Ní Wɔɔha Ale Yehowa Gbɛi lɛ yɛ Shikpɔŋ lɛ nɔ Fɛɛ
1 Beni Yesu kɛ nitsumɔ wo ekaselɔi lɛ adɛŋ akɛ amɛye odase “kɛyashi shikpɔŋ lɛ naagbeehei lɛ,” no mli lɛ, étsɔ hiɛ efee nɔkwɛmɔnɔ efɔ̃ shi kɛha amɛ ni amɛnyiɛ sɛɛ. (Bɔf. 1:8) Be fɛɛ be kɛ he fɛɛ he ni enaa gbɔmɛi yɛ lɛ, ewieɔ Nyɔŋmɔ yiŋtoo kɛha adesai lɛ he sane. Yɛ Yesu kasemɔ mli lɛ, tsulɔ anɔkwafo kuu lɛ kɛ gbɛ̀i srɔtoi babaoo miitsu nii ní ekɛha ale Yehowa gbɛi lɛ “yɛ shikpɔŋ muu lɛ fɛɛ nɔ!”—Yes. 12:4, 5.
2 Nɔ ni Afee yɛ Be ni Eho lɛ Mli: Yɛ afii ni eho lɛ amli lɛ, akala shiɛmɔ wiemɔi yɛ adafitswaa woji amli; afee “Photo-Drama of Creation” sini lɛ ni ajie atsɔɔ gbɔmɛi akpekpei abɔ; akɛ kar ni akɛtswaa wiemɔi etsu nii; ni akɛ gramafoŋ tsu nii babaoo diɛŋtsɛ, ni yɛ be ko mli lɛ, akɛ redio hu tsu nii—ni akɛshiɛ sanekpakpa lɛ. Eji anɔkwale akɛ, amaa nɔ mi be fɛɛ be akɛ esa akɛ nine ashɛ gbɔmɛi lɛ anɔ diɛŋtsɛ bɔni afee ni anyɛ adi miishɛɛ ni amɛjieɔ lɛ kpo lɛ sɛɛ. Enɛ hewɔ lɛ, shia kɛ shia shiɛmɔ nitsumɔ lɛ efee gbɛ ni hi fe fɛɛ ni atsɔɔ nɔ ahaa aleɔ Yehowa gbɛi lɛ yɛ he fɛɛ he.—Bɔf. 5:42.
3 Mɛni Afeɔ yɛ Wɔgbii Nɛɛ Amli: Yɛ bei ni tsakeɔ nɛɛ hewɔ lɛ, je lɛ hiɛ foi waa diɛŋtsɛ, ni yɛ hei babaoo lɛ, afɔɔɔ gbɔmɛi namɔ yɛ shia. Mɛi fioo pɛ sumɔɔ ni amɛhe be ni amɛkɛkane mumɔŋ nibii ni amɛjwɛŋ nɔ. No hewɔ lɛ, esa akɛ wɔtsake wɔshiɛmɔ nitsumɔ lɛ mli nakai nɔŋŋ. Kɛfata shikpɔŋkuku lɛ ni wɔɔgbe emli nitsumɔ naa kɛtsɔ shia kɛ shia nɔ lɛ he lɛ, awo wɔ hewalɛ ni wɔya he ni gbɔmɛi lɛ yɔɔ lɛ ni ‘wɔfee klalo be fɛɛ be’ ni wɔkɛfã hiɛnɔkamɔ ni yɔɔ wɔmli lɛ he. (1 Pet. 3:15) Enɛ tsɔɔ akɛ, esa akɛ wɔbɔ mɔdɛŋ ni wɔshiɛ wɔtsɔɔ wɔnanemɛi nitsulɔi, skulbii, gbɔmɛi ni wɔkɛkpeɔ yɛ gbɛjegbɛi anɔ kɛ hei ni akɛ tsɔnei mamɔɔ, shwapoi anaa, kɛ he fɛɛ he ni abaanyɛ ana gbɔmɛi yɛ. Akɛni wɔyɛ Yehowa sɛɛfimɔ hewɔ lɛ, wɔmɔdɛŋbɔi lɛ yeɔ omanye. Ani ooná gbɔmɛi ni nine aaashɛ amɛnɔ yɛ he fɛɛ he ni amɛyɔɔ lɛ mli gbɛfaŋnɔ?
4 Eba akɛ wɔteŋ mɔ fɛɛ mɔ aaatsɔ gbɛ fɛɛ gbɛ ní eeenyɛ nɔ ní eha ale Yehowa gbɛi lɛ yɛ wɔshikpɔŋkuku lɛ mli. Wɔbaanyɛ wɔná tsui ni nyɔɔ mɔ mli babaoo kɛji wɔtsu wɔshiɛmɔ nitsumɔ lɛ wɔgbe naa yɛ be mli ni wɔkwɛɔ Yehowa gbɛ ni egbala mɛi ni yɔɔ tsui ni ja lɛ.—Yoh. 6:44.