Yehowa Sa Yijiemɔ Babaoo Abaaye Nuŋtsɔ lɛ Gbɛkɛnaashi Niyenii lɛ yɛ April 16
Gbɛkpamɔi amli waa yɛ be mli ni wɔbɛŋkɛɔ April 16, 2003 lɛ
1Wɔbaafata nanemɛi jálɔi akpekpei abɔ ni yɔɔ jeŋ fɛɛ lɛ ahe yɛ nakai gbɛkɛ lɛ nɔ kɛye Yesu gbele lɛ he kaimɔ, ní wɔkɛwo Yehowa gbɛi lɛ hiɛ nyam. Yehowa sa wɔyijiemɔ yɛ kpɔmɔnɔ he gbɛjianɔ fɛfɛo ni eto kɛha wɔ lɛ hewɔ. Kɛtsɔ no nɔ lɛ, ekɛ jɔɔmɔi ni yɔɔ naakpɛɛ baajɔɔ adesai fɛɛ ni feɔ toiboo lɛ. Wɔjɛɔ wɔtsui mli fɛɛ wɔfataa lalatsɛ lɛ he kɛbolɔɔ akɛ: “Yehowa da ni esa yijiemɔ babaoo.”—Lala 145:3.
2 Be ni wɔkɛaajwɛŋ Nyɔŋmɔ ekpakpafeemɔ lɛ nɔ kɛ be ni wɔkɛaajwɛŋ hiɛsɔɔ ni wɔɔjie lɛ kpo wɔtsɔɔ Yehowa lɛ he nyɔmɔ ni wɔhiɛ lɛ lɛ nɔ yɛ “ebi koome” ni etsu lɛ “kɛba je lɛŋ, koni wɔtsɔ enɔ wɔná wala” lɛ hewɔ lɛ nɛ. (1 Yoh. 4:9, 10) Toiboo mli ni wɔɔjɛ koni wɔye Nuŋtsɔ lɛ Gbɛkɛnaashi Niyenii lɛ maa nɔ mi yɛ wɔtsuiaŋ akɛ: “Durolɔ kɛ mɔbɔnalɔ ji Yehowa . . . ni emɔbɔnalɛ fa.” (Lala 145:8) Yɛ anɔkwale mli lɛ, kpɔmɔnɔ lɛ ji Yehowa suɔmɔ kpojiemɔ ni fe fɛɛ kɛha adesai fɛɛ. (Yoh. 3:16) Kɛ́ wɔjwɛŋ Nyɔŋmɔ suɔmɔ lɛ nɔ, ni wɔsusu Yesu emuuyeli mlihiɛmɔ shihilɛ gbɛ yɛ anɔkwayeli mli lɛ he lɛ, etsirɛɔ wɔ koni wɔjie Yehowa yi. Wɔbaajie eyi kɛya naanɔi anaanɔ yɛ suɔmɔ ni bɛ naagbee lɛ kpo ni ejie etsɔɔ wɔ yɛ bɔ ni eto gbɛjianɔ eha koni wɔnine anyɛ ashɛ naanɔ wala nɔ lɛ hewɔ.—Lala 145:1, 2.
3 Ye Obua Mɛi Krokomɛi Koni Amɛjie Yehowa Yi: Hiɛsɔɔ kɛha Nyɔŋmɔ nikeenii ni fe fɛɛ ni ji kpɔmɔnɔ lɛ tsirɛɔ wɔ koni wɔfɔ̃ mɛi krokomɛi anine ni amɛbafata wɔhe kɛjie Yehowa yi. Akɛ mumɔ tsirɛ lalatsɛ lɛ ni eŋma akɛ: “Amɛaawie omlihilɛ kpeteŋkpele lɛ kaimɔ lɛ he, amɛaalá ojalɛ lɛ he lala.” (Lala 145:7) Yehowa Odasefoi ni yɔɔ jeŋ fɛɛ lɛ tuu ŋmɛlɛtswai ni fa fe akpekpei toi akpe kome amɛwo shiɛmɔ nitsumɔ lɛ mli yɛ nyɛsɛɛ afi lɛ pɛ mli. Mɛni jɛ amɛ mɔdɛŋbɔi lɛ amli ba? Kɛ́ aja mli lɛ, daa otsi lɛ abaptisiɔ aŋkroaŋkroi ni fa fe 5,100 kɛfeɔ amɛhenɔjɔɔmɔ kɛha Yehowa lɛ he okadi. Yɛ mɛi ni ba Kaimɔ lɛ ayifalɛ fɛɛ ni ji akpekpei 15,597,746 ní amɛteŋ mɛi ni fa fe akpekpei 9 ejeko shishi lolo ákɛ amɛaajie Yehowa yi akɛ sanekpakpa shiɛlɔi lɛ agbɛfaŋ lɛ, wɔnaa akɛ hegbɛ kpele diɛŋtsɛ yɛ kɛha shweremɔ lolo! Ákɛ Maŋtsɛyeli jajelɔi lɛ, wɔhiɛ sɔɔ hegbɛ ni wɔná akɛ wɔɔjaje sanekpakpa lɛ ni wɔtsɔ mɛi krokomɛi atsuii kɛya Yehowa, e-Bi lɛ, kɛ Maŋtsɛyeli lɛ he lɛ waa.
