Shiɛmɔyaa He Akɔntaabuu ni Kpeɔ Sɛɛ—Ani Eji Onaagba?
1 Yɛ nɛkɛ naagbee gbii nɛɛ amli naagbai lɛ fɛɛ sɛɛ lɛ, ale shiɛlɔi babaoo akɛ mɛi ni kɛ amɛshiɛmɔyaa he akɔntaabuu haa yɛ be naa yɛ nyɔŋ fɛɛ nyɔŋ naagbee. Nɛkɛ mɛi nɛɛ sa yijiemɔ. Shi kɛlɛ, wɔteaŋ mɛi aaashɛ 4,000 kɛ shiɛmɔyaa he akɔntaabuu ni ekpe sɛɛ haa daa nyɔŋ. Ani oji mɔ ko ni bɔɔ mɔdɛŋ jogbaŋŋ akɛ okɛ oshiɛmɔyaa he akɔntaabuu baaha yɛ be naa daa nyɔŋ nɔ?
2 Bɔfoi lɛ Anɔkwɛmɔnɔ: Mra be mli Yesu Kristo sɛɛnyiɛlɔi lɛ ná shiɛmɔ nitsumɔ lɛ mli nɔyaai lɛ ahe amaniɛbɔi ahe miishɛɛ. (Mar. 6:30) Beni nitsumɔ lɛ shwereɔ lɛ, abuaa akɔntaabui ahe amaniɛbɔi kɛ niiashikpamɔi ni sa kadimɔ lɛ anaa. (Bɔf. 1:15; 2:41; 6:7; 4:4) Mɛɛ ekãawoo ni nɔ bɛ nɛkɛ amaniɛbɔɔ nɛɛ ji kɛha klɛŋklɛŋ afii 100 lɛ mli Kristofoi lɛ nɛkɛ!
3 Mɛni Hewɔ Esa akɛ Abu Shiɛmɔyaa He Akɔntaa yɛ Be Naa Lɛ? Shiɛmɔyaa he akɔntaabuu ni wɔkɛaaha yɛ be naa lɛ tsuɔ yiŋtoo krɛdɛɛ ko he nii. Nɛkɛ yibɔi nɛɛ yeɔ ebuaa asafoŋ onukpai lɛ, nitsumɔhe nine lɛ, kɛ gbɛjianɔtoo muu lɛ fɛɛ hu bɔni afee ni anyɛ ana jeŋ muu fɛɛ nitsumɔ lɛ hiɛyaa. Amɛtsɔɔ he ni wɔmiibɔ mɔdɛŋ yɛ kɛ he ni wɔbaanyɛ wɔya hiɛ yɛ. Bɔni afee ni anyɛ atsu enɛ he nii lɛ, ehe miihia ni wɔkɛ wɔshiɛmɔyaa he akɔntaabui aha yɛ be naa!
4 Mɛni Abaanyɛ Afee? Esa akɛ asafo woloŋ nikasemɔ nɔkwɛlɔ lɛ abɔ mɔdɛŋ waa koni eha woloŋmalɔ lɛ nine ashɛ akɔntaabui lɛ fɛɛ nɔ kɛji nyɔŋ lɛ gbo sɛɛ nɔŋŋ. Abaanyɛ akɛ akɔntaabuu he kaimɔ aha yɛ naagbee woloŋ nikasemɔ lɛ shishi daa nyɔŋ. Esa akɛ woloŋmalɔ lɛ abua akɔntaabui lɛ anaa yɛ be naa bɔni afee ni anyɛ ayabi akɔntaabui fɛɛ ni nine shɛko nɔ lɛ shi, ní ekɛfata akɔntaabuu ni afee lɛ ekome ni akɛmajeɔ nitsumɔhe nine lɛ he dani nyɔŋ ni nyiɛ sɛɛ lɛ gbi ni ji 6 lɛ aho. Enɛ hewɔ lɛ, kɛji akɛ shiɛlɔi fɛɛ ha amɛshiɛmɔyaa he akɔntaabui lɛ shɛ woloŋmalɔ lɛ dɛŋ mra, ni ebua nɛkɛ shiɛmɔyaa he akɔntaabui nɛɛ anaa amrɔ nɔŋŋ lɛ, no lɛ wɔbaaná akɔntaabui ni ja jogbaŋŋ kɛmɔ shi daa nyɔŋ nɔ.
5 Su ni Esa akɛ Wɔná: Ehe miihia ni shiɛlɔi fɛɛ akɛ aŋkroaŋkro lɛ ayɔse sɔ̃ ni kã amɛnɔ akɛ amɛkɛ amɛshiɛmɔyaa he akɔntaabuu aaaha daa nyɔŋ yɛ be naa lɛ. (Luka 9:10a) Kɛji wɔná su ni ji wɔshiɛmɔyaa he akɔntaa ni wɔɔbu yɛ be naa lɛ, no lɛ wɔshiɛmɔ nitsumɔ he akɔntaabui lɛ baafee nɔ ni ja jogbaŋŋ. Nyɛhaa wɔ fɛɛ wɔtsɔa nɛkɛ gbɛ nɔ koni wɔtsɔɔ akɛ wɔbaa wɔhe shi wɔhaa gbɛjianɔ ni Yehowa asafo lɛ eto lɛ.—Mat. 24:45-47.