HII SHI AKƐ KRISTOFONYO
Shiɛmɔ Kɛ Nitsɔɔmɔ—Gbɛi Ni He Hiaa Waa Ni Atsɔɔ Nɔ Afeɔ Kaselɔi
Yesu fã esɛɛnyiɛlɔi lɛ akɛ, amɛya ni amɛyafee mɛi kaselɔi. (Mat 28:19) Enɛ biɔ ni amɛshiɛ, ni agbɛnɛ hu, amɛtsɔɔ nii. Esa akɛ wɔteŋ mɔ fɛɛ mɔ abi ehe yɛ be kɛ beiaŋ akɛ, ‘Te mafee tɛŋŋ maya mihiɛ yɛ kaselɔfeemɔ nitsumɔ lɛ fãi enyɔ ni he hiaa waa nɛɛ amli lɛ?’
SHIƐMƆ
Nɔ najiaŋ ni wɔbaamɛ koni mɛi aba wɔŋɔɔ lɛ, esa akɛ wɔya ni wɔkɛ hiɛdɔɔ ayatao ‘mɛi ni sa’ lɛ. (Mat 10:11) Kɛ́ wɔnyiɛ shiɛmɔ nɔ lɛ, ani wɔŋɔɔ hegbɛ fɛɛ hegbɛ ni wɔbaaná lɛ koni wɔkɛ ‘mɛi ni wɔnaa’ lɛ agba sane? (Bɔf 17:17) Bɔfo Paulo shiɛ kɛ ekãa, ni no hã Lidia batsɔ kaselɔ.—Bɔf 16:13-15.
“Leebi lɛ, du odumɔwui lɛ, ni kaajie onine yɛ he kɛyashi gbɛkɛ” (Jaj 11:6)
KWƐMƆ VIDIO NI JI, YAA NƆ OSHIƐ ‘NI OKAFƆ̃Ɔ’—BE NI ONYIƐƐƐ SHIƐMƆ NƆ KƐ YƐ SHĨA FƐƐ SHĨA LƐ, KONI NO SƐƐ LƐ OHÃ SANEBIMƆI NI NYIƐ SƐƐ LƐ AHETOO:
Mɛni Samuel fee yɛ edaa gbi shihilɛ mli kɛtsɔɔ akɛ ekɛ hiɛdɔɔ miidu anɔkwale lɛ wui lɛ?
Mɛni hewɔ esa akɛ wɔbɔ mɔdɛŋ wɔtsɔ gbɛi srɔtoi fɛɛ anɔ wɔshiɛ lɛ?
Namɛi nɛkɛ obaanyɛ okɛgba Maŋtsɛyeli lɛ he sane lɛ yɛ odaa gbi shihilɛ mli?
NITSƆƆMƆ
Kɛ́ wɔmiitao wɔfee kaselɔi lɛ, jeee woji pɛ esa akɛ wɔshi wɔhã mɛi. Esa akɛ wɔfee sɛɛkuukɛsaramɔi kɛ Biblia mli nikasemɔi hu, koni amɛya amɛhiɛ yɛ mumɔŋ. (1Ko 3:6-9) Shi kɛ́ wɔbɔ mɔdɛŋ wɔtsɔɔ mɔ ko Maŋtsɛyeli lɛ he anɔkwalei lɛ, shi eyaaa ehiɛ hu? (Mat 13:19-22) Esa akɛ wɔya nɔ wɔtao mɛi ni tsui tamɔ “sũ kpakpa lɛ.”—Mat 13:23; Bɔf 13:48.
“Mi lɛ, midu, Apolo shwie nɔ nu, shi Nyɔŋmɔ ji mɔ ni hãa eyaa nɔ edaa” (1Ko 3:6)
KWƐMƆ VIDIO NI JI, YAA NƆ OSHIƐ ‘NI OKAFƆ̃Ɔ’—MAŊ ODASEYELI KƐ KASELƆI AFEEMƆ LƐ, KONI NO SƐƐ LƐ OHÃ SANEBIMƆI NI NYIƐ SƐƐ LƐ AHETOO:
Mɛɛ gbɛ nɔ Solomon kɛ Mary shwie anɔkwale wui lɛ ni adu yɛ Ezekiel kɛ Abigail tsuii amli lɛ nɔ nu?
Kɛ́ wɔmiitsu sɔɔmɔ nitsumɔ lɛ fãi srɔtoi lɛ ateŋ eko fɛɛ eko, maŋ odaseyeli jio, ekroko jio lɛ, mɛɛ oti esa akɛ wɔkɛma wɔhiɛ?
Mɛni wɔbaanyɛ wɔfee kɛtsɔɔ akɛ, tsɔɔmɔ ni wɔbaatsɔɔ mɛi anɔkwale lɛ he miihia wɔ waa?