛ maŋkwramɔ saji nɛɛ ji gbalɛ ni agba tɛɛ yɛ Ŋmalɛi lɛ amli. Anɔkwa sane ji akɛ, Ŋmalɛi lɛ ebuuu adesai anɔyeli ko akɛ ekwɔ fe ekroko, ni nakai nɔŋŋ ebuuu maŋ ko nɔ bii akɛ amɛhe yɛ sɛɛnamɔ fe maŋ kroko nɔ bii. Buu-Mɔɔ lɛ, ni ji Yehowa Odasefoi awolo ni akɛle amɛ jogbaŋŋ lɛ egba mli kpoo akɛ: “Nɔ ko bɛ Ŋmalɛi lɛ amli ni tsɔɔ akɛ Ŋmalɛi lɛ fiɔ maŋkwramɔ saji ni kɔɔ Yudafoi anaabuamɔ yɛ Palestina ni atsɛɔ lɛ yɛ blɔfo mli akɛ Zionism lɛ sɛɛ.”

Wolo ko (The Encyclopædia Britannica) tsɔɔ Zionism shishi akɛ eji “Yudafoi amaŋkwramɔ kuu ko ni hiɛ oti akɛ amɛbaato Yudafoi anɔyeli shishi yɛ Palestina koni amɛfi nɔyeli nɛɛ sɛɛ.” Kuu nɛɛ shishifaa jɛ jamɔi kɛ maŋkwramɔi amli. Yehowa Odasefoi eshiɛɛɛ kuu nɛɛ tsɔɔmɔi lɛ eko akɛ Odasefoi ajamɔŋ tsɔɔmɔi, ni kɛ́ eba lɛ kuu nɛɛ nifeemɔi agbɛfaŋ hu lɛ, Yehowa Odasefoi fiii afã ko sɛɛ kɔkɔɔkɔ.

Yehowa Odasefoi asafo lɛ kɛ maŋkwramɔ nifeemɔi futuuu ejamɔ lɛ, ni efiii maŋkwramɔ gbɛjianɔtoo ko kwraa, ni Zionism, ni ji kuu ni wɔwie he nɛɛ nifeemɔi lɛ fata he lɛ asɛɛ kɔkɔɔkɔ. Afã ko sɛɛ ni Yehowa Odasefoi fiii yɛ maŋkwramɔ saji amli lɛ ji sane ni ale jogbaŋŋ yɛ je lɛŋ he fɛɛ he, ni yɛ shikpɔji komɛi anɔ po lɛ, awaa Yehowa Odasefoi ayi akɛni amɛkɛ amɛhe wooo maŋkwramɔ saji amli lɛ hewɔ. Wɔle jogbaŋŋ akɛ Nyɔŋmɔ Maŋtsɛyeli lɛ pɛ ji nɔyeli ni baanyɛ ekɛ toiŋjɔlɛ ni hiɔ shi daa aba shikpɔŋ nɛɛ nɔ; adesa nɔyeli ko kwraa bɛ ni baanyɛ atsu enɛ.

Yehowa Odasefoi lɛ ajamɔŋ hemɔkɛyeli akulashiŋ ni amɛhiɔ shi yɛ naa lɛ ateŋ ekome ji toiboo ni amɛfeɔ amɛhaa amraloi loo nɔyelii amlai, ekɔɔɔ he eko he ni amɛyɔɔ. Amɛteee shi amɛwooo maŋkwralɔi loo nɔyelɔi, ni amɛkɛ amɛhe wooo tai amli yɛ gbɛ ko kwraa nɔ.