Atuu Sanekpakpa lɛ Awo Wɔdɛŋ
1 Kwɛ bɔ ni eji woo akɛ atuu Nyɔŋmɔ sanekpakpa lɛ awo wɔdɛŋ! (1 Tes. 2:4) Yɛ be mli ni ekolɛ mɛi komɛi baakpoo nɛkɛ shɛɛ sane ni yɔɔ hewalɛ nɛɛ lɛ, egbalaa mɛi ni hiɛ tsui kpakpa lɛ tamɔ nɔ ko ni jeɔ ŋma waa. (2 Kor. 2:14-16) Kɛha mɛi ni kpɛlɛɔ sanekpakpa lɛ nɔ, ní amɛkɛtsuɔ nii lɛ, etsɔɔ yiwalaheremɔ. (Rom. 1:16) Te esa akɛ wɔtsu sanekpakpa lɛ ni atuu awo wɔdɛŋ lɛ he nii wɔha tɛŋŋ?
2 Yesu kɛ Bɔfoi Lɛ: Yesu kɛ sanekpakpa lɛ jajemɔ ye klɛŋklɛŋ gbɛhe. (Luka 4:18, 43) Beni etɔ lɛ ni hɔmɔ yeɔ lɛ po lɛ, bɔ ni eyɔɔ suɔmɔ kɛha gbɔmɛi kɛ bulɛ ni eyɔɔ kɛha shɛɛ sane lɛ kanya lɛ ni egba he sane etsɔɔ mɛi krokomɛi. (Mar. 6:30-34) Etsɔ wiemɔ kɛ nifeemɔ nɔ eha bɔ ni Maŋtsɛyeli shiɛmɔ nitsumɔ lɛ he hiaa ha lɛ ka ekaselɔi lɛ ajwɛŋmɔ mli.—Mat. 28:18-20; Mar. 13:10.
3 Yɛ Yesu kasemɔ mli lɛ, bɔfoi lɛ kɛ ekãa jaje Maŋtsɛyeli shɛɛ sane lɛ. Beni ayi amɛ ni afã amɛ ni amɛkpa shiɛmɔ lɛ po lɛ, ‘amɛfɔ̃ɔɔ nitsɔɔmɔ kɛ sanekpakpa lɛ shiɛmɔ.’ (Bɔf. 5:40-42) Bɔfo Paulo kɛ ekãa tsu nɛkɛ nitsumɔ nɛɛ. (1 Kor. 15:9, 10; Kol. 1:29) Ekɛ hegbɛ ni ená akɛ egba sanekpakpa lɛ he sane etsɔɔ lɛ to nyɔmɔ ní ehiɛ enaanyo ko lɛ he, ni ejɛ esuɔmɔ mli eŋmɛɛ nibii ni baaha ená hejɔlɛ lɛ he bɔni afee ni enyɛ etsu he nii.—Bɔf. 20:24; Rom. 1:14-16.
4 Hegbɛ ni Wɔná Ŋmɛnɛ: Hiɛsɔɔ ni wɔyɔɔ yɛ nitsumɔ ni yɔɔ krɔŋkrɔŋ ni atuu awo wɔdɛŋ lɛ he lɛ baakanya wɔ ni wɔtao gbɛ̀i ni wɔɔtsɔ nɔ wɔlɛɛ gbɛfaŋnɔ ni wɔnáa yɛ shiɛmɔ nitsumɔ lɛ mli lɛ mli. (Rom. 15:16) Edward, ní taa helatsɛmɛi ashwiili mli lɛ, taa gbɔiatoohe ko agbó lɛ naa ni ekɛ gbɔi ni baa jɛmɛ lɛ gbaa ehemɔkɛyeli lɛ he sane. Ni kɛlɛ, akɛni eesumɔ ni etsu babaoo hewɔ lɛ, eha akpɛ tsũ krɛdɛɛ ko ama lɔle ko sɛɛ aha lɛ, ni ekɛ lɔle nɛɛ tsu gbɛgbamɔ nitsumɔ lɛ afii pii, ni efãa gbɛ kilomitai akpei abɔ yɛ enɛ feemɔ mli. Taakɛ Edward ji lɛ, mɛi babaoo ni yɔɔ ŋmɛnɛ lɛ efee tsakemɔi yɛ amɛshihilɛi amli bɔni afee ni amɛná sanekpakpa lɛ gbɛɛ-kɛ-shwãmɔ mli gbɛfaŋnɔ waa.
5 Yɛ Yesu kɛ bɔfoi lɛ akasemɔ mli lɛ, eba akɛ wɔ ni ji mɛi ni wɔyɔɔ ŋmɛnɛ lɛ kɛ shiɛmɔ nitsumɔ lɛ baaye klɛŋklɛŋ gbɛhe yɛ wɔshihilɛ mli be fɛɛ be. Kɛtsɔ nakai feemɔ nɔ lɛ, wɔjieɔ suɔmɔ ni wɔyɔɔ kɛha gbɔmɛi lɛ kpo kɛ hiɛsɔɔ hu ni wɔyɔɔ kɛha sanekpakpa lɛ ni atuu awo wɔdɛŋ lɛ kpo.