Wekui ní He Wa yɛ Mumɔŋ—Yɛ Mɛɛ Gbɛ Nɔ?
1 Ajieɔ wekui ni ji Kristofoi lɛ ayi yɛ ‘Nyɔŋmɔ jamɔ hetuu-kɛ-hamɔ sui ni amɛjieɔ lɛ kpo yɛ amɛ diɛŋtsɛ amɛshiai amli’ lɛ hewɔ. (1 Tim. 5:4) Shi kɛlɛ, akɛni nibii fɔji babaoo ní baanyɛ agbɔjɔ wɔhemɔkɛyeli lɛ ebɔle wɔ hewɔ lɛ, ehe miihia ni wekui atsu nii waa koni amɛhi shi akɛ mɛi ni he wa yɛ mumɔŋ. Te abaafee tɛŋŋ atsu enɛ he nii?
2 Okɛ Yitsoyeli ni Tamɔ Kristo Nɔ lɛ Atsu Nii: Ehe miihia ni weku yitsei akase Yesu Kristo yɛ bɔ ni amɛtsuɔ amɛgbɛnaa nii ni kã amɛnɔ akɛ amɛwaje amɛwekui lɛ ahe nii amɛhaa lɛ mli. Kɛfata suɔmɔ ni Yesu jie lɛ kpo etsɔɔ wɔ kɛtsɔ efɔleshaa gbele lɛ nɔ lɛ he lɛ, eyaa nɔ “elɛ̀ɔ” asafo lɛ “ni ehiɛɔ lɛ dɔdɔɔdɔ.” (Efe. 5:25-29) Fɔlɔi ni yɔɔ suɔmɔ lɛ nyiɛɔ nɔkwɛmɔnɔ ni ji suɔmɔ kwɛmɔ nɛɛ sɛɛ kɛtsɔ amɛwekui lɛ adaa gbi mumɔŋ hiamɔ nii ní amɛtsuɔ he nii lɛ nɔ. Nɔ ni fata enɛ he ji weku Biblia mli nikasemɔ ni afeɔ daa otsi, mumɔŋ nibii ni mli kwɔlɔ ni agbaa he sane be fɛɛ be ní eeehi, kɛ naagbai ni atsuɔ he nii beni amɛteɔ shi lɛ.—5 Mose 6:6, 7.
3 Yɛ Shiɛmɔ Nitsumɔ lɛ Mli: Esa akɛ weku mli bii fɛɛ anu shishi akɛ Yehowa kɛ eyiŋtoi lɛ ahe odase ní amɛaaye mɛi krokomɛi lɛ ji amɛjamɔ lɛ fã ko ni he hiaa. (Yes. 43:10-12) Kɛ́ nyɛ ni ji fɔlɔi lɛ, nyɛmiisumɔ ni nyɛbii lɛ atsɔmɔ Yehowa Odasefoi anɔkwafoi lɛ, no lɛ esa akɛ nyɛje mra ni nyɛsaa amɛtsui kɛha shiɛmɔ nitsumɔ lɛ. Nyɛgbaa nɔ hewɔ ni esa akɛ akɛ he asha afɔle yɛ shiɛmɔ nitsumɔ lɛ mli ní akɛ he awo mli daa otsi lɛ he sane. (Mat. 22:37-39) No sɛɛ lɛ, too gbɛjianɔ koni amɛfata ohe daa yɛ shiɛmɔ nitsumɔ lɛ mli.
4 Ye obua amɛ ni amɛna akɛ shiɛmɔ nitsumɔ lɛ he miihia kɛtsɔ be ní aaaŋɔ yɛ daa otsi weku nikasemɔ be lɛ mli koni akɛsaa he kɛha shiɛmɔ wiemɔi ni mɔɔ shi ni aaatĩ mli lɛ nɔ. Tsɔsemɔ obii lɛ aŋkroaŋkro yɛ shiɛmɔ nitsumɔ lɛ mli, ni oye obua amɛ ni amɛya amɛhiɛ yɛ amɛ afii kɛ amɛnyɛmɔi anaa. Yɛ be mli ni nyɛfee ekome kɛye be ko yɛ shiɛmɔ nitsumɔ lɛ mli sɛɛ lɛ, nyɛgbaa bɔ ni amɛ diɛŋtsɛ amɛna Yehowa mlihilɛ lɛ he sane. Gbaa niiashikpamɔi ni wajeɔ hemɔkɛyeli he sane. Babaoo ni wekui ‘saa amɛnaa ni amɛnaa akɛ Nuntsɔ lɛ mli hi lɛ,’ babaoo ni amɛbaatsi amɛbɛŋkɛ Yehowa, ni ebaawaje amɛ koni amɛtsi amɛhe kɛjɛ “efɔŋ fɛɛ” he.—1 Pet. 2:1-3.
5 Yɛ Kpeei lɛ Ashishi: Kwɛ bɔ ni ehi akɛ weku mli bii aaaye abua amɛtɛŋ mɔ fɛɛ mɔ koni amɛya asafoŋ kpeei fɛɛ, titri lɛ kɛ́ amɛteŋ mɔ kome miinu tɔlɛ, nijiaŋwujee, loo nɔnyɛɛ he lɛ! Nyɛmi yoo oblayoo ko wie akɛ: “Kɛ́ mitsɛ jɛ nitsumɔ eba shia lɛ, no mli lɛ etɔ lɛ. Shi migbaa lɛ sane ko ni abaawie he yɛ kpee ni abaafee nakai gbɛkɛ lɛ he sane, ni ewoɔ lɛ hewalɛ koni eya. Kɛkɛ lɛ, kɛ́ minu he akɛ etɔ mi lɛ, ewoɔ mi hewalɛ koni miya.”—Heb. 10:24, 25.
6 Ekome ní Aaafee Kɛfee Nii: Esa akɛ wekui afee ekome kɛfee nii, eko ji ní amɛye amɛbua yɛ shia nifeemɔi amli. Esa akɛ ato be hu kɛha hiɛtserɛjiemɔ kpakpa. Shisharamɔ, hiɛtserɛjiemɔ gbɛfaa, shwɛmɔi srɔtoi ashwɛmɔ, kɛ gbɛfaa kɛyasara wekumɛi loo nanemɛi lɛ baanyɛ aha wɔna hegbɛi ni wɔná miishɛɛ kɛ nibii ni wɔbaanyɛ wɔkɛ miishɛɛ akai.—Jaj. 3:4.
7 Wekui ni ji Kristofoi ni yɔɔ ekãa kɛ shiŋŋfeemɔ lɛ yeɔ daa gbi naagbai ni amɛkɛkpeɔ lɛ anɔ kunim. Kɛtsɔ Yehowa ní amɛtsiɔ amɛbɛŋkɛɔ lɛ kpaakpa lɛ nɔ lɛ, amɛnaa hewalɛ ni ekɛhaa lɛ mli niiashikpamɔ.—Efe. 6:10.