**Ná Hesai Pii yɛ Shiɛmɔ Nitsumɔ lɛ Mli—Bɔ ni Ooofee Okɛ Biblia lɛ Tsɔɔ Wolo lɛ Ahã**

Nɔ Hewɔ ni Ehe Hiaa: Biblia lɛ Tsɔɔ wolo lɛ ji wolo titri ni wɔkɛtsɔɔ mɛi anii. Shi dani wɔbaanyɛ wɔkɛ mɔ ko akase lɛ, esa akɛ wɔhã lɛ eko. No hewɔ lɛ, esa akɛ wɔ fɛɛ wɔbɔ mɔdɛŋ wɔle gbɛ nɔ ni wɔɔtsɔ wɔkɛ Biblia lɛ Tsɔɔ wolo lɛ ahã yɛ shiɛmɔ nitsumɔ lɛ mli. (Abɛi 22:29) Abaanyɛ atsɔ gbɛi srɔtoi anɔ akɛhã, ni esa akɛ shiɛlɔi akwɛ gbɛ ni kɛ́ amɛkɛtsu nii lɛ ebaamɔ shi.

Bɔ ni Obaafee lɛ Ohã:

Bi sane ko ni baanyɛ atee shiatsɛ lɛ miishɛɛ shi ní obaanyɛ okɛgbala ejwɛŋmɔ kɛya yitso pɔtɛɛ ko nɔ yɛ wolo lɛ mli. Obaanyɛ okɛ sanebimɔi ni yɔɔ saneyitsei lɛ eko fɛɛ eko shishijee lɛ atsu nii. Be ni obo nɔ ni shiatsɛ lɛ yɔɔ kɛɛmɔ lɛ toi sɛɛ lɛ, kanemɔ ŋmalɛ ko ni kɔɔ sane lɛ he, ni okɛ kuku ni wieɔ nakai sane lɛ he lɛ atsɔɔ lɛ, ni nyɛsusu he kɛ́ ebaahi.
Gbɛ kroko hu ji, ni okɛ saji ni yɔɔ shishijee baafai lɛ baatsu nii kɛtee shiatsɛ lɛ miishɛɛ shi, koni no sɛɛ lɛ otsɔɔ lɛ hetoo ni Biblia lɛ kɛhãa yɛ wolo lɛ mli. Akɛ nɔkwɛmɔnɔ lɛ, obaanyɛ owie oshara ko ni atswa he adafi nyɛsɛɛ nɛɛ he, ni okɛɛ lɛ akɛ mɛi babaoo biɔ saji ni yɔɔ baafa 3 lɛ. Aloo obaanyɛ okɛɛ akɛ, oosara mɛi ni yɔɔ akutso lɛ mli lɛ ni okɛ amɛ asusu wɔsɛɛ shihilɛ ko ni yɔɔ miishɛɛ lɛ he sane. No sɛɛ lɛ, okɛ mfonirii ni yɔɔ baafa 4 kɛ 5 lɛ atsɔɔ shiatsɛ lɛ, ni obi lɛ akɛ, “Te shiwoi ni yɔɔ biɛ lɛ ateŋ nɔ ni obaasumɔ ni eba mli lɛ?” Gbɛ kroko hu ji, ni okɛɛ shiatsɛ lɛ akɛ okɛ be fioo miisara mɛi koni oye obua amɛ kɛná shihilɛ mli sanebimɔi ni he hiaa waa lɛ ahetoi. Koni okɛ sanebimɔi ni yɔɔ baafa 6 lɛ atsɔɔ lɛ, ni obi lɛ amɛteŋ nɔ ni enyaa he waa.
Okɛ gbɛ ni yɔɔ tɛ̃ɛ ni atsɔɔ nɔ ajeɔ Biblia mli nikasemɔ shishi lɛ atsu nii. Obaanyɛ okɛɛ akɛ: “Wɔkɛ Biblia kasemɔ wolo nɛɛ miitsɔɔ wɔkutsoŋbii lɛ. Ani ona eko dã? [Ŋmɛɛ gbɛ ni ehã hetoo.] Kɛ́ oyɛ be fioo lɛ, masumɔ ni matsɔɔ bo bɔ ni wɔbaanyɛ wɔkɛ wolo nɛɛ atsu nii kɛkase nii kɛjɛ bo diɛŋtsɛ o-Biblia lɛ mli.”

Kaa Enɛ Okwɛ yɛ Nyɔɔŋ nɛɛ Mli:

Nyɛfea he nɔkwɛmɔnɔ yɛ nyɛweku jamɔ mli.
Kɛ́ okɛ mɔ ko nyiɛ shiɛmɔ nɔ lɛ, obaanyɛ okɛ lɛ agba shiɛmɔ wiemɔ ni oto ni okɛbaatsu nii lɛ he sane. (Abɛi 27:17) Tsakemɔ oshiɛmɔ wiemɔ lɛ mli kɛ́ ona akɛ emɔɔɔ shi.