Mɛni Okɛyeɔ Klɛŋklɛŋ Gbɛhe yɛ Oshihilɛ Mli?
1 Te obaaha sanebimɔ nɛɛ hetoo oha tɛŋŋ? Eji anɔkwale akɛ wɔteŋ mɔ fɛɛ mɔ miisumɔ ni ekɛ Maŋtsɛyeli lɛ aye klɛŋklɛŋ gbɛhe yɛ eshihilɛ mli. (Mat. 6:33) Shi wɔbaanyɛ wɔbi wɔhe akɛ, ‘Ani nibii ni midiɔ sɛɛ yɛ shihilɛ mli lɛ tsɔɔ akɛ miifee nakai?’ Biblia lɛ woɔ wɔ hewalɛ akɛ: “Nyɛyaa nɔ nyɛtsɔa bɔ ni nyɛ diɛŋtsɛ nyɛji.” (2 Kor. 13:5, NW) Mɛɛ gbɛ nɔ wɔɔtsɔ wɔtsɔɔ akɛ wɔkɛ Maŋtsɛyeli lɛ yeɔ klɛŋklɛŋ gbɛhe yɛ wɔshihilɛ mli?
2 Wɔbe: Klɛŋklɛŋ lɛ, wɔbaanyɛ wɔpɛi bɔ ni wɔkɛ wɔbe tsuɔ nii wɔhaa lɛ mli. (Efe. 5:15, 16) Be enyiɛ wɔfiteɔ otsi fɛɛ otsi yɛ hiɛtserɛjiemɔi ahe, be enyiɛ wɔfiteɔ kɛkwɛɔ tɛlivishiŋ, be enyiɛ wɔfiteɔ yɛ Internet lɛ he, ni be enyiɛ wɔfiteɔ yɛ shwɛmɔ mli? Kɛji wɔbu be ni wɔfiteɔ yɛ nibii nɛɛ ahe lɛ naa ni wɔkɛto be ni wɔkɛwoɔ Nyɔŋmɔ sɔɔmɔ mli lɛ he lɛ, wɔnaa baakpɛ wɔhe. Ani nii kpɔtɔɔ ni wɔtaoɔ wɔná lɛ haa kɛ́ akpa nitsumɔ lɛ, wɔyaa nɔ wɔtsuɔ nii ni wɔkuɔ wɔhiɛ wɔshwieɔ mumɔŋ nibii anɔ? Shii enyiɛ yɛ otsi lɛ naagbee wɔtsiɔ kpeeiyaa kɛ shiɛmɔyaa wɔtoɔ ni wɔkɛ wɔhe woɔ hiɛtserɛjiemɔ mli?
3 Kɛ Nibii ni He Hiaa lɛ Aye Klɛŋklɛŋ Gbɛhe: Wɔteŋ mɛi babaoo náŋ be ni wɔkɛtsu nibii ni wɔtaoɔ wɔfee lɛ fɛɛ. No hewɔ lɛ, Maŋtsɛyeli lɛ he nibii ni wɔkɛaaye klɛŋklɛŋ gbɛhe baabi ni wɔpɛi nibii ni wɔkɛyeɔ klɛŋklɛŋ gbɛhe lɛ amli koni wɔto be wɔha “nii ni hi titri lɛ.” (Fil. 1:10) Nibii nɛɛ ateŋ ekomɛi ji Nyɔŋmɔ Wiemɔ lɛ ni wɔɔkase, shiɛmɔ nitsumɔ lɛ ni wɔkɛ wɔhe aaawo mli, wɔwekui ni wɔɔkwɛ, kɛ Kristofoi akpeei ni wɔɔya. (Lala 1:1, 2; Rom. 10:13, 14; 1 Tim. 5:8; Heb. 10:24, 25) Nibii krokomɛi tamɔ kpɔiaŋgbɔlemɔ kɛ hiɛtserɛjiemɔ ni sa ni wɔkɛ wɔhe aaawo mli lɛ he baaba sɛɛnamɔ kɛha wɔ. (Mar. 6:31; 1 Tim. 4:8) Shi esaaa akɛ wɔkɛ nibii ni he ehiaaa tsɔ nɛɛ yeɔ nibii ni he hiaa titri lɛ ahiɛ.
4 Nyɛminuu oblanyo fioo ko kɛ Maŋtsɛyeli lɛ ye klɛŋklɛŋ gbɛhe yɛ eshihilɛ mli kɛtsɔ ehe ni ekɛwo be-fɛɛ sɔɔmɔ lɛ mli moŋ fe nɔ ni eeya univɛsiti bɔni afee ni wɔsɛɛ lɛ ená nitsumɔ kpakpa. Ekase wiemɔ kroko efata nɔ ni ele lɛ he ni eyasɔmɔ yɛ he ni hiamɔ lɛ da yɛ. Ewie akɛ: “Mimii eshɛ mihe jogbaŋŋ yɛ biɛ. Shiɛmɔ nitsumɔ lɛ ŋɔɔ jogbaŋŋ! Miná ni oblahii kɛ oblayei fɛɛ kɛ amɛhe baawo nifeemɔ ni tamɔ nɛkɛ mli bɔni afee ni amɛ hu amɛná miishɛɛ tamɔ mi. Nɔ̃ kpakpa ko bɛ ni fe Yehowa ni wɔkɛ wɔnii fɛɛ ni wɔyɔɔ lɛ aaasɔmɔ lɛ.” Hɛɛ, Maŋtsɛyeli lɛ ni wɔkɛyeɔ klɛŋklɛŋ gbɛhe lɛ haa Yehowa ni ji wɔ-Tsɛ ni yɔɔ ŋwɛi lɛ jɔɔ wɔ babaoo, ni nɔ ni fe fɛɛ lɛ, enáa nakai ni wɔfeɔ lɛ he miishɛɛ.—Heb. 6:10.