‘Nyɛnyiɛa Enanemaahei lɛ Asɛɛ Kpaakpa’
1. Te wɔɔfee tɛŋŋ wɔfee sɔɔlɔi ni he esa jogbaŋŋ lɛ?
1 Atsɔseee Yesu yɛ rabifoi lɛ askul lɛ eko mli, shi kɛlɛ eji Sɔɔlɔ ni fe fɛɛ yɛ yinɔsane mli. Wɔdaa shi akɛ aŋmala Yesu sɔɔmɔ nitsumɔ lɛ he saji ashwie shi kɛha wɔsɛɛnamɔ. Bɔni afee ni wɔfee sɔɔlɔi ni he esa jogbaŋŋ lɛ, esa akɛ ‘wɔnyiɛ enanemaahei lɛ asɛɛ kpaakpa.’—1 Pet. 2:21.
2. Mɛni baaye abua wɔ ní wɔjie suɔmɔ ni tamɔ Kristo nɔ̃ lɛ eko kpo wɔtsɔɔ mɛi?
2 Jiemɔ Suɔmɔ Kpo Otsɔɔ Mɛi: Suɔmɔ ni Yesu yɔɔ kɛha mɛi lɛ tsirɛ lɛ. (Mar. 6:30-34) Mɛi pii yɛ wɔshikpɔŋkuku lɛ mli ni ‘miikɔ̃mɔ,’ ní anɔkwale lɛ he miihia amɛ waa diɛŋtsɛ. (Rom. 8:22) Kɛ́ wɔjwɛŋ jaramɔ shihilɛ mli ni amɛyɔɔ, kɛ miishɛɛ ni Yehowa yɔɔ yɛ amɛhe lɛ nɔ lɛ, ebaatsirɛ wɔ koni wɔkã he wɔshiɛ. (2 Pet. 3:9) Kɛfata he lɛ, kɛ́ mɛi na akɛ wɔsusuɔ amɛhe lɛɛlɛŋ lɛ, ebaafee mlɛo kɛha amɛ akɛ amɛaabo wɔshɛɛ sane lɛ toi.
3. Mɛɛ bei amli Yesu shiɛ etsɔɔ mɛi?
3 Okɛ Hegbɛ Fɛɛ Hegbɛ ni Obaaná lɛ Awie: Yesu ŋɔ hegbɛ fɛɛ hegbɛ ni ená lɛ ni ekɛjaje sanekpakpa lɛ etsɔɔ mɛi krokomɛi. (Mat. 4:23; 9:9; Yoh. 4:7-10) Wɔ hu wɔbaasumɔ ni wɔsaa wɔhe wɔto koni wɔwie anɔkwale lɛ he yɛ wɔdaa gbi shihilɛ mli. Mɛi komɛi hiɛɔ Biblia lɛ kɛ asafo lɛ woji krokomɛi koni ekolɛ amɛnyɛ amɛye odase yɛ amɛnitsumɔhei, yɛ skul, beni amɛfãa gbɛ, kɛ beni amɛyeɔ jara, loo beni amɛtee hei krokomɛi.
4. Mɛɛ gbɛ nɔ wɔbaanyɛ wɔha Maŋtsɛyeli lɛ afee wɔshiɛmɔ lɛ saneyitso?
4 Ha Maŋtsɛyeli lɛ Afee Oti ni Mã Ohiɛ: Maŋtsɛyeli lɛ he sanekpakpa lɛ ji Yesu shiɛmɔ lɛ saneyitso. (Luka 4:43) Eyɛ mli akɛ ekolɛ wɔtsiŋ Maŋtsɛyeli lɛ tã tɛ̃ɛ loo wɔwieŋ he yɛ wɔshiɛmɔ wiemɔ lɛ mli moŋ, shi esa akɛ wɔha ehi wɔjwɛŋmɔ mli akɛ ehe miihia ni mɔ ni boɔ wɔ toi lɛ ale nɔ hewɔ ni Maŋtsɛyeli lɛ he hiaa lɛ. Kɛ́ wɔtsĩɔ shihilɛi gbohii ni yaa nɔ yɛ je lɛŋ ni tsɔɔ akɛ wɔyɛ naagbee gbii lɛ amli lɛ atã po lɛ, ‘sanekpakpa lɛ he nii kpakpai’ lɛ ji nɔ titri ni wɔshiɛɔ lɛ.—Rom. 10:15.
5. Bɔni afee ni wɔsɔɔmɔ nitsumɔ lɛ afee nɔ ni mɔɔ shi lɛ, mɛɛ gbɛfaŋnɔ esa akɛ Biblia lɛ atsu?
5 Okɛ Ohe Afɔ̃ Nyɔŋmɔ Wiemɔ lɛ Nɔ: Yesu kɛ Ŋmalɛi lɛ tsu nii be fɛɛ be yɛ esɔɔmɔ nitsumɔ lɛ mli. Etooo eyiŋ etsɔɔɔ nɔ ko. (Yoh. 7:16, 18) Ekase Nyɔŋmɔ wiemɔ lɛ jogbaŋŋ, ni ekɛtsu nii kɛbu ehe beni Satan tutua lɛ lɛ. (Mat. 4:1-4) Bɔni afee ni wɔnyɛ wɔtsɔɔ mɛi krokomɛi anii ni emɔ shi jogbaŋŋ lɛ, esa akɛ wɔkane Biblia lɛ daa ni wɔkɛtsu nii yɛ wɔ diɛŋtsɛ wɔshihilɛ mli. (Rom. 2:21) Kɛ́ wɔmiiha saji ahetoo yɛ shiɛmɔ nitsumɔ lɛ mli lɛ, esa akɛ wɔtsɛ Ŋmalɛi ayisɛɛ kɛfi nɔ ni wɔwieɔ lɛ sɛɛ, ni kɛ́ aaahi lɛ, wɔkane ŋmalɛi lɛ tɛ̃ɛ kɛjɛ Biblia lɛ mli. Wɔmiisumɔ ni shiatsɛ lɛ ana akɛ jeee wɔ diɛŋtsɛ wɔsusumɔi ahe wɔwieɔ lɛ, shi moŋ Nyɔŋmɔ susumɔi ahe wɔwieɔ lɛ.
