Ani Okɛ Wɔ Woji Tɛtrɛbii lɛ Miitsu Nii Jogbaŋŋ?

¹ Amɛyɛ srɔto! Nakai ji bɔ ni wɔbaanyɛ wɔtsɔɔ Buu-Mɔɔ lɛ kɛ Awake! woji tɛtrɛbii lɛ mli wɔha. Amrɔ nɛɛ akalaa woji tɛtrɛbii akpei ohai abɔ yɛ jeŋ fɛɛ, shi amɛteŋ enyɔ pɛ−Buu-Mɔɔ lɛ kɛ Awake!−tsɔɔ gbɛ ni kɛ mɔ yaa naanɔ wala mli. Nibii ni yɔɔ woji tɛtrɛbii enyɔ nɛɛ amli ji saji ni atao mli jogbaŋŋ ni shɛjeɔ mɔ mii, ni woɔ mɔ hewalɛ, ni kɛ saji ni kɛ ŋaawoo ni yeɔ ebuaa haa mɛi ni daa gbi nɔnyɛɛi kɛ naagbai haoɔ amɛ lɛ. Nuu ko ŋma akɛ: “Nyɛwoji tɛtrɛbii lɛ akanemɔ ji niiashikpamɔ ko ni yɔɔ miishɛɛ diɛŋtsɛ. Amɛjeee ‘miishɛjelɔi’ ni jara waaa ni sɛɛnamɔ bɛ he, shi moŋ nibii ni yɔɔ mli ji kudɔmɔ kɛ gbɛtsɔɔmɔ yɛ bɔ ni aaafee ni aha shihilɛ afee nɔ ni shishinumɔ yɔɔ mli lɛ mli.” Ani ojieɔ hiɛsɔɔ ni tamɔ nakai nɔŋŋ kpo yɛ wɔ woji tɛtrɛbii lɛ ahe?

² Buu-Mɔɔ lɛ kɛ Awake! lɛ kɛhamɔ ji gbɛ̀i titrii ni atsɔɔ nɔ agbɛɔ Maŋtsɛyeli shɛɛ sane lɛ ashwãa hei srɔtoi fɛɛ lɛ ateŋ ekome. (Mat. 24:14) Eyɛ mli akɛ enɛ ji anɔkwale moŋ, shi ayɔse akɛ woji tɛtrɛbii lɛ kɛhamɔ eyaaa hiɛ kwraa yɛ Ghana hei komɛi. Kɛ́ woji tɛtrɛbii ni okɛhaa lɛ falɛ miiba shi lɛ, te ooofee tɛŋŋ otsu tsakemɔ ni eba nɛɛ he nii? Mɛni ji nibii komɛi ni he hiaa ni wɔbaanyɛ wɔha ehi wɔjwɛŋmɔ mli ni baaye abua wɔ aŋkroaŋkro koni wɔnyɛ wɔkɛ woji tɛtrɛbii lɛ babaoo aha?

³ Ohiɛ Asɔ Sɛɛnamɔ ni Yɔɔ He Lɛ: Nɔ kome ni he hiaa ji ni wɔha hiɛsɔɔ ni wɔ diɛŋtsɛ wɔyɔɔ kɛha wɔ woji tɛtrɛbii lɛ amli saji lɛ aya hiɛ. Jeee akɛ woji tɛtrɛbii lɛ ni bo diɛŋtsɛ obaakane daa lɛ he baaba sɛɛnamɔ kɛha bo yɛ mumɔŋ pɛ kɛkɛ, shi moŋ ebaakanya ekãa ni okɛaatsu nii koni okɛha mɛi krokomɛi lɛ hu.

⁴ Taomɔ saji otii ni kɔɔ naagbai ni yaa nɔ amrɔ nɛɛ yɛ nyɛ akutso lɛ mli lɛ ahe. Ha ohiɛ ahi saji ní hii, yei, kɛ oblahii kɛ oblayei ni okɛaakpe yɛ shinaai anaa loo gbɛjegbɛi anɔ lɛ baaná he miishɛɛ lɛ anɔ. Saamɔ ohe ni otsɔɔ bɔ ni woji tɛtrɛbii lɛ kɔɔ aŋkroaŋkroi kɛ wekui ahe ehaa. Kɛ́ ohiɛ sɔɔ bɔ ni amɛhe yɔɔ sɛɛnamɔ waa lɛ jogbaŋŋ lɛ, obaasumɔ ni okɛha mɛi krokomɛi!

⁵ Ha Ohiɛ Ahi Woji Tɛtrɛbii Kɛhamɔ He: Esa akɛ woji tɛtrɛbii ni okɛaaha mɛi ni yɔɔ wiemɔ lɛ he miishɛɛ lɛ afee oshiɛmɔyaa gbɛjianɔtoo lɛ fã ko ni he hiaa. Mɛɛ bei hi jogbaŋŋ akɛ okɛ woji tɛtrɛbii lɛ aaaha? Ani oka ekɛ nitsumɔ yɛ shia kɛ shia ŋmɛlɛtswaa kome loo nɔ̃ beni hulu heɔ anyɔ shi loo yɛ gbɛkɛnaashi dani be kɛha nyɛ Asafo Woloŋ Nikasemɔ lɛ aaashɛ lɛ okwɛ? Mɛi komɛi jaa woji tɛtrɛbii lɛ leebi mra. Mɛi krokomɛi ena akɛ gbɛkɛnaashi odaseyeli ji be ni sa jogbaŋŋ kɛha woji tɛtrɛbii lɛ ajaa. Hɔɔ ji gbi ni sa kɛha woji tɛtrɛbii lɛ ajaa yɛ gbɛ̀i srɔtoi anɔ, shi abaanyɛ akɛ gbii krokomɛi hu atsu enɛ he nii. Esa akɛ shiɛmɔ yɛ shia kɛ shia, mɛi lɛ aŋɔɔ ni wɔyaa yɛ nitsumɔhei, kɛ odaseyeli yɛ gbɛjegbɛi lɛ anɔ lɛ fɛɛ afee gbɛ̀i ni wɔɔtsɔ nɔ daa wɔkɛ woji tɛtrɛbii babaoo aha.

