Wɔ Hemɔkɛyeli Tsirɛɔ Wɔ ni Wɔtsuɔ Nitsumɔi Kpakpai
1 Hemɔkɛyeli ha Noa, Mose, kɛ Rahab fee nii. Noa kpɛ adeka. Mose kpoo be kukuoo mli sɛɛnamɔi ni eeená yɛ Farao shia lɛ. Rahab kɛ shikpálɔi lɛ to ni ebo gbɛtsɔɔmɔi ni amɛkɛ ha lɛ toi, ni no here eshiabii lɛ ayiwala. (Heb. 11:7, 24-26, 31) Mɛɛ nitsumɔi kpakpai wɔhemɔkɛyeli lɛ tsirɛɔ wɔ ni wɔtsuɔ ŋmɛnɛ?
2 Odaseyeli: Hemɔkɛyeli tsirɛɔ wɔ ni wɔwieɔ wɔ-Nyɔŋmɔ ni he yɔɔ naakpɛɛ lɛ, kɛ gbɛjianɔ ni eto kɛha naanɔ miishɛɛ lɛ he sane. (2 Kor. 4:13) Bei komɛi lɛ, wɔbaashashao shi akɛ wɔɔye odase. Shi kɛ́ wɔkɛ ‘Yehowa to wɔhiɛ daa’ lɛ, ewajeɔ wɔ ni gbeyei ni wɔsheɔ lɛ baa shi. (Lala 16:8) No sɛɛ lɛ, wɔhemɔkɛyeli lɛ tsirɛɔ wɔ ni wɔgbaa wekumɛi, akutsoŋbii, nanemɛi nitsulɔi, nanemɛi skulbii, kɛ mɛi krokomɛi sanekpakpa lɛ he sane yɛ be fɛɛ be ni sa mli.—Rom. 1:14-16.
3 Kpe ni Wɔɔkpe Kutuu: Kpee ni wɔɔya daa lɛ hu ji nitsumɔ kpakpa kroko ni jɛɔ hemɔkɛyeli mli. Yɛ mɛɛ gbɛ nɔ? Etsɔɔ akɛ wɔyɛ hemɔkɛyeli akɛ Yesu kɛ wɔ yɛ kɛtsɔ Nyɔŋmɔ mumɔ krɔŋkrɔŋ lɛ nɔ kɛji wɔbua wɔhe naa yɛ Kristofoi akpeei ashishi lɛ. (Mat. 18:20) Etsɔɔ akɛ wɔmiisumɔ ni ‘wɔnu nɔ ni mumɔ lɛ kɛɔ asafoi lɛ.’ (Kpoj. 3:6) Wɔkɛ hiɛdɔɔ susuɔ tsɔsemɔ ni wɔnine shɛɔ nɔ lɛ he ejaakɛ wɔtsɔɔ wɔhemɔkɛyeli lɛ nɔ wɔnuɔ shishi akɛ, mɔ ni tsɔɔ wɔ nii lɛ ji wɔ Tsɔɔlɔ Kpeteŋkpele, ni ji Yehowa.—Yes. 30:20.
4 Yiŋkpɛi ni Wɔfeɔ: Nɔmimaa diɛŋtsɛ ni wɔyɔɔ yɛ nibii ni wɔkɛ wɔhiŋmɛii enaaa lɛ mli lɛ, tsirɛɔ wɔ ni wɔkɛ mumɔŋ nibii yeɔ klɛŋklɛŋ gbɛhe yɛ wɔshihilɛ mli. (Heb. 11:1) Bei pii lɛ, enɛ biɔ ni wɔkɛ heloonaa nibii ashã afɔlei. Ákɛ nɔkwɛmɔnɔ lɛ, onukpa ko kpoo akɛ eeekpɛlɛ je lɛŋ nitsumɔ ko ni baaha ená nii waa lɛ nɔ, ejaakɛ no feemɔ baanyɛ aha efolɔ kpeeiyaa mli, ebaashi eweku lɛ, ni ebaaŋmɛɛ egbɛgbamɔ nitsumɔ lɛ he. Eba akɛ, wɔ hu wɔkɛ wɔhe baafɔ̃ Biblia mli shiwoo lɛ nɔ kwraa akɛ, Yehowa baaye abua mɛi ni ‘taoɔ maŋtsɛyeli lɛ kɛ ejalɛ lɛ tsutsu lɛ.’—Mat. 6:33.
5 Mɛi krokomɛi naa hewalɛ ni hemɔkɛyeli náa yɛ wɔshihilɛi anɔ lɛ. Eji anɔkwale akɛ, ale wɔhemɔkɛyeli lɛ yɛ jeŋ fɛɛ. (Rom. 1:8) No hewɔ lɛ, eba akɛ wɔ fɛɛ wɔbaatsɔ wɔnitsumɔi kpakpai anɔ wɔtsɔɔ akɛ wɔ hemɔkɛyeli lɛ hiɛ kã.—Yak. 2:26.