Wɔkpɛ Mli Akɛ Wɔbaahã Wɔshihilɛ Afee Mlɛo

Madián kɛ Marcela hi ogbɔjɔ shihilɛ mli yɛ Medellín, yɛ Colombia. Akɛni awoɔ Madián nyɔmɔ babaoo yɛ enitsumɔ lɛ mli hewɔ lɛ, amɛhi shĩa fɛfɛo ko mli. Shi nɔ ko ba ni no hã amɛsusu nɔ ni amɛkɛyeɔ klɛŋklɛŋ gbɛhe yɛ amɛshihilɛ mli akɛ Yehowa Nyɔŋmɔ tsuji lɛ he ekoŋŋ. Amɛwie akɛ, “Yɛ 2006 lɛ wɔtee ‘Hã Ohiŋmɛi Nɔ Atse’ gbi kome kpee krɛdɛɛ lɛ. Wiemɔi ni ahã lɛ babaoo wo wɔ hewalɛ ni wɔhã wɔshihlɛ afee mlɛo bɔ ni afee ni wɔnyɛ wɔsɔmɔ Nyɔŋmɔ jogbaŋŋ kɛmɔ shi. Be ni wɔshi kpee lɛ shishi lɛ, wɔyɔse akɛ nibii ni awie lɛ jeee no kwraa wɔfeɔ lɛ. Nɔ fɛɛ nɔ ni wɔbaana lɛ wɔbaahe, kɛ́ wɔhiɛɛɛ shika po, ni no hã wɔmɔ nyɔmɔ babaoo.”

Kpee nɛɛ ni Madián kɛ Marcela tee lɛ ye ebua amɛ ni amɛbɔi amɛshihilɛ mlɛo feemɔ. Amɛwie akɛ: “Wɔbɔi nibii ni wɔheɔ lɛ anɔ gbɔmɔ. Wɔfã kɛtee shĩa bibioo ko mli, wɔhɔ̃ɔ wɔkar lɛ, ni wɔyahe moto.” Agbɛnɛ hu, amɛkpa shopping malls yaa koni ekaba lɛ akɛ amɛbaayahe nɔ ko ni he ehiaaa amɛ. Enɛ hã amɛná be babaoo kɛshiɛ Biblia mli sane lɛ amɛhã amɛkutsoŋbii lɛ. Ni amɛkɛ amɛnanemɛi ni kɛ ekãa miisɔmɔ Yehowa Nyɔŋmɔ akɛ gbɛgbalɔi krɛdɛi lɛ bɔi bɔɔ.a

No sɛɛ etsɛɛɛ lɛ, Madián kɛ Marcela kpɛ amɛyiŋ akɛ amɛbaafã kɛya akrowa ko, ni amɛyaye amɛbua asafo bibioo ko ni yelikɛbuamɔ he miihia amɛ lɛ kɛlɛɛ amɛsɔɔmɔ lɛ mli. Bɔ ni afee ni amɛnyɛ amɛya lɛ, Madián kpa enitsumɔ lɛ. Mɔ ni kwɛɔ enɔ yɛ nitsumɔ lɛ mli lɛ nuuu lɛ shishi akɛ eekpa nitsumɔ tamɔ nɛkɛ. No hewɔ lɛ, Madián kɛ lɛ susu nii ahe, ebi lɛ akɛ: “Awoɔ bo nyɔmɔ babaoo, shi ani oyɛ miishɛɛ?” Ekɛɛ Madián akɛ ebɛ miishɛɛ, ejaakɛ eyɛ naagbai babaoo ni enyɛɛɛ etsu amɛhe nii. Kɛkɛ ni Madián kɛɛ lɛ akɛ: “No hewɔ lɛ jeee shika falɛ ni mɔ ko naa lɛ ji nɔ ni he hiaa. Nɔ ni he hiaa diɛŋtsɛ ji, nɔ ni baahã mɔ aná miishɛɛ. Nyɔŋmɔ he nii ni mi kɛ miŋa tsɔɔ mɛi lɛ hãa wɔnáa miishɛɛ, ni wɔmiitao wɔná be babaoo kɛhã nitsumɔ nɛɛ koni wɔná miishɛɛ pii.”

Madián kɛ Marcela ená miishɛɛ, ni amɛtsui hu enyɔ amɛ mli, ejaakɛ amɛkɛ Nyɔŋmɔ sɔɔmɔ efee nɔ ni he hiaa fe fɛɛ yɛ amɛshihilɛ mli. Yɛ afii 13 ni eho lɛ amli lɛ, amɛsɔmɔ yɛ asafoi ni yɔɔ hei ni shiɛlɔi babaoo ahe miihia yɛ, yɛ Colombia kooyi-bokagbɛ. Amrɔ nɛɛ amɛmiisɔmɔ akɛ gbɛgbalɔi krɛdɛi, ni enɛ ji hegbɛ wulu kɛhã amɛ.