Nibii Ni Yehowa Ebɔ Lɛ Hãa Wɔheɔ Wɔyeɔ Waa Akɛ Ehiɛ Kã Shi Waa

Ani Yehowa le nɔ ni hi jogbaŋŋ kɛhã wɔ be fɛɛ be? Hɛɛ! Kɛ́ wɔheɔ enɛ wɔyeɔ ni wɔkɛ egbɛtsɔɔmɔ tsuɔ nii lɛ, no tsɔɔ akɛ, wɔhiɛ kã shi. (Abɛ 16:3, 9) Shi kɛ́ esoro susumɔ ni wɔhiɛ yɛ sane ko he yɛ enɔ lɛ he lɛ, bɔ ni wɔbaafee wɔnii wɔhã lɛ ni baatsɔɔ kɛji wɔheɔ wɔyeɔ lɛɛlɛŋ akɛ egbɛtsɔɔmɔ ja. Kɛ́ wɔjwɛŋ nibii ni Yehowa ebɔ lɛ anɔ lɛ, no baahã hemɔkɛyeli ni wɔyɔɔ akɛ ehiɛ kã shi waa lɛ mli awa.​—Abɛ 30:24, 25; Ro 1:20.

KWƐMƆ VIDIO NI JI, ANI MƆ KO NI FEE? MƐNI HÃA TSATSUBII NYIƐƆ NI AMƐTEŊ MƆ KO ETSĨII ENYƐMI NAA? LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ HETOO:

• Mɛni tsatsubii ateŋ babaoo fɔɔ feemɔ daa gbi?

• Mɛni tsatsubii feɔ koni trafiki akamɔ amɛ yɛ amɛgbɛ nɔ?

• Mɛni adesai baanyɛ akase yɛ tsatsubii aŋɔɔ, koni trafiki akamɔ amɛ?

KWƐMƆ VIDIO NI JI, ANI MƆ KO NI FEE? NƆ NI HÃA WOBII FILIKIƆ JOGBAŊŊ LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ HETOO:

• Mɛɛ naagbai adesai kɛkpeɔ kɛ amɛmiikudɔ plen bibii?

• Mɛɛ gbɛ nɔ wobii nyɛɔ amɛfilikiɔ jogbaŋŋ kɛ́ kɔɔyɔɔ lɛ naa wa po?

• Kɛ́ adesai nu bɔ ni feɔ ni wobii filikiɔ jogbaŋŋ lɛ shishi lɛ, mɛɛ gbɛ nɔ ebaawa amɛ?

Mɛni ona yɛ adebɔɔ nibii ni yɔɔ he ni oyɔɔ lɛ ahe ni hãa onaa akɛ, Yehowa hiɛ kã shi waa?