Nyɛhaa Alea Yehowa Gbɛi kɛ Enifeemɔ Nii Lɛ
1 “Nyɛdaa Yehowa shi, nyɛtsɛ́a egbɛi lɛ! Nyɛhaa alea enifeemɔ nii lɛ yɛ majimaji lɛ ateŋ! . . . Mɛi ni taoɔ Yehowa sɛɛgbɛ lɛ atsui anyɔ amɛmli.” (Lala 105:1, 3) Lalatsɛ lɛ ní ŋmala nakai wiemɔi lɛ ná miishɛɛ kpele akɛ eegba mɛi krokomɛi Yehowa kɛ “enifeemɔ nii” lɛ ahe sane. Mɛɛ nifeemɔ nii? Ŋwanejee ko bɛ he akɛ nomɛi ji saji ni kɔɔ Nyɔŋmɔ anunyam maŋtsɛyeli lɛ kɛ ‘eyiwalaheremɔ he sanekpakpa ni ekɛhaa lɛ’ he.—Lala 96:2, 3; 145:11, 12.
2 Wɔyɛ yiŋtoi babaoo hewɔ ni esa akɛ wɔná miishɛɛ beni wɔbɛŋkɛɔ afi 2001 Kaimɔ be lɛ yɛ bɔ ni Yehowa kɛ wɔ yeɔ haa lɛ hewɔ. Yɛ mɛɛ gbɛ nɔ? Sanebimɔ ko kwraa bɛ he akɛ Nuntsɔ lɛ Gbɛkɛnaashi Niyenii lɛ ji afi lɛ gbijurɔyeli ni fe fɛɛ kɛha anɔkwa Kristofoi fɛɛ. Gbijurɔyeli ko bɛ ni kɛ lɛ yeɔ egbɔ yɛ bɔ ni ehe hiaa, yiŋtoo, loo bɔ ni atsuɔ he nii ahaa lɛ. Be nɛɛ ji be ni wɔ fɛɛ wɔkɛbaakai nɔ ni Yehowa kɛ Yesu efee koni amɛkɛha wɔná gbɛ ni wɔɔtsɔ nɔ wɔná yiwalaheremɔ. Ebɛ naakpɛɛ mɔ akɛ yɛ Kaimɔ be lɛ mli lɛ, wɔkpaa gbɛ akɛ wɔbaana hiɛyaa babaoo diɛŋtsɛ yɛ shiɛmɔ nitsumɔ lɛ mli, yɛ be mli ni wɔhaa aleɔ ‘yiwalaheremɔ he sanekpakpa’ lɛ!
3 Ani Okɛ Ohe Baawo Gbɛgbalɔi Awalɔ Nitsumɔ lɛ Mli? Nyɛsɛɛ afi lɛ April mli lɛ, mɛi 7,117 kɛ amɛhe wo gbɛgbalɔi awalɔ nitsumɔ lɛ mli. Afi nɛɛ, ani wɔbaanyɛ wɔha March kɛ April afee nyɔji krɛdɛɛi ni ahaa sɔɔmɔ nitsumɔ lɛ yaa hiɛ yɛ mli? March yɛ Hɔɔ komekomei enumɔ, ni April yɛ Hɔgbaa komekomei enumɔ. Kɛtsɔ sɔɔmɔ gbii muji yɛ otsi lɛ naagbeei ahe gbɛjianɔ ni atoɔ nɔ lɛ, shiɛlɔi babaoo ni kɛ amɛbe-fɛɛ tsuɔ nii lɛ ena akɛ amɛbaanyɛ amɛtsu gbɛgbalɔi awalɔ nitsumɔ lɛ. Bɔni afee ni ashɛ ŋmɛlɛtswai 50 ni ataoɔ yɛ nyɔŋ kome mli lɛ he lɛ, ebaabi ni gbɛgbalɔi awalɔ lɛ aná ŋmɛlɛtswai 12 daa otsi kɛji aja mli. Susumɔ gbɛjianɔtoi ni akɛha yɛ adeka ni yɔɔ baafa 4 lɛ he jogbaŋŋ. Ani enɛɛmɛi ateŋ ekome baahi kɛha oshihilɛ lɛ? Kɛ jeee nakai lɛ, ekolɛ obaanyɛ okɛto bo diɛŋtsɛ ogbɛjianɔ ni baahi kɛha bo koni okɛ ohe awo gbɛgbalɔi awalɔ nitsumɔ lɛ mli yɛ March kɛ April nɛɛ.