⁶ Ná Jwɛŋmɔ Kpakpa yɛ Gbɛ ni Otsɔɔ Nɔ Okɛhaa lɛ He: Okɛ miishɛɛ awie beni okɛ woji tɛtrɛbii lɛ haa lɛ. Shɛ́ tsui lɛ he. Feemɔ tswãa kɛtsɔ shiɛmɔ wiemɔi ní fe ekome ni okɛaasaa ohe lɛ nɔ. Kɛkɛ lɛ, beni okɛ shihilɛi srɔtoi kpeɔ lɛ, obaanyɛ okɛ gbɔmɛi srɔtoi fɛɛ awie ní oha oshiɛmɔ wiemɔ lɛ akɔ nibii ni amɛnyaa he lɛ ahe. (1 Pet. 3:15) Bei pii lɛ wɔhe ni wɔsaa kɛtsɔɔ hiɛ nɛɛ kɛ omanyeyeli babaoo baa beni wɔkɛ woji tɛtrɛbii lɛ haa lɛ.

⁷ Ná jwɛŋmɔ kpakpa kɛtsɔ woji tɛtrɛbii lɛ ni oooha eko ahi ohe yɛ he fɛɛ he ni oyaa lɛ nɔ. Okɛha beni oyeɔ jara, beni ota maŋ tsɔne mli, beni omɛɔ kɛha nɔ ko tsumɔ loo yɛ bei krokomɛi ni sa mli yɛ wɔdaa gbi shihilɛ mli. Eyɛ mli akɛ afɔɔ woji tɛtrɛbii lɛ kɛhamɔ yɛ be mli ni agba Biblia mli sane ko kuku sɛɛ moŋ, shi abaanyɛ akɛ ememeji lɛ aha Biblia mli nikaselɔi, nanemɛi nitsulɔi, nanemɛi skulbii, wekumɛi, yɛ helatsamɔhei, nitsumɔhei, kɛ hei krokomɛi ni aŋmɛɔ gbɛ yɛ. Abaanyɛ abu woji tɛtrɛbii fɛɛ ni tamɔ nɛkɛ lɛ akɛ nɔ ni akɛha, ni esa akɛ abu he akɔntaa daa nyɔŋ nɔ yɛ shiɛmɔyaa he akɔntaabuu wolo lɛ nɔ.

⁸ Esa akɛ shiɛlɔ fɛɛ shiɛlɔ aná woji tɛtrɛbii srɔtoi ni baa lɛ eko fɛɛ eko yibɔ pɔtɛɛ ko. Onukpai lɛ akwɛ koni woji tɛtrɛbii ni asafo lɛ nine shɛɔ nɔ lɛ afa bɔ ni sa, jeee kɛha asafo lɛ diɛŋtsɛ hiamɔ nii pɛ kɛkɛ, shi kɛha nɔ ni akɛbaatsu nii yɛ shiɛmɔ nitsumɔ lɛ mli lɛ hu.

⁹ Okɛ oti ko ama ohiɛ kɛha woji tɛtrɛbii kɛhamɔ yɛ daa nyɔŋ nɔ. Esa akɛ oti ni okɛma ohiɛ lɛ afee nɔ ni obaanyɛ he nii otsu ni damɔ shihilɛ mli ni oyɔɔ kɛ bei ni onyɛɔ oyeɔ yɛ shiɛmɔ nitsumɔ lɛ mli lɛ hesusumɔ nɔ.

¹⁰ Ani Obaanyɛ Okɛ Woji Tɛtrɛbii Babaoo Aha? Mɛi babaoo ni hiɛ tsui ni ja yɛ ŋmɛnɛ ni amɛmiitao anɔkwale lɛ. Saji ni yɔɔ woji tɛtrɛbii lɛ ateŋ ekome mli lɛ baanyɛ afee nɔ ni he hiaa kɛkɛ koni ekɛ amɛ aya anɔkwale lɛ he! Yehowa kɛ shɛɛ sane ko ni yɔɔ miishɛɛ eha wɔ koni wɔjaje, ni wɔ woji tɛtrɛbii lɛ tsuɔ gbɛfaŋnɔ ko ni he hiaa yɛ shɛɛ sane ní wɔkɛhaa mɛi krokomɛi lɛ mli. Ani ohiɛ baahi ohe nɔ waa yɛ wɔ woji tɛtrɛbii lɛ kɛ nitsumɔ jogbaŋŋ nɔ yɛ be ni kã wɔhiɛ lɛ mli? Kɛ ofee nakai lɛ, jeee akɛ okɛ woji tɛtrɛbii babaoo baaha kɛkɛ, shi Yehowa baajɔɔ bo babaoo.—Abɛi 28:20a.