Gbi Kome Kpee Krɛdɛɛ He Gbɛjianɔtoo Hee

‘Feemɔ Nɔ Fɛɛ Nɔ yɛ Sanekpakpa lɛ Hewɔ’ ji gbi kome kpee krɛdɛɛ he gbɛjianɔtoo hee ni baaje shishi yɛ August mli lɛ yitso. (1 Kor. 9:23) Maŋtsɛyeli sanekpakpa lɛ ji shɛɛ sane ni he hiaa fe fɛɛ ni anuɔ ŋmɛnɛ. Gbɛjianɔtoo lɛ baaye abua wɔ koni wɔhiɛ asɔ hegbɛ ni nɔ bɛ ni wɔyɔɔ akɛ wɔtsɔmɔ shɛɛ sane ni yɔɔ naakpɛɛ nɛɛ he adafitswalɔi. Ebaawo wɔ hewalɛ hu koni wɔya nɔ wɔshiɛ sanekpakpa lɛ ni wɔkafɔ̃ɔ.​—⁠Bɔf. 5:⁠42.

Gbɛjianɔtoo lɛ baatsɔɔ wɔ bɔ ni esa akɛ wɔtsuɔ wɔ teokrase tsɔsemɔ lɛ he nii kɛmɔɔ shi, bɔni afee ni wɔnyɛ wɔgbe sɔɔmɔ nitsumɔ lɛ babaoo naa. Wɔbaabo mɛi komɛi ni eto amɛshihilɛi ahe gbɛjianɔ koni amɛlɛɛ amɛsɔɔmɔ lɛ mli lɛ toi, ni mɛi ni fata he ji obalahii kɛ obalayei ni miifee nɔ fɛɛ nɔ koni amɛha sanekpakpa lɛ ashwere.​—⁠Okɛto Filipibii 2:⁠22 he.

Wiemɔ oti, ni kpokpaa wulu nɔkwɛlɔ lɛ loo wielɔ ni afɔ̃ lɛ nine lɛ kɛbaaha lɛ baama bɔ ni ehe hiaa akɛ wɔhiɔ shi akɛ “mɛi ni sa akɛ atuu sanekpakpa lɛ awo wɔdɛŋ” lɛ nɔ mi. (1 Tes. 2:⁠4) Abaaye abua wɔ koni wɔna akɛ, kɛ́ wɔɔhi shi akɛ mɛi ni sa akɛ amɛhiɔ hegbɛ ni ji gbɛfaŋnɔ ni anaa yɛ sanekpakpa ni akɛhaa mɛi krokomɛi lɛ mli lɛ mli lɛ, belɛ esa akɛ be fɛɛ be lɛ wɔfee mɛi ni shɛɔ Nyɔŋmɔ taomɔ nii kɛ ejalɛ tɛi lɛ ahe yɛ wɔsusumɔ kɛ nifeemɔ mli. Abaama jɔɔmɔi ni wɔnine shɛɔ nɔ yɛ enɛ feemɔ mli lɛ hu nɔ mi.

Kaaha gbɛjianɔtoo ni he hiaa nɛɛ miiŋmɛɛ bo. Esa akɛ mɛi heei ni ejɔɔ amɛhe nɔ, ni miisumɔ koni abaptisi amɛ yɛ gbi kome kpee krɛdɛɛ nɛɛ shishi lɛ abɔ onukpai asɛinɔtalɔ lɛ amaniɛ amrɔ nɔŋŋ. Fɔ̃ɔ mɛi fɛɛ ni okɛ amɛ kaseɔ nii lɛ nine koni amɛya. Nyɛhaa wɔŋmɛa Yehowa gbɛ koni ewo wɔ hewalɛ ni wɔfee nɔ fɛɛ nɔ yɛ sanekpakpa lɛ hewɔ, koni wɔgbe nitsumɔ ni da fe fɛɛ nɛɛ naa yɛ be nɛɛ mli ni etsɛŋ kwraa ni Harmagedon baaba lɛ.