Ani Ole?

Kɛ́ osɔfoi ni sɔmɔɔ yɛ sɔlemɔ shĩa lɛ yɛ Yerusalem lɛ gbe kooloi ni akɛbaashã afɔle lɛ, nɛgbɛ amɛtsiɔ lá lɛ amɛshwieɔ?

DAA afi lɛ, osɔfoi ni sɔmɔɔ yɛ sɔlemɔ shĩa lɛ yɛ Yerusalem lɛ kɛ kooloi babaoo shãa afɔle yɛ afɔleshaa latɛ lɛ nɔ. Yudafonyo yinɔsaneŋmalɔ Josephus wie akɛ, yɛ Hehoo gbi lɛ nɔ lɛ, agbeɔ gwantɛŋbii ni fa fe 250,000, ni lá ni atsiɔ ashwieɔ lɛ jeee sane bibioo. (3 Mo. 1:​10, 11; 4 Mo. 28:​16, 19) Nɛgbɛ lá pii nɛɛ ni atsiɔ ashwieɔ lɛ yaa?

Blema nibii ahe nilelɔi eyana gɔɔta ko yɛ he ni tsutsu ko lɛ Herode sɔlemɔ shĩa lɛ yɔɔ lɛ. Akpãtã sɔlemɔ shĩa nɛɛ hiɛ yɛ afi 70 Ŋ.B. Etamɔ nɔ ni gɔɔta nɛɛ mli kooloi ni akɛshãa afɔle yɛ sɔlemɔ shĩa lɛ mli lɛ alá lɛ tsɔɔ kɛjeɔ kpo.

Naa nibii enyɔ ni hã gbɛjianɔtoo nɛɛ ye omanye:

• Agbulɔ fɔji yɛ shikpɔŋ yɛ afɔleshaa latɛ lɛ masɛi: Blema wolo ko ni wieɔ Yudafoi amlai kɛ amɛkusumii ahe ni aŋma dani afi 300 Ŋ.B. lɛ wieɔ akɛ no mli lɛ, agbulɔ fɔji enyɔ yɛ shikpɔŋ yɛ afɔleshaa latɛ lɛ masɛi. Wolo lɛ tsɔɔ mli akɛ: “Kooloi ni akɛshãa afɔle lɛ alá kɛ nu ni akɛfɔɔ afɔleshaa latɛ lɛ nɔ lɛ fɛɛ tsɔɔ fɔji nɛɛ amli kɛboteɔ gɔɔta lɛ mli kɛyajeɔ kpo yɛ Kidron Jɔɔ lɛ mli.”

  Nɔ ni blema wolo nɛɛ wie lɛ kɛ nɔ ni blema nibii ahe nilelɔi eyana lɛ kpãa gbee. Wolo ko ni aŋma nyɛsɛɛ nɛɛ ni kɔɔ blema Yudafoi lɛ ahe lɛ kɛɔ akɛ, blema nibii ahe nilelɔi eyana gɔɔtai komɛi yɛ he ko ni bɛŋkɛ he ni kulɛ sɔlemɔ shĩa lɛ yɔɔ lɛ. Gɔɔtai nɛɛ ni amɛyana lɛ ahewɔ lɛ, blema nibii ahe nilelɔi pii heɔ amɛyeɔ akɛ, kooloi ni akɛshãa afɔle lɛ alá kɛ nu tsɔɔ fɔji amli kɛboteɔ gɔɔtai nɛɛ amli ni ejeɔ kpo kɛjeɔ sɔlemɔ shĩa lɛ mli.

• Anáa nu bɔ ni sa yɛ sɔlemɔ shĩa lɛ mli: Osɔfoi lɛ náa nu bɔ ni sa ni amɛkɛfɔɔ fɔji ni lá lɛ tsɔɔ mli lɛ kɛ gɔɔta ni ehoɔ kɛyaboteɔ mli lɛ mli keŋkeŋ daa gbi. Nɛgbɛ amɛnáa nu lɛ kɛjɛɔ? Amɛnáa kɛjɛɔ maŋ lɛ mli. No mli lɛ, agbála gɔɔtai wujiwuji, ni afee nibii krokomɛi ni nu kpakpa tsɔɔ mli kɛbaa sɔlemɔ shĩa lɛ mli. Agbɛnɛ hu, afee kpaakpoi kɛ bui ni akɛtoɔ nu yɛ sɔlemɔ shĩa lɛ mli. Blema nibii ahe nilelɔ Joseph Patrich wie akɛ: “Yɛ sɔlemɔ shĩai fɛɛ ni yɔɔ yɛ nakai beiaŋ lɛ ateŋ lɛ, etamɔ nɔ ni Yerusalem sɔlemɔ shĩa lɛ pɛ yɔɔ gbɛjianɔtoo kpakpa ni tamɔ nɛkɛ ni hãa anáa nu ni mli tse, ni nu ni mli ewo muji hu náa he ko etsɔɔ kɛyaa.”