Ani Okɛ Reasoning Wolo lɛ Miitsu Nii?
1. Mɛɛ gbɛ nɔ bɔfo Paulo kɛ Yesu tsɔ amɛtsɔɔ mɛi anii?
1 Bɔfo Paulo bɔ mɔdɛŋ akɛ ekɛ mɛi ‘asusu nii ahe kɛjɛ Ŋmalɛi lɛ amli.’ (Bɔf. 17:2, 3; 18:19) Nakai ni efee lɛ ha ekase Yesu, mɔ ni fɔɔ Ŋmalɛi ayisɛɛ tsɛmɔ, ni ekɛ nɔkwɛmɔnii tsuɔ nii kɛyeɔ ebua etoibolɔi lɛ ni amɛle nɔ ni Nyɔŋmɔ suɔmɔnaa nii ji lɛ. (Mat. 12:1-12) Áto Reasoning From the Scriptures wolo lɛ he gbɛjianɔ koni eye ebua wɔ ni wɔ hu wɔfee nakai nɔŋŋ.
2. Mɛɛ gbɛ nɔ wɔbaanyɛ wɔkɛ Reasoning wolo lɛ atsu nii kɛto hiɛkpamɔ wiemɔi ni mɔɔ shi ahe gbɛjianɔ?
2 Okɛ Hiɛkpamɔ Wiemɔ ní Mɔɔ Shi Asaa Ohe: Hiɛkpamɔ wiemɔi ní teɔ mɔ miishɛɛ shi babaoo yɛ Reasoning From the Scriptures wolo lɛ baafa 9-15 lɛ. Kɛ́ okaseɔ hiɛkpamɔ wiemɔi srɔtoi, ni okɛtsuɔ nii, titri lɛ yɛ shikpɔŋkuku ní ofɔɔ mli nitsumɔ lɛ mli lɛ, ebaaha otsake oshiɛmɔ lɛ mli, ni ebaaye ebua bo ni otsɔ gbɛ̀i srɔtoi anɔ oje sanegbaa shishi yɛ gbɛ ni mɔ̃ɔ shi nɔ. Obaanyɛ okane hiɛkpamɔ wiemɔi lɛ kɛjɛ wolo lɛ mli tɛ̃ɛ kɛ́ oooye odase yɛ tɛlifoŋ nɔ loo okɛ mɔ ko miiwie kɛtsɔ tɛlifoŋ ni yɔɔ eshinaa lɛ naa yɛ shĩai ni bulɔi buɔ jɛmɛ ni ayaaa jɛmɛ kɛkɛ lɛ nɔ.
3. Mɛɛ saji yɔɔ Reasoning wolo lɛ baafa 16-24 ní baanyɛ aye abua wɔ yɛ shiɛmɔ nitsumɔ lɛ mli?
3 Nɔ ni Obaakɛɛ Mɛi ni Tsĩɔ Sanegbaa Naa: Mɛni hewɔ otsɔɔɔ hiɛ osusu mɛi ni yɔɔ oshikpɔŋkuku lɛ mli ni baanyɛ atsĩ sanegbaa naa lɛ ahe, ni okɛ minitii fioo akwɛ saji ni yɔɔ baafa 16-21 lɛ mli kɛkwɛ hetoo ni obaaha amɛ? Ani shiatsɛmɛi lɛ ekomɛi aaanyɛ afee Buddhabii, Hindubii, Yudafoi, loo Muslimbii? Kɛ́ nakai ni lɛ, no lɛ saji ni yɔɔ baafa 21-24 baanyɛ aye abua.
4. Kɛ́ atée sanebimɔ loo naataamɔ sane ko shi lɛ, mɛɛ gbɛ nɔ wɔbaanyɛ wɔtsɔ wɔkɛ Reasoning wolo lɛ atsu nii?
4 Bɔ ni Wɔɔha Saji Ahetoo: Kɛ́ atée sanebimɔ loo naataamɔ sane ko shi lɛ, Reasoning wolo lɛ baanyɛ aye abua wɔ. Obaanyɛ okɛɛ mɔ lɛ akɛ oosumɔ ni okɛ sane ko ni yɔɔ miishɛɛ ni kɔɔ sane ni nyɛwieɔ he lɛ he lɛ atsɔɔ lɛ, koni no sɛɛ lɛ ojie o-Reasoning wolo lɛ. Akɛni ato saji lɛ anaa hewɔ lɛ, obaanyɛ ogbele kɛya saneyitso ni osusuɔ akɛ ekɔɔ sane ni nyɛsusuɔ he lɛ he lɛ. No sɛɛ lɛ, kwɛmɔ sanebimɔi ni akɛ niŋmaa ni mli ti eŋmala lɛ. Kɛ́ onaaa sane ni otaoɔ lɛ oya lɛ, gbelemɔ kɛya heni ato saji anaa yɛ wolo lɛ naagbee gbɛ lɛ. Kɛ́ ona sane ní sa lɛ, kanemɔ lɛ tɛ̃ɛ kɛjɛ wolo lɛ mli. Kɛ́ nyɛmiisusu ŋmalɛ pɔtɛ̃ɛ ko he lɛ, ekolɛ obaana sane ni otaoɔ lɛ yɛ baafa 445, yɛ saneyitso ni ji “Scriptures Often Misapplied” lɛ shishi.
5. Mɛɛ gbɛ̀i krokomɛi anɔ Reasoning wolo lɛ he baanyɛ aba sɛɛnamɔ?
5 Ekɛ Nitsumɔ Yɛ Gbɛ̀i Krokomɛi Anɔ: Mɛi komɛi yɛ Reasoning wolo lɛ eko yɛ amɛnitsumɔhe loo yɛ skul koni eye ebua amɛ ní amɛha sanebimɔi tamɔ, ‘Mɛni hewɔ nyɛyeee gbijuji lɛ?’ ahetoo. Oblahii kɛ oblayei ena akɛ nibii ni aŋmala yɛ saneyitsei ni ji “Creation” kɛ “Evolution” lɛ shishi lɛ eye ebua kɛtsu amɛskul nifeemɔi ahe nii. Ani oyaasara helatsɛ ko loo mɔ ko ni esuɔlɔ ko egbo? Saneyitso ni ji “Encouragement” lɛ baanyɛ aye abua bo ni ojɛ Ŋmalɛ lɛ mli oshɛje emii. Saji yɛ Reasoning wolo lɛ mli hu ni baanyɛ aye abua mɛi ni miisaa amɛhe ní amɛyaha wiemɔ kɛ mɛi ni miisaa amɛhe ni amɛyakwɛ kpee kɛha shiɛmɔyaa nɔ.
6. Kɛ́ wɔmiishiɛ lɛ, mɛni ji oti ni ma wɔhiɛ?
6 Kɛ́ wɔmiishiɛ lɛ, oti ni ma wɔhiɛ lɛ jeee ni wɔye naataamɔi anɔ; asaŋ jeee ni wɔkɛ adafitswaa kɛkɛ hu aha. Wɔmiitao wɔjɛ hesaa mli wɔkɛ mɛi asusu Ŋmalɛ lɛ he. Kɛ́ wɔkɛ Reasoning wolo lɛ tsu nii jogbaŋŋ lɛ, wɔtsɔɔ akɛ wɔhiɛ yɛ wɔtsɔɔmɔ lɛ nɔ.—1 Tim. 4:16.