Okɛ Hegbɛi ni Onáa lɛ Atsu Nii Kɛgbɛ Maŋtsɛyeli lɛ He Sane lɛ Oshwã!
1. Mɛni wɔbaanyɛ wɔkase kɛjɛ David nɔkwɛmɔnɔ lɛ mli?
1 Maŋtsɛ David ji mɔ ko ni eŋmɛɛɛ gbɛ ni shihilɛi ni eyajeɔ mli lɛ ahã enijiaŋ aje wui. Akɛ nɔkwɛmɔnɔ lɛ, David miitao ni ema shĩa ehã Yehowa. Be ni Yehowa eŋmɛɛɛ David gbɛ lɛ, David tsake otii ni ekɛmamɔ ehiɛ lɛ, ni eye ebua kɛto nibii ahe gbɛjianɔ ehã Salomo koni lɛ ema sɔlemɔwe lɛ. (1 Maŋ. 8:17-19; 1 Kron. 29:3-9) Yɛ nɔ najiaŋ ni David baahã ejwɛŋmɔ ahi nɔ ni enyɛŋ efee lɛ nɔ lɛ, ehã ejwɛŋmɔ hi nɔ ni ebaanyɛ efee lɛ moŋ nɔ. Mɛɛ gbɛ nɔ wɔɔtsɔ wɔkase David nɔkwɛmɔnɔ lɛ be ni wɔtaoɔ gbɛi ni wɔɔtsɔ nɔ wɔgbɛ Maŋtsɛyeli lɛ he sane lɛ wɔshwã lɛ?
2. Mɛni wɔbaanyɛ wɔfee kɛpɛi wɔmli?
2 Feemɔ Nɔ ni Obaanyɛ: Mɛi babaoo ehã amɛshihilɛ efee mlɛo bɔ ni afee ni amɛnyɛ amɛsɔmɔ akɛ gbɛgbalɔi awalɔi loo daa gbɛgbalɔi. (Mat. 6:22) Ani obaanyɛ ofata amɛhe? Be ni okɛ sɔlemɔ susuɔ oshihilɛ he lɛ, ekolɛ obaana akɛ “agbele shinaa kpeteŋkpele naa” ahã bo, “ni nitsumɔ pii yɛ.” Kɛ́ nakai ni lɛ, ŋɔɔ nakai hegbɛ lɛ!—1 Kor. 16:8, 9.
3. Mɛɛ hegbɛi wɔbaanyɛ wɔŋɔ kɛye odase kɛ́ wɔshihilɛ eŋmɛɛɛ wɔ gbɛ po ni wɔtsu gbɛgbamɔ nitsumɔ lɛ?
3 Ni kɛ́ oshihilɛ eŋmɛɛɛ bo gbɛ ni okɛ ohe awo gbɛgbamɔ nitsumɔ lɛ mli hu? Kaaku ohiɛ oshwie hegbɛi krokomɛi ni oyɔɔ lɛ anɔ. Akɛ nɔkwɛmɔnɔ lɛ, kɛ́ nitsumɔ ni otsuɔ lɛ hãa okɛ mɛi ni heee yeee shãraa lɛ, mɛni hewɔ oŋɔɔɔ hegbɛ lɛ ni okɛye amɛ odase yɛ be ni sa mli? Aloo kɛji obɛ hewalɛ lɛ, ani obaanyɛ oŋɔ hegbɛ lɛ kɛye datrɛfoi, nɛɛsifoi, loo mɛi krokomɛi ni kwɛɔ bo lɛ odase? Kaimɔ akɛ ato gbɛjianɔ koni mɛi ni egbɔlɔ loo amɛbɛ hewalɛ kwraa, ni no hewɔ lɛ amɛnyɛɛɛ amɛtsu babaoo lɛ ahã minitii 15, 30, kɛ 45 kɛyaa. Kɛ́ ooŋmala oshiɛmɔyaa he akɔntaa kɛhã nyɔɔŋ lɛ, kaimɔ ni okɛ be ni okɛye odase be ni onyiɛɛɛ shiɛmɔ nɔ, woji ni ohã, dɛhiɛmɔ woji kɛ Kaimɔ lɛ loo kpee he ninefɔ̃ɔ woji ni okɛhã lɛ afata he. Kɛ́ obua bei ni onáa kɛyeɔ odase yɛ hegbɛi bibii nɛɛ amli lɛ naa lɛ, kɛ́ nyɔɔŋ lɛ gbo lɛ, onaa baakpɛ ohe yɛ nɔ ni obaaná lɛ he!
4. Mɛni otswa ofai shi akɛ obaafee?
4 Bɔ fɛɛ bɔ ni wɔshihilɛ ji lɛ, nyɛhãa wɔŋɔa hegbɛ fɛɛ hegbɛ ni wɔkɛgbɛ sane kpakpa lɛ wɔshwã. Enɛ baahã wɔtsui anyɔ wɔmli, ejaakɛ wɔyɔseɔ akɛ wɔmiifee nɔ fɛɛ nɔ ni wɔbaanyɛ yɛ Maŋtsɛyeli lɛ hewɔ.—Mar. 14:8; Luka 21:2-4.