Sanebimɔ He

◼ Ani ebaafee nɔ ni sa akɛ aaato nifeemɔ ko he gbɛjianɔ kɛtao shika kɛye abua asafo lɛ?

Jamɔi fɔɔ nifeemɔi ni akɛtaoɔ shika, tamɔ nibii ni sɔlemɔ bii lɛ kɛbaa ni akɛ jarawalɛ hɔ̃ɔ haa amɛ nɔŋŋ, kɛ ŋmɔshi nibii ahɔɔmɔ ahe gbɛjianɔtoo. Ekolɛ jamɔi krokomɛi baatsu nii akɛ asafo kɛtao shika, loo amɛŋmala woji po kɛbi shika. Eyɛ mli akɛ ekolɛ mɛi komɛi baanu he akɛ afeɔ enɛɛmɛi kɛtsuɔ yiŋtoi kpakpai ahe nii moŋ, shi yɛ anɔkwale mli lɛ, nifeemɔi nɛɛ bafeɔ nibaa. Wɔtaooo shika yɛ nɛkɛ gbɛ nɔ koni wɔkɛtsu wɔgbɛjianɔtoo lɛ he nii.

Yɛ Watch Tower ni nyiɛ klɛŋklɛŋ nɔ̃ ni akala lɛ sɛɛ, ni je kpo yɛ August 1879 lɛ mli lɛ, Nyɛminuu Russell tsɔɔ nɔ hewɔ ni ekaseee bɔ ni sɔlemɔi lɛ balaa shika lɛ mli, ni ekɛɛ akɛ: “Wɔheɔ wɔyeɔ akɛ YEHOWA fiɔ ‘Zion’s Watch Tower’ lɛ sɛɛ, ni be mli ni efeɔ enɛ lɛ, wɔkpaŋ mɛi afai ni asaŋ wɔbiŋ mɛi koni amɛye amɛbua wɔ. Kɛ́ Mɔ ni kɛɛ akɛ: ‘Shika kɛ jwiɛtɛi fɛɛ ni yɔɔ gɔji lɛ anɔ lɛ minɔŋ’ lɛ, haaa shika kɛha nitsumɔ nɛɛ dɔŋŋ lɛ, no lɛ wɔbaamu sane naa akɛ, be eshɛ ni esa akɛ wɔfɔ̃ɔ woji lɛ akalamɔ.”

Wɔyaa nɔ wɔkɛ Ŋmalɛ naa shishitoo mla nɛɛ tsuɔ nii akɛ: “Mɔ fɛɛ mɔ aha bɔ ni ekpɛ mli momo yɛ etsui mli, ni ekajɛ ŋkɔmɔyeli aloo fimɔ mli: ejaakɛ tsuijurɔnaa halɔ Nyɔŋmɔ sumɔɔ.” (2 Kor. 9:7) Akɛ oniatsumɔ adekai mamɔɔ Maŋtsɛyeli Asa lɛ nɔ koni aŋkroaŋkroi ajɛ amɛsuɔmɔ mli amɛkɛ shika awo mli kɛ́ amɛmiisumɔ. (2 Maŋ. 12:10) Anyɛɛɛ mɛi anɔ ni amɛtsu oniai nɛɛ; ni asaŋ mɛi nɛɛ tsuuu oniai lɛ hu kɛ susumɔ akɛ amɛbaaná he sɛɛ.