Sanebimɔ He

◼ Te esa akɛ wɔtsu asafoŋ nitsumɔi kɛ nifeemɔi ahe nii wɔha tɛŋŋ?

Bɔ ni Yehowa webii asafo ko yaa nɔ yɛ gbɛjianɔtoo kpakpa naa lɛ jɛɔ mɔdɛŋ ni mɛi fɛɛ bɔɔ lɛ mli. (1 Kor. 14:33, 40) Susumɔ nitsumɔi babaoo ni atsuɔ yɛ asafoŋ kpee kome pɛ mli lɛ he okwɛ. Kɛfata kpee lɛ diɛŋtsɛ he lɛ, nyɛmimɛi hii kɛ yei tsuɔ nitsumɔi srɔtoi babaoo kɛtsɔɔ kpee lɛ hiɛ, kɛ agbɛnɛ hu kɛ́ akpa. Nitsumɔi krokomɛi ni atsuɔ ni mɛi yɔseee lɛ hu he hiaa. Mɛɛ gbɛ nɔ wɔteŋ mɔ fɛɛ mɔ aaatsɔ afi gbɛjianɔtoo nɛɛ sɛɛ?

Okɛ ohe aha. Mɛi ni yɔɔ he tsui akɛ amɛaatsu nii lɛ baaná nitsumɔi babaoo amɛtsu. (Lala 110:3) Jiemɔ mɔ hesusumɔ kpo otsɔɔ helatsɛmɛi kɛ mɛi ni edara lɛ. Ye obua kɛsaa Maŋtsɛyeli Asa lɛ nɔ. Wɔbaanyɛ wɔtsu nitsumɔi babaoo ni he yɔɔ sɛɛnamɔ, ní wɔmɛŋ ni akɛɛ wɔ dani wɔtsu. Nɔ pɛ ni he hiaa ji ni wɔná shwelɛ akɛ wɔbaaye wɔbua.

Okɛ heshibaa asɔmɔ. Heshibalɔi náa he miishɛɛ akɛ amɛaasɔmɔ mɛi krokomɛi. (Luka 9:48) Heshibaa haŋ wɔloo nitsumɔi babaoo ni yɛ anɔkwale mli lɛ wɔnyɛŋ wɔtsu lɛ wɔshwie wɔnɔ. Kɛfata he lɛ, heshibaa haŋ wɔtsu nitsumɔi ni wɔbɛ hegbɛ akɛ wɔtsuɔ lɛ.—Abɛi 11:2.

Feemɔ ohe mɔ ni anyɛɔ akɛ he fɔɔ enɔ. Awo Mose hewalɛ koni ehala ‘hii anɔkwafoi’ ni amɛtsu sɔɔmɔ hegbɛi ahe nii yɛ blema Israel. (2 Mose 18:21) Su nɛɛ nɔŋŋ he miihia ŋmɛnɛ. Okɛ henɔkwɛmɔ atsu nitsumɔi fɛɛ ni akɛwoɔ odɛŋ lɛ he nii jogbaŋŋ. (Luka 16:10) Kɛ́ onyɛŋ obatsu nitsumɔ ko ni akɛwo odɛŋ lɛ he nii lɛ, kwɛmɔ ni oto gbɛjianɔ ni sa koni mɔ kroko atsu he nii aha bo.

Feemɔ nɔ ni fe fɛɛ ni ooonyɛ. Awoɔ Kristofoi hewalɛ koni amɛkɛ susuma muu fɛɛ atsu heloonaa nitsumɔ po. (Kol. 3:22-24) Yiŋtoo ni fe enɛ yɛ ni wɔbaanyɛ wɔdamɔ nɔ wɔkɛ susuma muu fɛɛ atsu nii kɛ́ wɔmiitsu nii ni wɔkɛha anɔkwa jamɔ aya nɔ. Kɛ́ nitsumɔ ko baa shi loo abuuu po lɛ, kɛ́ atsu lɛ jogbaŋŋ lɛ ehe baa sɛɛnamɔ kɛhaa asafo lɛ.

Nitsumɔ fɛɛ nitsumɔ haa wɔnáa hegbɛ koni wɔjie suɔmɔ ni wɔyɔɔ kɛha Yehowa kɛ wɔnyɛmimɛi lɛ kpo wɔtsɔɔ. (Mat. 22:37-39) Eba akɛ wɔkɛ anɔkwayeli aaatsu nitsumɔ fɛɛ nitsumɔ ni akɛwoɔ wɔdɛŋ lɛ he nii.