Ani Obaakã He Oŋmɛ Otsui Shi Kɛyashi Naagbee?
1 Beni agbe afi 1998 “Nyɔŋmɔ Shihilɛ Gbɛ” Kpokpaa Wulu nɔ Kpee lɛ naa lɛ, Yehowa tsuji kpɛlɛ yiŋkpɛi komekomei 7 nɔ, nɔ ni ma faishitswaa ni wɔyɔɔ akɛ wɔɔnyiɛ Nyɔŋmɔ shihilɛ gbɛ lɛ mli lɛ nɔ mi lɛ. Efã ko kɛɛ akɛ: “Wɔbaaya nɔ ni wɔkɛ wɔhe akpɛtɛ Biblia mli jeŋba kɛ mumɔŋ taomɔ nii ni nɔ kwɔlɔ lɛ ahe. Wɔtswa wɔfai shi akɛ wɔnyiɛŋ tamɔ bɔ ni jeŋmaji lɛ nyiɛɔ yɛ amɛyaka jwɛŋmɔi lɛ amli lɛ. (Efe. 4:17-19) Wɔyiŋkpɛɛ ji akɛ, wɔbaahi shi akɛ mɛi ni he tse yɛ Yehowa hiɛ ni je lɛ woko wɔhe muji. (Yak. 1:27)” Akɛni wɔyɛ gbɔmɛi ni ebuuu Nyɔŋmɔ shihilɛ gbɛ lɛ ateŋ hewɔ lɛ, nɛkɛ hegbɛ ni nɔ kwɔ waa diɛŋtsɛ nɛɛ mlihiɛmɔ daa biɔ ni wɔná suɔmɔ ni mli kwɔ wɔha Yehowa kɛ emlai.—Lala 11:7; 119:165.
2 Yesu Kristo kɛ wiemɔ ni haa mɔ hiɛnɔkamɔ waa nɛɛ ha akɛ: “Mɔ ni hiɛɔ mli kɛyawulaa shi lɛ, lɛ aaahere eyiwala.” (Mat. 24:3, 13) Yɛ wɔgbɛfaŋ akɛ aŋkroaŋkroi ni mɛɔ Nyɔŋmɔ naakpɛɛ shiwoo kɛha shikpɔŋ lɛ mlibaa lɛ, ‘naagbee lɛ’ baanyɛ afee “je nɛŋ naagbee lɛ” loo wɔgbele. Ni kɛlɛ, bɔni afee ni aná yiwalaheremɔ ni mɔɔ shi lɛ, anɔkwa tsuishiŋmɛɛ he miihia.—1 Pet. 1:8, 9.
3 Akɛni Satan ni ji “jata ni hũuɔ” lɛ le akɛ ebe lɛ faaa dɔŋŋ hewɔ lɛ, eyɛ he miishɛɛ waa diɛŋtsɛ akɛ eeemi Yehowa tsuji. (1 Pet. 5:8; Kpoj. 12:12, 17) Yɛ afi 1999 sɔɔmɔ afi lɛ pɛ mli lɛ, ashwie shiɛlɔi 522—ní kɛ hoo lɛ amɛaashɛ asafoi kpaanyɔ lɛ—kɛjɛ asafo lɛ mli yɛ Ghana yɛ be mli ni mɛi krokomɛi babaoo hu yɛ ni saneyeli ajinafoi kã amɛhiɛ! Mɛi ni ashwie amɛ kɛjɛ asafo lɛ mli yɛ jeŋba shara—ajwamaŋbɔɔ, gbalafitemɔ, loo jeŋba gbonyo hewɔ lɛ ayi fa fe oha mlijaa 80! (Okɛto 4 Mose 25:1, 9; 1 Korintobii 10:8 he.) Kwɛ bɔ ni ehe hiaa waa akɛ wɔɔya nɔ wɔsara, ní ‘wɔte shi wɔwo Satan, ní wɔdamɔ shi shiŋŋ yɛ hemɔkɛyeli’ lɛ mli!—1 Pet. 5:9.
4 Esa akɛ wɔyɔse akɛ Nyɔŋmɔ tsulɔ ko kwraa bɛ ni eye ehe kɛjɛ bɔ ni ehe hiaa akɛ eeehiɛ emuuyeli mli eha kɛtsɔ tsuishiŋmɛɛ nɔ lɛ he. Ehe bahia ni Yesu, wɔ-Nɔkwɛmɔnɔ lɛ afĩ shi shiŋŋ. No hewɔ lɛ, efee tsuishiŋmɛɛ he nɔkwɛmɔnɔ ni yeɔ emuu efɔ̃ shi. (Heb. 12:1-3) Bɔfo Paulo kase Yesu nɔkwɛmɔnɔ lɛ. (2 Kor. 12:11, 12) Yɛ gbɛtsĩi nii ni yɔɔ gbeyei lɛ fɛɛ sɛɛ lɛ, Paulo bu esɔɔmɔ nitsumɔ lɛ akɛ ejara wa waa aahu akɛ eŋmɛ etsui shi babaoo koni ewo hiɛ nyam. (2 Kor. 6:3, 4, 9) Belɛ kwɛ bɔ ni ehe hiaa akɛ wɔkuŋ wɔhiɛ wɔshwieŋ Yehowa Wiemɔ lɛ nɔ! Esa akɛ efee hewalɛ ko ni he hiaa ni kanyaa wɔ yɛ wɔshihilɛi amli, ni esa akɛ wɔhe wɔye kɛ wɔtsuii fɛɛ kɛ́ wɔmiisumɔ ni wɔŋmɛ wɔtsui shi lɛɛlɛŋ.—Yak. 1:21.