4 Onukpai lɛ aje shishi amrɔ nɛɛ koni amɛtswa ekãa kɛ sɛɛfimɔ kɛha shiɛmɔ nitsumɔ ni yaa hiɛ amɛma shi. Yɛ nyɛsɛɛ afi lɛ mli lɛ, asafo ko ní emli onukpai lɛ kɛ asafoŋ sɔɔlɔi lɛ fɛɛ kɛ amɛhe wo gbɛgbalɔi awalɔ nitsumɔ lɛ mli lɛ, shiɛlɔi 121 lɛ ateŋ mɛi 64 kɛ amɛhe wo gbɛgbamɔ nitsumɔ lɛ mli yɛ April mli! Asafo lɛ ná miishɛɛ hu akɛ amɛaana akɛ shiɛlɔi ekpaa ni abaptisiko amɛ lɛ eje shishi amɛmiibu amɛshiɛmɔ nitsumɔ he akɔntaa yɛ March kɛ April mli. Yɛ anɔkwale mli lɛ, enɛ ji be ni sa jogbaŋŋ kɛha gbekɛbii kɛ mɛi heei akɛ amɛaabi onukpai lɛ kɛji amɛhe esa akɛ amɛaaje shishi amɛná gbɛfaŋnɔ yɛ maŋ odaseyeli nitsumɔ lɛ mli.
5 Mɔdɛŋbɔɔ Babaoo kɛ Jɔɔmɔi Baa: Asafoi ni kɛ otii krɛdɛɛi komɛi mamɔɔ amɛhiɛ ní amɛkɛ mɔdɛŋbɔɔ babaoo woɔ mli lɛ náa jɔɔmɔi babaoo mli miishɛɛ. Ekolɛ asafoi komɛi baama shikpɔŋkuku ni afɔɔɔ mli nitsumɔ lɛ mli nitsumɔ nɔ mi jogbaŋŋ, jwɛŋmɔ ni abaagbala kɛya odaseyeli gbɛ̀i srɔtoi anɔ, loo ni abaama tɛlifoŋ nɔ odaseyeli nɔ mi—eji gbɛ ni mɔɔ shi nɔ ni atsɔɔ ni nine shɛɔ mɛi ni bɛ shia, kɛ agbɛnɛ shiabii ni nine shɛɛɛ amɛnɔ lɛ anɔ.
6 Ani esa akɛ hela loo gbɔlɛ afee nɔ diɛŋtsɛ ni baatsĩ mɔ ko naa yɛ ehe ni ekɛaawo sɔɔmɔ nitsumɔ lɛ mli babaoo bɔ ni ebaanyɛ? Jeee yɛ shihilɛi fɛɛ amli. Ákɛ nɔkwɛmɔnɔ lɛ, nyɛmi yoo ko ni eye afii 86 ni ená kansa lɛ kɛ ehe wo gbɛgbalɔi awalɔ nitsumɔ lɛ mli yɛ April mli yɛ enaji ni efũufũui lɛ fɛɛ sɛɛ. Tɛlifoŋ nɔ odaseyeli ye bua lɛ ni ená gbɛfaŋnɔ babaoo yɛ sɔɔmɔ nitsumɔ lɛ mli, ni ekɛha yijiemɔ ni ekɛhaa Yehowa lɛ tee hiɛ. Enɛ ná hewalɛ ni kanyaa mɔ yɛ lɛ kɛ asafo lɛ nɔ.
