Kaaŋmɛɛ Oklɛŋklɛŋ Suɔmɔ lɛ He
1 Yesu ni awo ehiɛ nyam lɛ kɛ klɛŋklɛŋ afii 100 lɛ mli asafo ni yɔɔ Efeso lɛ wie yɛ hiɛdɔɔ mli akɛ: “Mikɛo yɛ sane ko, no ji akɛ óŋmɛɛ oklɛŋklɛŋ suɔmɔ lɛ he.” (Kpoj. 2:4) Eeenyɛ efee akɛ amɛteŋ mɛi babaoo eŋmɛɛ klɛŋklɛŋ suɔmɔ ni amɛná kɛha Yehowa lɛ he. Beni akɛ wɔ kaseɔ nii lɛ, wɔbaná suɔmɔ ni mli wa kɛha Nyɔŋmɔ kɛ wɔnaanyo gbɔmɔ, ni enɛ tsirɛ wɔ koni wɔkɛ ekãa ajaje hiɛnɔkamɔ hee ni wɔná lɛ wɔtsɔɔ mɛi krokomɛi. Mɛni baaye abua wɔ koni wɔkaŋmɛɛ wɔklɛŋklɛŋ suɔmɔ lɛ he, ní ekãa ni wɔkɛtsuɔ sɔɔmɔ nitsumɔ lɛ naa akaba shi?
2 Aŋkro Nikasemɔ kɛ Kpeeiyaa: Mɛni ha wɔná suɔmɔ kɛha Nyɔŋmɔ kɛ wɔnaanyo gbɔmɔ beni akɛ wɔ kaseɔ nii lɛ? Ani jeee Yehowa he nii babaoo ni wɔkase kɛjɛ Ŋmalɛi lɛ amli lɛ? (1 Yoh. 4:16, 19) No hewɔ lɛ, bɔni afee ni wɔsuɔmɔ lɛ “afá kɛya nɔ, ni eteke nɔ fe tsutsu lɛ,” esa akɛ wɔya nɔ wɔná anɔkwa nilee, ni tsɔɔ akɛ wɔpɛi “Nyɔŋmɔ nibii ni mli kwɔlɔ” lɛ amli.—Fil. 1:9-11; 1 Kor. 2:10.
3 Aŋkro nikasemɔ ní mɔ aaaya anɔ efee yɛ be ni eto kɛha efeemɔ lɛ mli lɛ baanyɛ afee nɔ ni wa waa diɛŋtsɛ yɛ naagbee gbii ni yeyeeyefeemɔi kɛ nibii ni gbalaa mɔ jwɛŋmɔ eyi mli obɔ nɛɛ mli. (2 Tim. 3:1) Esa akɛ wɔto be ni wɔkase woji ni wajeɔ wɔkɛ Nyɔŋmɔ teŋ wekukpaa lɛ. Asafoŋ kpeei ní wɔɔya daa lɛ hu he miihia, titri lɛ akɛni ‘wɔnaa akɛ gbi lɛ miibɛŋkɛ nɛɛ.’—Heb. 10:24, 25.
4 Shiɛmɔ Nitsumɔ Lɛ: Wɔhe ni wɔkɛwoɔ shiɛmɔ nitsumɔ lɛ mli kɛ ekãa lɛ yeɔ ebuaa wɔ koni wɔkaŋmɛɛ klɛŋklɛŋ suɔmɔ ni wɔná kɛha Nyɔŋmɔ lɛ he. Sanekpakpa lɛ ni wɔshiɛɔ lɛ haaa wɔhiɛ akpa Yehowa shiwoi ni suɔmɔ yɔɔ mli lɛ anɔ, ni enɛ yeɔ ebuaa wɔ ni wɔhiɛɔ wɔhiɛnɔkamɔ lɛ mli kpɛŋŋ, ni eyeɔ ebuaa wɔ hu koni wɔkaŋmɛɛ suɔmɔ ni wɔyɔɔ lɛ he. Biblia mli anɔkwalei lɛ ní wɔɔtsɔɔ mɛi krokomɛi lɛ biɔ ni wɔ diɛŋtsɛ lɛ wɔtao nii amli ni wɔnu anɔkwalei nɛɛ ashishi jogbaŋŋ, ni enɛ feemɔ wajeɔ wɔhemɔkɛyeli lɛ.—1 Tim. 4:15, 16.
5 Yehowa ji mɔ ni sa akɛ wɔkɛ wɔnibii fɛɛ, ni wɔsuɔmɔ hu fata he lɛ aha. (Kpoj. 4:11) Kaaŋmɛ gbɛ ni osuɔmɔ lɛ ba shi. Yaa nɔ oha oklɛŋklɛŋ suɔmɔ lɛ mli awa kɛtsɔ hiɛdɔɔ ni okɛaakase Biblia lɛ, kpeei ni oooya daa, kɛ ekãa ni okɛaajaje sanekpakpa lɛ otsɔɔ mɛi krokomɛi lɛ nɔ.—Rom. 10:10.