5 Tsu Omumɔŋ Hewalɛnamɔ He Nii: Kɛ wɔtsu wɔgbɔmɔtsoŋ hewalɛnamɔ he nii daa lɛ, wɔbafeɔ mɛi ni nyɛɔ amɛtsĩɔ hela naa. Ni kɛ́ hela mɔ wɔ lɛ, wɔnáa hewalɛ mramra. Nakai nɔŋŋ kɛ́ wɔtsu wɔmumɔŋ hewalɛnamɔ he nii, ní wɔtee nɔ wɔfee jɔɔmɔi ni wɔnáa mli ŋɔɔmɔ amrɔ nɛɛ kɛ nibii krokomɛi ni wɔkpaa gbɛ lɛ ahe mfoniri yɛ wɔjwɛŋmɔ mli jogbaŋŋ daa, ni kɛ́ wɔŋɔ wɔhiɛ wɔfɔ̃ Yehowa hewalɛ nɔ moŋ fe wɔnɔ̃ lɛ, wɔbaafee mɛi ni nyɛɔ amɛtsuɔ naagbai ni teɔ shi lɛ ahe nii.
6 Enɛ biɔ koni wɔkã he wɔye niyenii ni Nyɔŋmɔ kɛɔ akɛ wɔye lɛ, koni wɔhiɛ asɔ mumɔŋ ‘niyenii’ kpakpa ni “tsulɔ anɔkwafo kɛ nilelɔ” lɛ kɛhaa “yɛ be ni sa nɔ lɛ.” (Mat. 24:45-47) Hɛɛ, kɛ́ wɔkwɛ koni Yehowa aha wɔ hewalɛ kɛtsɔ teemɔŋ nikasemɔ, kpeeiyaa, Kristofoi anitsumɔ ni akɛ ekãa tsuɔ, kɛ titri lɛ sɔlemɔ nɔ lɛ, ebaaha wɔhiŋmɛii ana nii jogbaŋŋ yɛ mumɔŋ, ni ebaaye ebua wɔ koni wɔŋmɛ wɔtsui shi yɛ shihilɛi ni kaa mɔ, ní baanyɛ aba yɛ be kɛ bei amli lɛ amli.—Lala 1:1-3.
7 Wɔmumɔŋ hewalɛnamɔ he nii ni wɔɔtsu lɛ hu biɔ ni wɔkaku wɔhiɛ wɔshwie Ŋmalɛ naa ŋaawoo ni tsɔɔ akɛ esa akɛ wɔkwa shihilɛi ni kɛ oshara baa wɔmumɔŋ shihilɛ he lɛ nɔ. Mɛi ni ashwie amɛ kɛjɛ asafo lɛ mli lɛ ateŋ mɛi babaoo eyatsiii amɛhe kɛjɛɛɛ je lɛ ni amɛkɛbɔɔ gbagbalii kɛtsɔ amɛ diɛŋtsɛ amɛhe ni amɛkɛhaa je lɛ kɛ hiɛtserɛjiemɔ ni esaaa nɔ lɛ he. (1 Kor. 15:33) Je lɛŋ miishɛɛ nibii ni lakaa mɔ lɛ gbala amɛ ni amɛmiisumɔ ni amɛfee emli bii. (1 Yoh. 2:15-17) Mɛi komɛi hu nu he yɛ gbɛ̀i krokomɛi anɔ ákɛ Yehowa mlai lɛ yɛ kpɛŋŋ tsɔ̃. (1 Kor. 6:9, 10) Beni amɛná amɛle akɛ Yehowa miikudɔ wɔ yɛ gbɛ ni hi kɛha wɔ fe fɛɛ nɔ lɛ, no mli lɛ ekpe sɛɛ kwraa tsɔ.—Yes. 48:17, 18; Lala 19:10-12.
8 Wɔnyɛŋ wɔje gbɛtsĩi nibii loo shihilɛi ni kaa mɔ lɛ amli kwraa kɛmɔ shi. Shi kɛ́ wɔtsu wɔmumɔŋ hewalɛnamɔ he nii jogbaŋŋ kɛtsɔ hiɛ lɛ, nibii ni tamɔ nakai lɛ naŋ wɔnɔ hewalɛ. Kaimɔ akɛ, Yehowa náa miishɛɛ waa kɛ́ ejálɔi lɛ ŋmɛ amɛtsui shi. No hewɔ lɛ, nyɛhaa wɔhaa etsui anyaa kɛtsɔ egbɛ lɛ nɔ nyiɛmɔ daa nɔ.—Abɛi 27:11.