Ghana Betel Mligbelemɔ Nɔyaa He Amaniɛbɔɔ

Wɔ Betel lɛ mligbelemɔ lɛ tsumaa he nitsumɔ je shishi yɛ October 2000. Nitsumɔ lɛ etee nɔ fɛfɛo. Yehowa nine ejɔɔ wɔ aahu akɛ wɔnine eshɛ gbɛŋmɛɛ woji ni he hiaa lɛ anɔ. (Koj. 6:12) Eŋɔɔ wɔnaa akɛ wɔkɛ nɔyaa he amaniɛbɔɔ nɛɛ aaaha nyɛ.

Kɛbashi bianɛ lɛ, mɔdɛŋ ni wɔbɔ lɛ kɔɔ ɔfis srɔtoi ni abaajɛ jɛmɛ akwɛ tsumaa he nitsumɔ lɛ nɔ lɛ kɛ wɔɔhe tsũi kɛha tsumaa he nitsulɔi lɛ amaamɔ lɛ he. Ágbe enɛɛmɛi anaa agbɛnɛ. Wɔje niiasɛɛyaahei, nubui kɛ tsɔnei amaamɔhei ni aha nɔ lɛ ahe gbɛjianɔtoo shishi. Kɛji akɛ obasara Betel lɛ, obaana blɔkii, sɛmɛntii, kɛ shia ni akɛmiitsu nɛkɛ nitsumɔi nɛɛ ahe nii. Wɔ nitsumɔ ni baanyiɛ sɛɛ ji shitsaa kɛha nihoomɔhe ní abaagbele mli lɛ kɛ shihilɛhe tsũi, Maŋtsɛyeli Asa hee, kɛ gbɛjegbɛi srɔtoi lɛ ahe nitsumɔ.

Amrɔ nɛɛ wɔweku lɛ eda. Yɛ majimaji ateŋ nitsulɔi 30 ni áje gbɛ akɛ wɔ tsumaa he gbɛjianɔtoo lɛ ewo amɛdɛŋ lɛ sɛɛ lɛ, nyɛmimɛi babaoo ni jɛ maji srɔtoi amli ni amɛ́jɛ amɛsuɔmɔ mli amɛkɛ amɛhe eha, ni woɔ amɛ diɛŋtsɛ amɛgbɛfaa he nyɔmɔ kɛ amɛ nitsumɔ mli hejɔɔmɔ be baa ni amɛbayeɔ amɛbuaa wɔ. Kɛjɛ March 2001 kɛbaa lɛ, asafoi ni yɔɔ Accra kɛ Tema yaa nɔ amɛyeɔ amɛbuaa wɔ daa Hɔɔ. Wɔle akɛ nyɛ fɛɛ nyɛkɛ ekãa baafi nitsumɔ nɛɛ sɛɛ kɛ afɔ̃ nine atsɛ nyɛ asafo lɛ. Wɔhiɛ sɔɔ nyɛ sɛɛfimɔ kɛ sɔlemɔi lɛ waa diɛŋtsɛ.