“Wu Hemɔkɛyeli He Ta Kpakpa Lɛ”
1 Bɔfo Paulo wo Timoteo ŋaa koni ‘ewu hemɔkɛyeli he ta kpakpa lɛ.’ (1 Tim. 6:12) Paulo diɛŋtsɛ hi shi yɛ nakai wiemɔi lɛ anaa. Yɛ ewala shihilɛ naagbee be lɛ mli lɛ, lɛ diɛŋtsɛ ekɛ nɔmimaa wie akɛ ewu ta kpakpa lɛ. (2 Tim. 4:6-8) Ekɛ ekãafeemɔ, hiɛwalɛ, kɛ tsuishiŋmɛɛ tiu sɔɔmɔ nitsumɔ lɛ sɛɛ yɛ gbɛ fɛɛ gbɛ nɔ. Kɛ wɔkase enɔkwɛmɔnɔ lɛ, wɔbaanyɛ wɔná nɔmimaa ni ená yɛ emli lɛ nɔŋŋ eko akɛ wɔmiifee nɔ ni hi fe fɛɛ ni wɔɔnyɛ yɛ ta ni wɔwuɔ wɔhaa Kristofoi ahemɔkɛyeli lɛ mli.
2 Okɛ Mɔdɛŋbɔɔ ni He Hiaa lɛ Atsu Nii: Paulo tsu nii waa yɛ shiɛmɔ nitsumɔ lɛ mli. (1 Kor. 15:10) Nakai eji yɛ wɔgbɛfaŋ yɛ be mli ni wɔtaoɔ mɛi fɛɛ ni sa ni wɔnaa amɛ yɛ wɔshikpɔŋkuku lɛ mli lɛ. (Mat. 10:11) Bɔni afee ni wɔnine ashɛ amɛteŋ mɛi komɛi anɔ lɛ, ekolɛ ebaabi ní wɔte shi mra ni wɔyaye mɛi ni wɔkɛkpeɔ yɛ gbɛjegbɛ nɔ lɛ odase. Aloo ekolɛ ebaabi ni wɔtsu nii kɛ́ eshwɛ fioo ni je baana loo beni je ebɔi namɔ koni wɔnine ashɛ mɛi ni kuɔ amɛsɛɛ kɛyaa amɛshiai amli lɛ anɔ.
3 Kɛ wɔkɛ wɔ woloŋ nikasemɔ kuu lɛ mli bii baakpe kɛha shiɛmɔyaa lɛ, ebiɔ ni wɔtsɔse wɔhe ni wɔto gbɛjianɔ kpakpa ni wɔshɛ jɛmɛ yɛ be naa. Ákɛ nɔkwɛmɔnɔ lɛ, Betel weku lɛ mli bii komɛi kɛ kilomitai 12 gbɛ jɛkɛmɔ yaa koni amɛkɛ asafoi ni aha amɛkɛbɔɔ lɛ ayakpe kɛya shiɛmɔ yɛ otsii lɛ anaagbee. Agbɛnɛ hu, wɔhiɛ baanyɛ asɔ wɔ asafo lɛŋ shiɛlɔi kɛ wekui lɛ ekomɛi ni nyiɛɔ gbɛ ni jɛkɛ fioo, shi amɛbashɛɔ yɛ be naa lɛ. Mɔdɛŋ ni abɔɔ kɛ gbɛjianɔ ni mɔ diɛŋtsɛ toɔ yɛ nɛkɛ gbɛ nɔ lɛ sa kasemɔ.
4 Esa akɛ nɔ ko atsirɛ wɔ koni wɔsaa wɔya mɛi fɛɛ ni wɔnaa akɛ amɛná wiemɔ lɛ he miishɛɛ lɛ aŋɔɔ ekoŋŋ. Kɛ wɔkɛ woji miiha yɛ gbɛjegbɛ nɔ loo yɛ trukaa odaseyeli mli po lɛ, ehe miihia ni wɔbɔ mɔdɛŋ ni wɔhé mɔ lɛ adrɛs loo tɛlifoŋ nɔmba. Kɛkɛ lɛ, wɔbaanyɛ wɔkɛ lɛ awie koni wɔkɛtee emiishɛɛ shi ni wɔbɔ mɔdɛŋ wɔje Biblia mli nikasemɔ shishi.
5 Okɛ Ohe Awo Shiɛmɔ lɛ Mli Daa: Paulo kɛ ehe woɔ shiɛmɔ mli daa ni ehaa emɔɔ shi. (Rom. 15:19) Ni bo hu? Ani okɛ ohe woɔ shiɛmɔ nitsumɔ lɛ mli daa? Ani okɛ ohe ewo shiɛmɔ nitsumɔ lɛ mli yɛ nyɔŋ nɛɛ nɔ? Asafo Woloŋ Nikasemɔ nɔkwɛlɔi yɛ he miishɛɛ akɛ amɛaana akɛ mɔ fɛɛ mɔ ni yɔɔ amɛkuu lɛ mli lɛ kɛ amɛhe aaawo shiɛmɔ nitsumɔ lɛ mli yɛ August. Amɛbaaye amɛbua bo ni ofee nakai.
6 Kɛ wɔkase Paulo nɔkwɛmɔnɔ lɛ yɛ be mli ni wɔfĩɔ sanekpakpa lɛ sɛɛ kɛmɔɔ shi lɛ, wɔbaaya nɔ ‘wɔwu hemɔkɛyeli lɛ he ta kpakpa lɛ.’