‘Nyɛhaa Ŋoo Ahia Nyɛwiemɔ Mli Daa’
1. Mɛni ‘ŋoo ni wɔɔha ehi wɔwiemɔ mli’ lɛ tsɔɔ?
1 “Nyɛhaa nyɛwiemɔ he abaa nyam daa, ni ŋoo ahi mli, ní nyɛle bɔ ni sa akɛ nyɛhaa mɔ fɛɛ mɔ hetoo.” (Kol. 4:6) Ní wɔɔha ŋoo ahi wɔwiemɔ mli lɛ tsɔɔ akɛ wɔbaahala wiemɔi ni sa, ni wɔwie yɛ gbɛ ni baaha mɔ ni wɔkɛwieɔ lɛ aná he miishɛɛ nɔ. Nakai ni wɔɔfee be ni wɔkɛ wɔhe woɔ shiɛmɔ nitsumɔ lɛ mli lɛ he miihia waa diɛŋtsɛ.
2. Te Yesu fee tɛŋŋ eye Samariayoo ko odase lɛ?
2 Yesu Nɔkwɛmɔnɔ Lɛ: Beni Yesu jɔɔ ehe yɛ nubu ko he lɛ, ekɛ Samariayoo ko ni ba ebayɛ nu lɛ bɔi sanegbaa. Samariayoo lɛ wie béi ni kã amɛkɛ Yudafoi lɛ ateŋ afii babaoo nɛ lɛ he shii abɔ yɛ amɛsanegbaa lɛ mli. Etsɔɔ hu akɛ eheɔ eyeɔ akɛ Samariabii lɛ ji Yakob seshibii, eyɛ mli akɛ Yudafoi lɛ nuɔ he waa akɛ Samariabii lɛ jeee Yudafoi. Yɛ nɔ najiaŋ ni Yesu kɛ yoo lɛ aaataa sane naa lɛ, ekpɛlɛ nɔ ni ewieɔ lɛ nɔ. Nɔ ni jɛ mli ba ji akɛ, enyɛ eye yoo lɛ odase, ni lɛ kɛ hii ni yɔɔ maŋ lɛ mli lɛ fɛɛ ná he sɛɛ.—Yoh. 4:7-15, 39.
3. Te wɔɔfee tɛŋŋ wɔkase Yesu nɔkwɛmɔnɔ lɛ beni wɔtsuɔ shiɛmɔ nitsumɔ lɛ?
3 Kɛ́ wɔmiishiɛ lɛ, esa akɛ wɔha yiŋtoo hewɔ ni wɔshiɛɔ lɛ ahi wɔjwɛŋmɔ mli—‘ni wɔshiɛ nii kpakpai lɛ.’ (Rom. 10:15) Wɔmiisumɔ ni wɔkɛ shiatsɛ lɛ agba Biblia mli sane ni yɔɔ miishɛɛ ni tswaa mɔ emaa shi, shi jeee ní wɔha enu he akɛ wɔmiite shi wɔmiiwo ehemɔkɛyeli lɛ. Kɛ́ ejie susumɔ ko ni ejaaa kpo lɛ, esaaa akɛ wɔkɛmaa ehiɛ kpoo nɔŋŋ akɛ nɔ ni ewie lɛ ejaaa. Ani nɔ ko yɛ ewiemɔ lɛ mli ni wɔbaanyɛ wɔdamɔ nɔ wɔkɛ lɛ akpã gbee loo wɔdamɔ nɔ wɔjie eyi? Ekolɛ wɔbaanyɛ wɔkpa ŋmalɛ ko hiɛ kɛtsɔ kɛɛmɔ ni wɔɔkɛɛ akɛ, “Ani osusu nɔ ni ŋmalɛ nɛɛ tsɔɔ lɛ he pɛŋ?” lɛ nɔ.
4. Mɛni esa akɛ wɔfee kɛ́ shiatsɛ lɛ jɛ́ wɔ?
4 Ni kɛ́ shiatsɛ lɛ jɛ́ wɔ loo enifeemɔ tsɔɔ faŋŋ akɛ eetao ekɛ wɔ aje ŋwane hu? Esa akɛ wɔya nɔ wɔjie mlijɔlɛ kpo yɛ wɔwiemɔ kɛ wɔnifeemɔ mli. (2 Tim. 2:24, 25) Kɛ́ mɔ lɛ nyaaa Maŋtsɛyeli shɛɛ sane lɛ he lɛ, ebaafee nɔ ni hi akɛ wɔɔtsɔ ŋaa gbɛ nɔ wɔshi lɛ.—Mat. 7:6; 10:11-14.
5. Mɛɛ gbɛ nɔ mlihilɛ mli ni nyɛmi yoo ko jɛ ewie lɛ wo yibii kpakpai?
5 Yibii Kpakpai: Beni nyɛmi yoo ko bɔ mɔdɛŋ akɛ ebaashiɛ eha yoo ko ni yɔɔ ekutso lɛ mli lɛ, yoo lɛ mli fú waa ni ebɔi lɛ jɛmɔ. Wɔnyɛmi yoo lɛ jɛ mlihilɛ mli ekɛɛ lɛ akɛ: “Ofainɛ miikpa bo fai. Miibi gbɛ mɔ.” Otsii enyɔ sɛɛ lɛ, yoo lɛ yatswa nyɛmi yoo lɛ shinaa, ni ekpa lɛ fai yɛ nɔ ni efee lɛ hewɔ, ni ewo lɛ shi akɛ agbɛnɛ lɛ ebaabo nɔ ni eyɔɔ lɛ kɛɛmɔ lɛ toi. Bei pii lɛ naajɔlɛ hetoo woɔ yibii kpakpai!—Abɛi 15:1; 25:15.
6. Mɛni hewɔ esa akɛ wɔkɛ wiemɔi ni ŋɔɔ atsu nii yɛ shiɛmɔ nitsumɔ lɛ mli lɛ?
6 Bɔɔ mɔdɛŋ akɛ okɛ wiemɔi ni ŋɔɔ baatsu nii beni oshiɛɔ sanekpakpa lɛ. Kɛ́ shiatsɛ lɛ booo bo toi po lɛ, ekolɛ ebaasumɔ ni ebo sane lɛ toi be kroko kɛ́ Yehowa Odasefoi yatswa eshinaa.