Ani Obuɔ Gbalashihilɛ Akɛ Eyɛ Krɔŋkrɔŋ?
1, 2. (a) Mɛni ji “gbalashihilɛ mli ni aboteɔ yɛ nɔ ko hewɔ” lɛ? (b) Mɛni hewɔ mɛi komɛi kɛ amɛhe eyawo nifeemɔ nɛɛ mli lɛ? (d) Te nyɛmimɛi komɛi buɔ nifeemɔ nɛɛ amɛhaa tɛŋŋ?
1 Ekolɛ mɛi ni yɔɔ ŋmɛnɛ lɛ ateŋ mɛi babaoo baakɛɛ amɛbuɔ gbalashihilɛ akɛ eyɛ krɔŋkrɔŋ. Kɛlɛ, amɛteŋ mɛi komɛi kɛ amɛnifeemɔi tsɔɔ faŋŋ akɛ amɛbuɔ gbalashihilɛ akɛ eji nuu kɛ yoo teŋ shiwoo he nifeemɔ ko kɛkɛ aloo ákɛ eji kpaŋmɔ ko kɛkɛ ni akɛwoɔ mla shishi. Mɛni asafo lɛ mlibii lɛ ateŋ mɛi komɛi feɔ ni haa anaa akɛ amɛbuɔ gbalashihilɛ tamɔ mɛi ni yɔɔ je lɛŋ lɛ?
2 Nɔ ni afɔɔ feemɔ yɛ hei komɛi ji akɛ, mɛi boteɔ gbalashihilɛ mli bɔni afee ni amɛná mla naa hegbɛ kɛhi maŋ kroko nɔ. Bei pii lɛ, nɔ ni aŋkroaŋkroi nɛɛ feɔ ji akɛ, amɛ kɛ nakai maŋ lɛ mlinyo loo mɔ ko ni jɛmɛ mla ŋmɛɔ lɛ gbɛ koni ehi maŋ lɛ mli baa gbeekpamɔ akɛ amɛbaawo lɛ nyɔmɔ koni amɛbote gbalashihilɛ mli. Bei babaoo lɛ, bɔ ni ebaalɛ ji akɛ, kɛ́ mɛi enyɔ nɛɛ bote gbalashihilɛ mli lɛ, amɛhiii shi akɛ mɔ kɛ eŋa, shi moŋ mɔ fɛɛ mɔ hiɛɔ ehe, ni bei komɛi po lɛ, amɛhiii shi akɛ nanemɛi. Kɛ́ amɛnine shɛ mla naa woji anɔ akɛ amɛbaanyɛ amɛhi maŋ lɛ mli lɛ, etsɛɛɛ kɛkɛ lɛ amɛtse gbãla lɛ mli. Mɛi komɛi po muɔ sane naa akɛ, shii abɔ ni amɛkɛ amɛhe náaa bɔlɛ lɛ, “gbalashihilɛ mli ni aboteɔ yɛ nɔ ko hewɔ” nɛɛ ji gbeekpamɔ ni abaa yɛ nifeemɔ ko he, ni ákɛ nɔ ko bɛ sɛɛ dɔŋŋ. Te esa akɛ wɔbu nifeemɔ nɛɛ wɔha tɛŋŋ?
3. (a) Mɛni hewɔ gbalashihilɛ he gbɛjianɔtoo ni tamɔ nakai ni mɔ kɛ ehe woɔ mli lɛ tsɔɔ akɛ ebɛ bulɛ ko kwraa kɛha Yehowa, ni asaŋ ebuuu gbalashihilɛ akɛ eyɛ krɔŋkrɔŋ lɛ? (b) Kɛji wu kɛ ŋa tse gbãla mli yɛ mla naa po lɛ, mɛni hewɔ yɛ Ŋmalɛ naa lɛ, amɛnyɛŋ amɛkɛ mɔ kroko abote gbalashihilɛ mli lɛ?
