Fó Mɛi Krokomɛi Anɔ̃ Mli—Kɛtsɔ Mlihilɛ Kpo ni Ooojie lɛ Nɔ
1 Beni yoo ko ni he tsɛ̃ɔ Odasefoi lɛ wieɔ klɛŋklɛŋ gbi ni ekɛ yoo ko ni ji Yehowa Odasefonyo lɛ kpe lɛ he lɛ, ekɛɛ akɛ: “Mikaiii nɔ tuuntu ni wɔwie he lɛ, shi mikaiɔ mlihilɛ kpo ni ejie etsɔɔ mi, kɛ bɔ ni ejie naanyobɔɔ kɛ heshibaa su kpo lɛ. Enɛ ha miná ehe miishɛɛ waa. Minyaa mikɛ lɛ naanyobɔɔ lɛ he kɛbashi ŋmɛnɛ.” Wiemɔi nɛɛ maa bɔ ni ehe hiaa akɛ wɔjie hedɔɔ kpo wɔtsɔɔ mɛi ni wɔshiɛɔ wɔhaa amɛ lɛ nɔ mi.—Fil. 2:4.
2 Suɔmɔ Mli Hi: Gbɛ kome ni wɔbaanyɛ wɔtsɔ nɔ wɔjie suɔmɔ kpo wɔtsɔɔ mɛi ji ní wɔmli ahi aha amɛ. (1 Kor. 13:4) Mɔ ni mli hi lɛ náa mɛi ahilɛkɛhamɔ he miishɛɛ waa, ni esumɔɔ akɛ efee nibii ni he baaba sɛɛnamɔ aha amɛ. Eji anɔkwale akɛ shiɛmɔ nitsumɔ lɛ diɛŋtsɛ hu ji mlihilɛ nifeemɔ. Shi jeee shiɛmɔ ni wɔshiɛɔ wɔhaa mɛi lɛ pɛ tsɔɔ akɛ wɔdɔɔ amɛhe. Gbɛ̀i fɛɛ ni wɔtsɔɔ nɔ wɔkɛ mɛi yeɔ—wɔnaanyobɔɔ su, wɔjeŋba kpakpai, bɔ ni wɔboɔ sane toi wɔhaa, nibii ni wɔwieɔ kɛ gbɛ nɔ ni wɔtsɔɔ wɔwieɔ, kɛ bɔ ni wɔfeɔ wɔhiɛ wɔhaa kɛ́ wɔkɛ shiatsɛ lɛ miiwie po—lɛ baatsɔɔ akɛ wɔdɔɔ mɛi ahe lɛɛlɛŋ.—Mat. 8:2, 3.
3 Suɔmɔ mli ni wɔjɛɔ wɔdɔɔ mɛi ahe lɛ baatsirɛ wɔ hu koni wɔfee nibii pɔtɛɛ komɛi kɛye wɔbua amɛ. Beni nyɛmi nuu ko ni ji gbɛgbalɔ lɛ shiɛɔ yɛ shĩa kɛ shĩa lɛ, yoomo okulafo ko shwie lɛ amrɔ nɔŋŋ beni eyɔse akɛ eji Odasefonyo lɛ. Ekɛɛ gbɛgbalɔ lɛ akɛ beni etswa eshinaa lɛ naa ŋmɛlɛ lɛ, no mli lɛ edamɔ atswere bibioo ko nɔ yɛ ekpata lɛ shi eebɔ mɔdɛŋ ni etsake kane ni yɔɔ jɛmɛ lɛ. Gbɛgbalɔ lɛ kɛɛ lɛ akɛ: “Eyɛ oshara akɛ okome too ooofee enɛ.” Eha gbɛgbalɔ lɛ ba shĩa lɛ mli. Etsake kane lɛ ni eshi etee. Sɛɛ mli beni yoomo lɛ binuu tee koni eyasara lɛ lɛ, yoomo lɛ bɔ lɛ nɔ ni tee nɔ lɛ. Ebinuu lɛ naa kpɛ ehe aahu akɛ eyatao nyɛmi nuu lɛ ni eda lɛ shi. Enɛ ha amɛgba sane ko ni yɔɔ miishɛɛ, ni no ha binuu nɛɛ kpɛlɛ koni akɛ lɛ akase Biblia lɛ.
4 Kɛ́ wɔmli hi lɛ, ehaa wɔjieɔ Yehowa suɔmɔ lɛ kpo wɔtsɔɔ mɛi, ni wɔkɛwulaa Maŋtsɛyeli shɛɛ sane lɛ. No hewɔ lɛ be fɛɛ be lɛ, nyɛhaa ‘wɔkɛ wɔhe atsɔɔ akɛ Nyɔŋmɔ sɔɔlɔi, yɛ mlihilɛ mli.’—2 Kor. 6:4, 6.