7 Saamɔ Ohe Jogbaŋŋ Kɛha Kaimɔ Lɛ: Kaimɔ lɛ baaba nɔ afi nɛɛ yɛ April 8 lɛ nɔ. Akɛni eji Hɔgbaa hewɔ lɛ, esa akɛ mɛi babaoo anyɛ aba. Ekolɛ wɔbaaná mɛi ni fa fe fɛɛ ni baaba fe bei fɛɛ ni eho pɛŋ kɛji akɛ wɔtsu wɔgbɛfaŋnɔ kɛtsɔ (1) ba ni wɔ diɛŋtsɛ lɛ wɔbaaba kɛ (2) mɛi krokomɛi ni wɔbaafɔ̃ amɛ nine ni amɛbafata wɔhe yɛ Kaimɔ lɛ shishi lɛ nɔ. Namɛi esa akɛ wɔfɔ̃ amɛ nine?
8 Kwɛmɔ nibii ni oŋmala oshwie shi yɛ shiɛmɔ nitsumɔ lɛ mli lɛ amli kɛha mɛi ni ejie miishɛɛ kpo yɛ anɔkwale lɛ he lɛ agbɛi, eyɛ mli po akɛ ekolɛ jeee daa oyaa amɛŋɔɔ. Ha ojwɛŋmɔ ahi mɛi nɛɛ ni obaayasara amɛ fɛɛ kɛ ninefɔɔ wolo kɛha Kaimɔ lɛ otsii enyɔ loo etɛ kɛtsɔ hiɛ dani Kaimɔ be lɛ ashɛ. Kɛji oshihilɛ baaŋmɛ gbɛ lɛ, okɛ ohe aha akɛ obaaha tsɔne kɛha mɛi ni baasumɔ ni amɛya lɛ.
9 Akɛ ninefɔɔ woji ni akala kɛha Kaimɔ lɛ fɛɛ tsuuu nii yɛ asafoi komɛi amli. Asafo mli woloŋmalɔi lɛ akwɛ akɛ ninefɔɔ woji lɛ eba yɛ be ni fa saŋŋ mli bɔni afee ni anyɛ aja fɛɛ. Ekolɛ obaasumɔ ni otaipi loo okala be kɛ he ni abaafee Kaimɔ lɛ yɛ lɛ fɛfɛo yɛ ninefɔɔ wolo lɛ shishigbɛ. Ákɛ kaimɔ nɔ̃ lɛ, yɛ shihilɛi pii amli lɛ, esa akɛ wɔ diɛŋtsɛ wɔkɛ ninefɔɔ woji kɛha Kaimɔ lɛ aha shiatsɛ lɛ.
10 Kaimɔ Mɛi ni Ekpa Shiɛmɔyaa Lɛ: Eji nɔ ni haa anáa miishɛɛ beni Biblia kaselɔ ko ejɔɔ ehe nɔ eha Yehowa ni ekɛ nu mli baptisimɔ ema enɛ nɔ mi lɛ. Eyɛ mli akɛ daa afi lɛ mɛi ni yɔɔ wɔteŋ lɛ ateŋ mɛi komɛi kɛ wɔ kpaa bɔɔ, ni amɛkpaa Yehowa gbɛi kɛ enifeemɔ nii lɛ ni amɛaakɛɛ mɛi krokomɛi kɛɛmɔ. Wɔyɛ yiŋtoo kpakpa hewɔ ni esa akɛ wɔsusuɔ amɛhe lɛ. Eyɛ mli akɛ mɛi ni ekpa shiɛmɔyaa lɛ ateŋ mɛi babaoo shiko anɔkwale lɛ moŋ, ekolɛ amɛkpa shiɛmɔ yɛ nijiaŋwujee, amɛ diɛŋtsɛ amɛnaagbai, loo yɛ shihilɛ mli yeyeeyefeemɔi krokomɛi ahewɔ. (Mat. 13:20-22) Yelikɛbuamɔ he miihia mɛi ni yɔɔ mumɔŋ gbɔjɔmɔ shihilɛ mli lɛ koni amɛku sɛɛ kɛba asafo lɛ mli dani Satan gbɛjianɔtoo lɛ ami amɛ. (1 Pet. 5:8) Wɔmiisumɔ ni wɔbɔ mɔdɛŋ jogbaŋŋ yɛ Kaimɔ be nɛɛ mli koni wɔye wɔbua mɛi fɛɛ ni sa ni ekpa shiɛmɔyaa lɛ koni amɛkɛ amɛhe awo sanekpakpa shiɛmɔ nitsumɔ lɛ mli ekoŋŋ.