4 Gbɛ ni hi jogbaŋŋ ni wɔɔtsɔ nɔ wɔwo mɛi krokomɛi hewalɛ koni amɛwo Yehowa hiɛ nyam ji kɛtsɔ nine ni wɔɔfɔ̃ amɛ lɛ nɔ koni amɛbafata wɔhe kɛye Nuŋtsɔ lɛ Gbɛkɛnaashi Niyenii lɛ. Ani oŋmala mɛi fɛɛ ni osumɔɔ akɛ ofɔ̃ amɛ nine kɛ mɛi krokomɛi hu ni ehe baahia ni okai amɛ gbi lɛ kɛ be lɛ agbɛi oshwie shi? Ani ofɔ̃ mɛi fɛɛ ni oŋmala amɛgbɛi lɛ anine? Kɛ ofeko nakai lɛ, okɛ be ni eshwɛ lɛ atsu nii kɛ hiɛdɔɔ ni okɛfɔ̃ amɛ nine. Ye obua amɛ koni amɛnu yiŋtoo ni yɔɔ gbijurɔyeli lɛ sɛɛ lɛ shishi. Saamɔ ohe ni oŋa gbɔi yɛ gbijurɔyeli lɛ shishi. Ha amɛhiɛ amɛ̃, okɛ amɛ atsɔɔ mɛi krokomɛi, ni ojie amɛyi yɛ ba ni amɛba lɛ hewɔ.
5 Kaimɔ lɛ ni wɔbaaya lɛ baanyɛ akanya mɛi heei lɛ koni amɛya amɛhiɛ yɛ mumɔŋ. Biblia nikaselɔ ko ní na amanehulu yɛ nɔnyɛɛ ni baa yɛ oshara sɛɛ lɛ mli, ni ji hela ko ni haa ewaa kɛhaa lɛ akɛ eeeya hei ni mɛi babaoo naa ebakpe shi yɛ lɛ ba Kaimɔ lɛ. Beni abi lɛ nɔ ni esusuɔ yɛ kpee lɛ he lɛ, ewie akɛ: “Eji gbi gbɛkɛ krɛdɛɛ ko ni bulɛ yɔɔ he, ni miyɛ jɛi.” Kɛjɛ nakai beaŋ kɛbaa nɛɛ, ebɔi kpeeiyaa.
6 Yɛ Kaimɔ lɛ Sɛɛ: Mɛni abaanyɛ afee ni akɛye abua nɛkɛ mɛi ni yɔɔ wiemɔ lɛ he miishɛɛ nɛɛ koni amɛbatsɔmɔ Yehowa yijielɔi? Onukpai lɛ baagbala amɛjwɛŋmɔ kɛba mɛi heei ni baaba Kaimɔ lɛ anɔ, ni amɛto gbɛjianɔ koni shiɛlɔi ni he esa ayasara amɛ yɛ Kaimɔ lɛ sɛɛ nɔŋŋ koni amɛkɛ amɛ atĩ nibii ni yɔɔ miishɛɛ ni amɛkase ni amɛna lɛ mli. Amɛteŋ mɛi komɛi baasumɔ ni akɛ amɛ afee shia Biblia mli nikasemɔ. Esa akɛ afɔ̃ amɛ nine hu kɛha asafoŋ kpeei fɛɛ ni afeɔ daa otsi lɛ, akɛni kpeeiyaa daa baanyɛ aha amɛ Biblia mli nilee lɛ aya hiɛ lɛ hewɔ.
7 Aato gbɛjianɔ koni awo mɛi fɛɛ ni kɛ amɛhe wooo shiɛmɔyaa mli yɛ nyɔji komɛi amli kɛ mɛi fɛɛ ni ekpa shiɛmɔyaa lɛ hewalɛ koni amɛya kpeei daa. Kɛji onukpai lɛ bi bo koni oye obua mɔ ko ni ekpa shiɛmɔyaa koni ekɛ ehe awo shiɛmɔ nitsumɔ lɛ mli ekoŋŋ lɛ, jɛɛ osuɔmɔ mli ni okpɛlɛ nɔ. Mɔ hesusumɔ yɛ suɔmɔ mli ni tamɔ nɛkɛ ni wɔɔjie lɛ kpo wɔtsɔɔ wɔnyɛmimɛi lɛ kɛ ŋaawoo ni bɔfo Paulo kɛha lɛ kpãa gbee akɛ: “Akɛ nɔ ni wɔyɔɔ dekã hewɔ lɛ, nyɛhaa wɔfea mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.”—Gal. 6:10.
8 Eba akɛ wɔ fɛɛ wɔɔbɔ mɔdɛŋ jogbaŋŋ koni wɔhi Kaimɔ lɛ shishi yɛ April 16. Wɔsumɔŋ ni nɛkɛ nifeemɔ ni yɔɔ krɔŋkrɔŋ fe fɛɛ ni wɔkɛaajie Yehowa yi nɛɛ aŋmɛɛ wɔ. Hɛɛ, nyɛhaa wɔjiea Yehowa yi yɛ enitsumɔi wuji lɛ ahewɔ bianɛ kɛ agbɛnɛ kɛmiiya naanɔ!—Lala 145:21.