Ani Oohere Kristo Suɔmɔ lɛ Nɔ?
1 Beni bɔfo Yohane susuɔ e-Nuntsɔ lɛ shihilɛ gbɛ lɛ he lɛ, eŋma akɛ: ‘Bɔ ni Yesu sumɔɔ emɛi ni yɔɔ je lɛŋ lɛ, nakai esumɔ amɛ kɛwula shi.’ (Yoh. 13:1) Wɔsusuɔ Kristo suɔmɔ kpojiemɔ ni fe fɛɛ lɛ he yɛ Kaimɔ be nɛɛ mli. Wɔbaanyɛ wɔhere nakai suɔmɔ lɛ nɔ kɛtsɔ hemɔkɛyeli ni wɔɔná yɛ kpɔmɔnɔ lɛ mli lɛ nɔ, kɛtsɔ shiɛmɔ nitsumɔ lɛ ni wɔkɛ wɔhe aaawo mli kɛ ekãa lɛ nɔ, kɛ agbɛnɛ kɛtsɔ ni wɔɔhi mli ‘kɛyawula shi’ tamɔ Yesu lɛ nɔ.—Mat. 24:13; 28:19, 20; Yoh. 3:16.
2 Kristo Suɔmɔ lɛ Nɔheremɔ: Yesu tsu nii waa yɛ naagbee otsi ni ekɛhi shikpɔŋ nɔ lɛ mli. (Mat. 21:23; 23:1; 24:3) Ákɛ mɛi ni kaseɔ Kristo lɛ, suɔmɔ tsirɛɔ wɔ hu koni ‘wɔmia wɔhiɛ waa’ yɛ Yehowa sɔɔmɔ mli. (Luka 13:24) Ani obaanyɛ okɛ gbɛjianɔ ni atoɔ koni akɛ he awo odaseyeli nitsumɔ lɛ mli babaoo yɛ April lɛ atsu nii jogbaŋŋ kɛtsɔ be ni oyeɔ yɛ shiɛmɔ nitsumɔ lɛ mli ni oooha efa kɛya hiɛ lɛ nɔ?
3 Afi nɛɛ, abaaye Nuntsɔ lɛ Gbɛkɛnaashi Niyenii lɛ Shɔ gbɛkɛ, April 19. Mɛi enyiɛ baaná hegbɛ koni amɛná nifeemɔ ni sa kadimɔ nɛɛ mli gbɛfaŋnɔ? Enɛ damɔ wɔ diɛŋtsɛ wɔnɔ babaoo. Ani oŋmala mɛi ni otoɔ gbɛjianɔ koni ofɔ̃ amɛ nine kɛba lɛ agbɛi oshwie shi—mɛi ni okɛ amɛ kaseɔ Biblia lɛ kɛ mɛi krokomɛi ni yɔɔ wiemɔ lɛ he miishɛɛ, wekumɛi, nanemɛi nitsulɔi, kɛ nanemɛi skulbii? Ani oyana amɛ ni okɛ miishɛɛ efɔ̃ amɛ nine? Ani obaaya ni oyakai amɛ beni eshwɛ gbii fioo ni abaaye Kaimɔ lɛ? Ani oyelikɛbuamɔ he baahia amɛ koni amɛba jɛmɛ? Onukpai lɛ hu baafɔ̃ nine amɛtsɛ mɛi fɛɛ ni ekpa shiɛmɔyaa lɛ. Anɔkwale ni eji akɛ abaaye Kaimɔ lɛ yɛ otsi lɛ mli gbɛkɛ ko moŋ fe nɔ ni abaaye yɛ otsi lɛ naagbee lɛ haaa efee nɔ ni he ehiaaa tsɔ̃ akɛ mɛi fɛɛ aaaya shishi.
4 Ba Jɛmɛ akɛ Mɔ Ni Esaa Ehe: Ehe miihia koni wɔsaa wɔhe ni wɔná jwɛŋmɔ ni ja kɛ́ wɔtee Kaimɔ lɛ. Paulo wo nanemɛi heyelilɔi hewalɛ koni amɛha bɔ ni nifeemɔ lɛ he hiaa waa ha lɛ ahi amɛjwɛŋmɔ mli. (1 Kor. 11:20-26) Nyɛbaanyɛ nyɛkane Yohane Sanekpakpa lɛ kɛjɛ yitso 13 kɛyashi 17 beni nyɛfeɔ weku Biblia mli nikasemɔ lɛ koni agbɛnɛ nyɛha weku lɛ mli bii lɛ ateŋ mɔ fɛɛ mɔ agba nɔ ni Yesu afɔleshaa lɛ tsɔɔ kɛha lɛ lɛ he sane. Nyɛhiɛ akakpaa nɔ akɛ nyɛaakane daa Biblia kanemɔ ni ato he gbɛjianɔ kɛha otsi mli ni abaaye Kaimɔ lɛ hu!
5 Suɔmɔ ni wɔyɔɔ kɛha Kristo lɛ mli kwɔ, ni eyaa shɔŋŋ kɛtekeɔ April 19. Wɔtswa wɔfai shi akɛ wɔbaajie suɔmɔ ni wɔyɔɔ kɛha lɛ lɛ kpo wɔtsɔɔ kɛya naanɔ! Afi nɛɛ Kaimɔ lɛ yeli baaye abua koni wɔwaje nakai faishitswaa lɛ.