11 Esa akɛ asafoŋ woloŋmalɔ lɛ aha asafo woloŋ nikasemɔ nɔkwɛlɔi lɛ ale mɛi ni yɔɔ amɛkui lɛ amli ni ekpa shiɛmɔyaa. Asafoŋ Sɔɔmɔ Ajinafoi Akuu lɛ baanyiɛ hiɛ yɛ gbɛjianɔ ni atoɔ kɛha mɛi ni ekpa shiɛmɔyaa nɛɛ fɛɛ asaramɔ mli. Kɛji aná ale akɛ mɔ aŋkro Biblia mli nikasemɔ he baaba sɛɛnamɔ kɛha nakai mɔ lɛ, sɔɔmɔ ajinafoi akuu lɛ akpɛ yiŋ yɛ mɔ ni baafee mɔ ni sa jogbaŋŋ ni baakwɛ nikasemɔ lɛ nɔ. Eyɛ mli akɛ ekolɛ ehe ehiaŋ ni afee nikasemɔ lɛ yɛ be kakadaŋŋ mli moŋ, shi mɔ ni ahala koni ekwɛ nɔ lɛ baanyɛ abu be, sɛɛsaramɔi, kɛ Biblia mli nikasemɔ he akɔntaa.
12 Nyɛsɛɛ afi lɛ April mli lɛ nyɛmi yoo ko ni kɛ ehe wo shia kɛ shia shiɛmɔ nitsumɔ lɛ mli lɛ kɛ woji tɛtrɛbii lɛ eko ha oblanyo ko yɛ gbɛjegbɛ lɛ nɔ. Oblanyo lɛ ha ele akɛ eŋa ji Odasefonyo ni ekpa shiɛmɔyaa. Ebi he ni Maŋtsɛyeli Asa lɛ yɔɔ ni efɔ̃ nyɛmi yoo lɛ nine koni ebasara lɛ kɛ eŋa. Nɔ ni jɛ mli kɛba ji akɛ gbalashihilɛ mli hefatalɔi lɛ ba kpee ni nyiɛ sɛɛ lɛ ni amɛkpɛlɛ koni akɛ amɛ afee Biblia mli nikasemɔ.
13 Feemɔ Klalo Kɛha Nitsumɔ Babaoo! Lalatsɛ lɛ ni jaje akɛ wɔha ale Yehowa gbɛi kɛ enifeemɔ nii lɛ kɛfata he akɛ: “Nyɛlaa nyɛhaa lɛ! Nyɛlaa nyɛjiea eyi! Nyɛgbaa enaakpɛɛ nitsumɔi lɛ fiaa! Nyɛshwãa nyɛfɔa egbɛi krɔŋkrɔŋ lɛ nɔ.” (Lala 105:2, 3) Nyɛhaa wɔtsɔa bɔ ni wɔsusuɔ Yehowa gbɛi kpeteŋkpele lɛ kɛ “enaakpɛɛ nitsumɔi” lɛ ahe kɛtsɔ wɔmɔdɛŋbɔɔ yɛ sɔɔmɔ nitsumɔ lɛ mli ni wɔɔha efa babaoo, koni wɔha Kaimɔ be nɛɛ afee nɔ ni fe fɛɛ eko ni afee pɛŋ!
[Akrabatsa ni yɔɔ baafa 4]
Gbɛ̀i Srɔtoi ni Obaatsɔ nɔ Oto Ŋmɛlɛtswai 12 he Gbɛjianɔ Daa Otsi Kɛha Gbɛgbalɔi Awalɔ Nitsumɔ Lɛ
Gbi Ŋmɛlɛtswai
Ju 1 2 − −
Jufɔ 1 − 3 −
Shɔ 1 2 − 5
Soo 1 − 3 −
Sohaa 1 2 − −
Hɔɔ 5 4 3 5
Hɔgbaa 2 2 3 2
Fɛɛ: 12 12 12 12
Ani gbɛjianɔtoi nɛɛ ateŋ eko baahi kɛha bo?
Kɛ jeee nakai lɛ, mɛni hewɔ otooo bo diɛŋtsɛ ogbɛjianɔ?