Asafoŋ Kpeei ní Wɔbaaya yɛ He ni Wɔyɔɔ Lɛ
1 Ehe miihia ni afee nibii yɛ gbɛjianɔtoo naa kɛ teokrase gbɛ nɔ. Bɔfo Paulo ŋma akɛ: “Ejaakɛ Nyɔŋmɔ lɛ, ejeee sakasakafeemɔ Nyɔŋmɔ, shi moŋ hejɔlɛ Nyɔŋmɔ ni. . . . Afee nii fɛɛ bɔ ni yɔɔ fɛo kɛ gbɛnaa gbɛnaa.”—1 Kor. 14:33, 40.
2 Eyɛ mli akɛ nibii komɛi tamɔ tsɔne ni afoɔ he naagbai, heloonaa nitsumɔ, loo yelikɛbuamɔ ni akɛaaha asafo ko ni nɔkwɛlɔi ahe hiaa yɛ mli lɛ baanyɛ aha wɔya kpee yɛ he kroko moŋ, shi ehi jogbaŋŋ akɛ wɔkɛ asafo ni wɔyɔɔ eshikpɔŋkuku mli lɛ aaaya kpee. Enɛ haa shiɛmɔyaa feɔ mlɛo, ni ehaaa wɔfã gbɛ kakadaŋŋ kɛyafata kuu ko ni bɛ wɔkutso lɛ mli lɛ he kɛya shiɛmɔ. Eyeɔ ebua wɔ koni wɔkɛ mɛi krokomɛi ni yɔɔ wɔsafo lɛ mli lɛ atsu nii, ni ehaa wɔnyɛɔ wɔfɔ̃ɔ mɛi heei nine kɛyaa kpee ni bɛŋkɛ amɛ fe fɛɛ lɛ shishi. Ni ehaa wɔkɛ nyɛmimɛi hii kɛ yei krokomɛi ni yɔɔ wɔkutso lɛ mli ni baanyɛ aye abua wɔ yɛ fimɔ beaŋ lɛ shãraa.
3 Kɛ́ wɔkɛ gbɛjianɔ ni ato nɛɛ tsu nii yɛ heshibaa mli lɛ, etsɔɔ akɛ wɔkɛ Maŋtsɛyeli lɛ he nibii lɛ miiye klɛŋklɛŋ gbɛhe. (Luka 16:10) Kɛ́ ato asafo hee ko loo atsake shiɛmɔyaa kui lɛ amli lɛ, ekolɛ wɔbaasumɔ akɛ wɔkɛ wɔnanemɛi komɛi ahi hekome. Shi kɛ́ wɔkpɛlɛ gbɛjianɔtoo hee nɛɛ nɔ lɛ, wɔbaanyɛ wɔná nanemɛi heei ni wɔmli alɛɛ wɔha mɛi krokomɛi yɛ asafo lɛ mli. Agbɛnɛ hu, kɛ́ shiɛlɔi lɛ yɛ asafo lɛ shikpɔŋkuku lɛ mli lɛ, ehaa efeɔ mlɛo kɛhaa onukpai lɛ akɛ amɛaakwɛ tooi lɛ, ni amɛha asafo lɛ he awa yɛ mumɔŋ.
4 Shi kɛlɛ, ayɔse akɛ esoro bɔ ni mɔ fɛɛ mɔ shihilɛ yɔɔ. Nibii tamɔ heloonaa nitsumɔ, hefatalɔ ni heee yeee, kɛ tsɔne ni afoɔ he naagbai lɛ baanyɛ aha mɔ ko akpɛ eyiŋ akɛ ebaahi eha lɛ akɛ ekɛ asafo kroko aya kpee.
5 Eji weku yitsei fɛɛ asɔ̃ akɛ amɛkwɛ amɛwekui lɛ. Be mli ni weku yitso lɛ esusu nibii fɛɛ ni yɔɔ sane nɛɛ mli lɛ ahe sɛɛ lɛ, lɛ ebaakpɛ eyiŋ yɛ nɔ ni hi fe fɛɛ lɛ he. Ebaanyɛ ekɛ onukpai lɛ asusu saji ahe kɛha ŋaawoo dani ekpɛ eyiŋ. Yɛ naagbee lɛ, onukpai lɛ baawo weku yitso lɛ hewalɛ koni ekpɛ yiŋ ni kɛ mumɔŋ sɛɛnamɔi ni hi fe fɛɛ baaha eweku lɛ.
6 Bei pii lɛ, ehi jogbaŋŋ akɛ okɛ asafo ni oyɔɔ eshikpɔŋkuku mli lɛ aaaya kpee. Enɛ haa akɛ teokrase gbɛjianɔtoo tsuɔ nii, ni afeɔ ‘nii fɛɛ gbɛnaa gbɛnaa.’—1 Kor. 14:33, 40.