6. Mɛni Yesu fee koni eshɛ etoibolɔi lɛ atsuii ahe?
6 Ha Onitsɔɔmɔ lɛ Ashɛ Tsui lɛ He: “Bɔ ni gbɔmɔ nɛɛ wieɔ lɛ, mɔ ko ewieko nakai dã.” (Yoh. 7:46) Enɛ ji nɔ ni tsuji ni atsu ni amɛyamɔ Yesu lɛ wie yɛ ehe beni osɔfonukpai lɛ kɛ Farisifoi lɛ bi amɛ nɔ hewɔ ni amɛnyɛɛɛ amɛmɔ lɛ lɛ. Yɛ nɔ najiaŋ ni Yesu kɛ anɔkwalei lɛ kɛkɛ baaha lɛ, etsɔɔ nii yɛ gbɛ ni ha eshɛ etoibolɔi lɛ atsuii ahe lɛ nɔ. (Luka 24:32) Ekɛ nɔkwɛmɔnii ni yaa nɔ yɛ mɛi lɛ adaa gbi shihilɛ mli lɛ tsu nii koni amɛnu esane lɛ shishi. (Mat. 13:34) Yesu kɛ saji babaoo gbaaa etoibolɔi lɛ anaa. (Yoh. 16:12) Egbala mɛi ajwɛŋmɔ kɛtee Yehowa nɔ moŋ fe ni eeegbala jwɛŋmɔ kɛba enɔ. Taakɛ Yesu fee lɛ, wɔ hu wɔbaanyɛ wɔtsɔmɔ tsɔɔlɔi ni he esa kɛ́ ‘wɔhiɛ hi wɔtsɔɔmɔ lɛ nɔ’ be fɛɛ be.—1 Tim. 4:16.
7. Mɛni hewɔ Yesu nijiaŋ ejeee wui yɛ sɔɔmɔ nitsumɔ lɛ mli lɛ?
7 Kã He Oshiɛ yɛ Wiemɔ lɛ Toi ni Abooo kɛ Shitee-kɛwoo Fɛɛ Sɛɛ: Eyɛ mli akɛ Yesu fee naakpɛɛnii babaoo moŋ, shi mɛi pii booo lɛ toi. (Luka 10:13) Eweku mlibii lɛ ekomɛi po susu akɛ ‘eyiŋ miikã lɛ, loo eye sɛkɛ.’ (Mar. 3:21) Fɛɛ sɛɛ lɛ, Yesu nijiaŋ ejeee wui. Ená jwɛŋmɔ ni ja, ejaakɛ ele faŋŋ akɛ ehiɛ anɔkwale ni baanyɛ aha mɛi aye amɛhe lɛ. (Yoh. 8:32) Wɔ hu wɔtswa wɔfai shi akɛ, yɛ Yehowa yelikɛbuamɔ naa lɛ wɔhaŋ wɔnijiaŋ aje wui kɔkɔɔkɔ.—2 Kor. 4:1.
8, 9. Mɛɛ gbɛ nɔ wɔbaanyɛ wɔtsɔ wɔkɛ nibii ashã afɔle yɛ sanekpakpa lɛ hewɔ taakɛ Yesu fee lɛ?
8 Feemɔ Nɔ Fɛɛ Nɔ ni Obaanyɛ Koni Oná Mli Gbɛfaŋnɔ Kɛmɔ Shi: Yesu kɛ heloonaa miishɛɛnamɔi shã afɔle yɛ sɔɔmɔ nitsumɔ lɛ hewɔ. (Mat. 8:20) Ekɛ mɔdɛŋbɔɔ fɛɛ shiɛ, bei komɛi po lɛ kɛboteɔ jenamɔ mli. (Mar. 6:35, 36) Yesu le akɛ be fioo ko kɛkɛ eyɔɔ ni ekɛbaagbe enitsumɔ lɛ naa. Akɛni “be lɛ faaa dɔŋŋ” hewɔ lɛ, esa akɛ wɔ hu wɔkɛ wɔbe, wɔhewalɛ, kɛ wɔheloonaa nibii ni wɔyɔɔ lɛ ashã afɔle taakɛ Yesu fee lɛ.—1 Kor. 7:29-31.
9 Klɛŋklɛŋ afii 100 lɛ mli Kristofoi lɛ ahe esa akɛ shiɛlɔi ejaakɛ amɛkase nii kɛjɛ Yesu ŋɔɔ. (Bɔf. 4:13) Wɔ hu wɔbaanyɛ wɔgbe wɔsɔɔmɔ nitsumɔ lɛ naa kwraa kɛ́ wɔkase Sɔɔlɔ ni fe fɛɛ yɛ yinɔsane mli fɛɛ lɛ.—2 Tim. 4:5.