Hiɛsɔɔ ni Aaaná Aha Nyɔŋmɔ Mɔbɔnalɛ Lɛ
1 Dani bɔfo Paulo aaabatsɔ Kristofonyo lɛ, no mli lɛ ekɛ yiwalɛ ni naa wa teɔ shi ewoɔ Kristojamɔ lɛ gbɛɛ-kɛ-shwãmɔ. Shi kɛlɛ, akɛni efee enɛ yɛ nɔ ko ni eleee yɛ he hewɔ lɛ, ana lɛ mɔbɔ. Yehowa jie mlihilɛ ni esaaa kpo, ni aha Paulo nitsumɔ koni eshiɛ. Ebu nakai nitsumɔ lɛ akɛ nɔ ko ni jara wa. (Bɔf. 26:9-18; 1 Tim. 1:12-14) Hiɛsɔɔ ni aaaná aha Yehowa mɔbɔnalɛ lɛ tsirɛ Paulo ni ekɛ lɛ diɛŋtsɛ ehe shã afɔle kɛha esɔɔmɔ lɛ he nitsumɔ.—2 Kor. 12:15.
2 Yɛ Nyɔŋmɔ mɔbɔnalɛ naa lɛ, wɔ hu akɛ sɔɔmɔ ko ewo wɔdɛŋ. (2 Kor. 4:1) Taakɛ Paulo ji lɛ, wɔbaanyɛ wɔjie wɔ hiɛsɔɔ kpo yɛ mɔbɔnalɛ ni ajie lɛ kpo atsɔɔ wɔ lɛ he, kɛtsɔ mɔdɛŋ ni wɔbaabɔ waa koni wɔye wɔbua mɛi krokomɛi ni amɛya amɛhiɛ yɛ mumɔŋ lɛ nɔ. Gbɛ kome ni wɔɔtsɔ nɔ wɔfee enɛ ji kɛtsɔ Biblia mli nikasemɔi ni wɔɔje shishi ni wɔtsa nɔ wɔfee lɛ nɔ.
3 Biblia Mli Nikasemɔi ni Ajeɔ Shishi: Gbɛ ni atsɔɔ nɔ ajeɔ Biblia mli nikasemɔi ashishi ji kɛtsɔ mɛi ni aaaná ni akɛ woji tɛtrɛbii lɛ aaaha amɛ daa lɛ nɔ. Yɛ be mli ni wɔyasaraa mɛi ni wɔkɛ woji tɛtrɛbii lɛ haa amɛ be fɛɛ be lɛ, ehaa wɔbaleɔ nibii ni he hiaa amɛ lɛ jogbaŋŋ. Beni be shwieɔ mli lɛ, sane ko ni yɔɔ woji tɛtrɛbii lɛ eko mli lɛ baanyɛ afee nɔ ni obaatsɔ nɔ okɛ lɛ aje Biblia mli nikasemɔ shishi yɛ Taoɔ wolo bibioo lɛ mli. Obaanyɛ otsa sanegbaai lɛ anɔ yɛ Taoɔ wolo bibioo lɛ mli yɛ saramɔi krokomɛi ni baanyiɛ sɛɛ lɛ mli yɛ be mli ni okɛ woji tɛtrɛbii haa shiatsɛ lɛ.
4 Mɔdɛŋbɔɔ kɛ Sɔlemɔ He Miihia: Sɔlemɔ ni mɔdɛŋbɔɔ diɛŋtsɛ fata he baaha wɔshiɛmɔ nitsumɔ lɛ amɔ shi. Nyɛmi yoo gbɛgbalɔ ko ni yɔɔ Biblia mli nikaselɔ kome lɛ sɔle koni Yehowa ajɔɔ lɛ ni ená babaoo. Lɛ hu etsu nɔ ni esɔleɔ ebiɔ lɛ he nii. Esusu esɔɔmɔ nitsumɔ lɛ he waa, ni eyoo akɛ, ekɛ mɛi egbaaa Biblia mli nikasemɔ ni yɔɔ lɛ he sane beni efeɔ sɛɛsaramɔi lɛ. Eje nakai feemɔ shishi, ni etsɛɛɛ ni ená nikasemɔi enyɔ efata he.
5 Kwɛ hegbɛ ni wɔná akɛ wɔɔná “Nyɔŋmɔ duromɔ sanekpakpa lɛ” mli gbɛfaŋnɔ ni wɔha ale enɛ! (Bɔf. 20:24) Eba akɛ hiɛsɔɔ ni wɔɔná wɔha Nyɔŋmɔ mɔbɔnalɛ lɛ aaatsirɛ wɔ koni wɔkɛ mɔdɛŋbɔɔ aye abua mɛi krokomɛi ni Yehowa duromɔ lɛ he aba sɛɛnamɔ kɛha amɛ.