Feemɔ Biblia mli Nikasemɔi ni Mɔ̃ɔ Shi
1. Mɛɛ sɔ̃ kã shiɛlɔi anɔ?
1 Mɔ ko nyɛŋ Nyɔŋmɔ asɔmɔ akɛ ja Yehowa ‘egbala lɛ dã.’ (Yoh. 6:44) Fɛɛ sɛɛ lɛ, esa akɛ shiɛlɔi lɛ atsu amɛgbɛfaŋ nɔ kɛtsɔ mɛi ni amɛkɛkaseɔ Biblia lɛ ni amɛbaaye amɛbua amɛ ni amɛtsi amɛbɛŋkɛ amɛŋwɛi Tsɛ lɛ nɔ. (Yak. 4:8) Enɛ biɔ hesaamɔ. Kukuji lɛ amli ni aaakane kɛ sanebimɔi ni akala lɛ ni wɔɔbi mɛi ni wɔkɛkaseɔ nii lɛ kɛkɛ lɛ nyɛŋ aye abua amɛ ni amɛnu anɔkwale lɛ shishi jogbaŋŋ ni amɛya amɛhiɛ.
2. Kɛ́ wɔfee Biblia mli nikasemɔ ni mɔ̃ɔ shi lɛ, mɛni jɛɔ mli kɛbaa?
2 Kɛ́ shiɛlɔi baanyɛ afee nikasemɔi ni mɔ̃ɔ shi lɛ, esa akɛ amɛye amɛbua mɛi ni amɛkɛkaseɔ nii lɛ ni (1) amɛnu nɔ ni Biblia lɛ tsɔɔ shishi, (2) amɛkpɛlɛ nɔ ni Biblia lɛ tsɔɔ lɛ nɔ, (3) amɛkɛ nɔ ni Biblia lɛ tsɔɔ lɛ atsu nii. (Yoh. 3:16; 17:3; Yak. 2:26) Ebaanyɛ ehe nyɔji abɔ dani abaanyɛ aye abua mɔ ko ni etsu enɛɛmɛi fɛɛ he nii. Kɛ̃lɛ, eko fɛɛ eko ni ebaatsu he nii lɛ tsɔɔ akɛ eeya ehiɛ yɛ wekukpaa ni kã ekɛ Yehowa teŋ lɛ mli, ni eefee nibii ni baahã ejɔɔ ehe nɔ ehã lɛ.
3. Mɛni hewɔ tsɔɔlɔi ni he esa lɛ biɔ saji ni baahã mɛi atsɔɔ amɛjwɛŋmɔ lɛ?
3 Mɛni Yɔɔ Biblia mli Nikaselɔ lɛ Jwɛŋmɔ Mli?: Kɛ́ ootao ona akɛ o-Biblia mli nikaselɔ lɛ miinu nɔ ni okɛ lɛ kaseɔ lɛ shishi ni ekpɛlɛɔ nɔ hu lɛ, no lɛ esaaa akɛ bo pɛ owieɔ, shi moŋ lɛ esa akɛ owo lɛ hewalɛ ni etsɔɔ esusumɔ. (Yak. 1:19) Ani enuɔ nɔ ni Biblia kɛɔ yɛ sane ni nyɛsusuɔ he lɛ shishi? Ani ebaanyɛ egbala sane lɛ mli yɛ lɛ diɛŋtsɛ ewiemɔ mli? Te enaa nɔ ni ekase lɛ ehãa lɛ tɛŋŋ? Ani eheɔ eyeɔ akɛ nilee yɛ nɔ ni Biblia lɛ tsɔɔ lɛ mli? (1 Tes. 2:13) Ani ekpɛlɛɔ nɔ akɛ esa akɛ ehi shi yɛ nɔ ni ekaseɔ lɛ naa? (Kol. 3:10) Bɔ ni afee ni wɔná sanebimɔi nɛɛ ahetoo lɛ, esa akɛ wɔkɛ hiɛshikamɔ abi lɛ saji ni baahã etsɔɔ ejwɛŋmɔ, ni wɔbo lɛ toi be ni ewieɔ lɛ.—Mat. 16:13-16.
4. Kɛ́ ewa kɛhã nikaselɔ ko akɛ ebaanu nɔ ni atsɔɔ lɛ kɛjɛɔ Biblia lɛ mli lɛ shishi loo ekɛbaatsu nii lɛ, mɛni esa akɛ wɔfee?
4 Bei pii lɛ, sui ni mɛi yɔɔ loo bɔ ni amɛsusuɔ nii ahe amɛhãa lɛ kaa amɛhe, ni eheɔ be dani amɛnyɛɔ amɛtsakeɔ. (2 Kor. 10:5) Ni kɛ́ nikaselɔ lɛ ekpɛlɛɛɛ nɔ ni ekaseɔ lɛ nɔ loo ekɛtsuuu nii hu? Esa akɛ oto otsui shi koni ohã lɛ be ni sa, koni Nyɔŋmɔ Wiemɔ lɛ kɛ mumɔ krɔŋkrɔŋ lɛ aná etsui nɔ hewalɛ. (1 Kor. 3:6, 7; Heb. 4:12) Kɛ́ ewa kɛhã nikaselɔ lɛ akɛ ebaanu Biblia tsɔɔmɔ ko shishi loo ekɛbaatsu nii lɛ, bei pii lɛ ehi akɛ nyɛbaasusu sane kroko he moŋ fe ni obaanyɛ enɔ doo akɛ ekpɛlɛ nɔ. Be ni wɔyaa nɔ wɔkɛ tsuishitoo kɛ suɔmɔ tsɔɔ lɛ nii kɛjɛɔ Biblia lɛ mli lɛ, yɛ be ni sa mli lɛ, nɔ ni ekase lɛ baatsirɛ lɛ ni efee tsakemɔi ni he hiaa lɛ.