Gbi Kome Kpee Krɛdɛɛ He Gbɛjianɔtoo Hee

Afi 2009 sɔɔmɔ afi lɛ gbi kome kpee krɛdɛɛ lɛ yitso ji “Baamɔ Sɔɔmɔ . . .  lɛ Yi, Koni Ogbe Naa Kwraa,” ni edamɔ Kolosebii 4:17 lɛ nɔ. Ákɛ Kristofoi lɛ, wɔkɛ hiɛdɔɔ susuɔ ŋaawoo nɛɛ he. Oti ni ma wɔhiɛ ji ní wɔkɛ anɔkwayeli agbe wɔsɔɔmɔ lɛ naa kwraa, taakɛ Yesu hu fee lɛ. (Yoh. 17:4) Bɔfo Paulo hu fee nɔkwɛmɔnɔ ni sa jogbaŋŋ yɛ enɛ mli kɛha wɔ. Etswa efai shi akɛ ebaagbe esɔɔmɔ nitsumɔ lɛ naa kwraa.—Bɔf. 20:24.

Wiemɔ ni kpokpaa nɔkwɛlɔ lɛ baaha lɛ baatsɔɔ bɔ ni shiɛlɔi komɛi miiye naagbai ni amɛkɛkpeɔ yɛ amɛsɔɔmɔ nitsumɔ lɛ mli lɛ nɔ kunim. No sɛɛ lɛ, wiemɔ ni hiɛ saneyitso akɛ “Ha Ohiɛ Ahi Nɔ ni Odu lɛ Nɔ” lɛ baatsɔɔ wɔ bɔ ni wɔɔfee wɔye wɔbua mɛi ni “ajie ato naanɔ wala lɛ.” (Bɔf. 13:48) Klɛŋklɛŋ lɛ, saralɔ ni baaba lɛ baawie 2 Korintobii 6:1-10 lɛ mli kukuji lɛ eko fɛɛ eko he yɛ wiemɔ ni saneyitso ji “Bɔ ni Wɔfeɔ Wɔkɛ Wɔhe Tsɔɔ akɛ Sɔɔlɔi” lɛ mli. Shwane wiemɔ ni ebaaha lɛ saneyitso ji “Ná Bulɛ ni Mli Kwɔ Oha Osɔɔmɔ Nitsumɔ Lɛ.” Ekã shi faŋŋ akɛ wiemɔi ni hiɛ saneyitsei akɛ “Gbekɛbii kɛ Onukpai, Nyɛnáa Shiɛmɔ Nitsumɔ lɛ He Miishɛɛ,” kɛ “Oblahii kɛ Oblayei ní kɛ Amɛhe Woɔ Shiɛmɔ Nitsumɔ lɛ Mli Kɛmɔɔ Shi” lɛ baawo bo hewalɛ. Esa akɛ mɛi ni baasumɔ ni amɛkɛ nu mli baptisimɔ amã amɛhenɔjɔɔmɔ lɛ nɔ mi yɛ gbi kome kpee krɛdɛɛ loo kpokpaa nɔ kpee ni abaafee lɛ eko shishi lɛ awó onukpai asɛinɔtalɔ lɛ toi nɔ amrɔ nɔŋŋ. Nɔ ko ni he hiaa waa yɛ kpeei bibii kɛ kpeei wuji ni wɔfeɔ lɛ eko fɛɛ eko shishi ji Buu-Mɔɔ lɛ ni wɔkaseɔ lɛ. Okɛ Buu-Mɔɔ ni abaakase yɛ otsi ni abaafee gbi kome kpee krɛdɛɛ lɛ shishi lɛ aba.

Be mli ni wɔbɔɔ mɔdɛŋ akɛ wɔɔgbe wɔsɔɔmɔ lɛ naa lɛ, wɔkwɛɔ wɔhe nɔ jogbaŋŋ bɔni afee ni nibii komɛi kɛ nifeemɔi krokomɛi akahé be ni wɔkɛtsuɔ nɔ ni Yehowa etuu ewo wɔdɛŋ lɛ he nii lɛ. Esa akɛ hewalɛwoo ni abaajɛ Ŋmalɛi lɛ amli akɛha wɔ yɛ gbi kome kpee krɛdɛɛ nɛɛ shishi lɛ aye abua wɔ ni wɔnu nibii ni esa akɛ wɔfee koni wɔhiɛ ahi oti ni ma wɔhiɛ lɛ nɔ, ni wɔjwɛŋ bɔ ni wɔɔfee wɔtsu wɔsɔɔmɔ nitsumɔ lɛ wɔgbe naa kwraa lɛ nɔ.