3 Biblia lɛ miihi ákɛ akɛ yiŋfɛlɛfɛlɛ ni tamɔ nɛkɛ aaasusu gbalashihilɛ he. Ákɛ mɔ baatsɔ gbalashihilɛ nɔ ekɛtsu epɛsɛmkunya akɔnɔi ahe nii lɛ tsɔɔ akɛ ebɛ bulɛ ko kwraa kɛha Yehowa, ni asaŋ ebuuu gbalashihilɛ akɛ eyɛ krɔŋkrɔŋ. Ekɔɔɔ he eko jwɛŋmɔ ni mɔ kɛboteɔ gbalashihilɛ mli lɛ, sane lɛ ji akɛ kɛ́ mɛi bote gbalashihilɛ mli lɛ, amɛkɛ amɛhe baa gbeekpamɔ ko ni yɔɔ krɔŋkrɔŋ, ni Nyɔŋmɔ buɔ no akɛ efeɔ amɛ ekome ni ákɛ esa akɛ amɛhi shi yɛ naa daa. Kɛ́ sɛɛ mli ni mɛi enyɔ lɛ tse gbãla mli yɛ mla naa po lɛ, yɛ Yehowa hiɛ lɛ, amɛkã he amɛji wu kɛ ŋa, ni yɛ Ŋmalɛ naa lɛ, amɛbɛ hegbɛ akɛ amɛkɛ mɔ kroko boteɔ gbalashihilɛ mli. Atsakeko nɔ ni Biblia lɛ tsɔɔ akɛ no pɛ nɔ adamɔɔ atseɔ gbãla mli lɛ.—Mat. 19:5, 6, 9.
4. (a) Mɛni hewɔ gbalashihilɛ mli hefatalɔi komɛi kpɛɔ amɛyiŋ ni amɛgbalaa amɛmli fioo lɛ? (b) Nifeemɔ ni tamɔ nakai baanyɛ ekɛ naagba aba gbalashihilɛ mli yɛ mɛɛ gbɛ nɔ? (d) Yɛ Hebribii 13:5 lɛ kɛ gbeekpamɔ naa lɛ, mɛni gbalashihilɛ mli hefatalɔi babaoo ekpɛ amɛyiŋ akɛ amɛbaafee?
4 Yɛ shihilɛi krokomɛi amli lɛ, gbalashihilɛ mli hefatalɔi komɛi nuɔ he akɛ ehe miihia ni wu lɛ loo ŋa lɛ afã gbɛ be fioo bɔni afee ni enyɔmɔwoo aya hiɛ aloo koni eyatsa ewolokasemɔ nɔ yɛ nikasemɔhe wulu ko. Bei komɛi lɛ, mligbalamɔ ni baa nɛɛ sɛɛ tsɛɔ fe bɔ ni akpaa gbɛ. Bei babaoo lɛ, enɛ kɛ naagba baa gbalashihilɛ lɛ mli, ni bei komɛi po lɛ, ekɛ gbalafitemɔ loo gbalamlitsemɔ baa. (1 Kor. 7:2, 5; 1 Tim. 6:9-10) Enɛ hewɔ lɛ, Kristofoi gbalashihilɛ mli hefatalɔi lɛ ateŋ mɛi babaoo haa nakai nibii lɛ ŋmɛɛɔ amɛ moŋ fe nɔ ni amɛkɛ amɛgbalashihilɛ ni amɛbuɔ lɛ krɔŋkrɔŋ lɛ aaawo oshara mli.—Heb. 13:5.
5. Kɛ́ akɛɛ awo gbalashihilɛ hiɛ “nyam” lɛ, te atsɔɔ tɛŋŋ?
5 Hebribii 13:4 lɛ kɛɔ akɛ: “Awo gbala hiɛ nyam yɛ nyɛ fɛɛ nyɛteŋ.” Hela wiemɔ ni atsɔɔ shishi akɛ “nyam” lɛ tsɔɔ nɔ ko ni jara wa ni abuɔ waa. Kɛji wɔbuɔ nɔ ko akɛ ejara wa lɛ, wɔbaa yi jogbaŋŋ bɔni afee ni ekaje wɔdɛŋ aloo nɔ ko miifite lɛ. Ani jeee nakai nɔŋŋ esa akɛ wɔbu gbalashihilɛ? Eba akɛ wɔteŋ mɔ fɛɛ mɔ baabu gbalashihilɛ akɛ eyɛ nyam—nɔ ko ni jara wa ní wɔbaabɔ mɔdɛŋ waa wɔbu he ni wɔbaa yi bɔni afee ni wɔkɛjie Mɔ ni to shishi ni ji Yehowa Nyɔŋmɔ yi.—Efe. 3:14-15.