Sanebimɔ He

◼ Mɛɛ henɔkwɛmɔ jogbaŋŋ he hiaa yɛ nuu kɛ yoo teŋ shãramɔ mli yɛ wɔshiɛmɔ nitsumɔ lɛ mli?

Wɔyɛ nɔ ni wɔɔdamɔ nɔ wɔkpa gbɛ akɛ wɔnyɛmimɛi hii kɛ wɔnyɛmimɛi yei lɛ toɔ amɛyiŋ akɛ amɛkɛ amɛhe aaakpɛtɛ jeŋba he tɛi ni nɔ kwɔlɔ fe fɛɛ yɛ amɛ diɛŋtsɛ amɛ jeŋba mli lɛ he kpɛŋŋ. Yɛ fɛɛ sɛɛ lɛ, jeŋ ni he tseee ni ŋmɛɔ nɔ fɛɛ nɔ feemɔ gbɛ ni yɔɔ jeŋba he naatsĩi fioo pɛ mli wɔyɔɔ lɛ. Yɛ be mli ni wɔɔhiɛ jwɛŋmɔ ni hi fe fɛɛ lɛ, esa akɛ wɔkwɛ wɔhe nɔ jogbaŋŋ be fɛɛ be, koni wɔkɛ heguɔgbee akaba wɔnɔ, loo ni wɔkɛ wɔhe akawo nɔ ko ni esaaa mli. Nɔ ni fata enɛ he ji, ni wɔɔkwɛ jogbaŋŋ yɛ be mli ni wɔkɛ wɔhe woɔ shiɛmɔ nitsumɔ lɛ mli lɛ.

Bei pii lɛ, wɔkɛ nuu loo yoo ni feɔ enii tamɔ nɔ ni eejie anɔkwa miishɛɛ kpo yɛ anɔkwale lɛ he lɛ kpeɔ yɛ shiɛmɔ nitsumɔ lɛ mli. Kɛ okome too otee shiɛmɔ ni nuu ji bo ni okɛ yoo loo yoo ji bo ni okɛ nuu kpe yɛ shinaa naa, ni mɔ kroko hu bɛ shia lɛ, bei pii lɛ, ebaahi jogbaŋŋ akɛ oooye lɛ odase yɛ shinaa lɛ naa fe ni ooobote tsũ lɛ mli. Kɛ ejie miishɛɛ kpo lɛ, obaanyɛ oto gbɛjianɔ koni oba ekoŋŋ beni shiɛlɔ kroko fata ohe loo yɛ be mli ni shia lɛ mli bii krokomɛi hu baahi shia lɛ. Kɛ enɛ ehiii feemɔ lɛ, ebaafee nɔ ni nilee yɔɔ mli akɛ okɛ shiatsɛ lɛ aaawo shiɛlɔ kroko ko ni tamɔ lɛ nɔŋŋ dɛŋ. Nakai nɔŋŋ eji be mli ni nuu ji bo ni okɛ yoo loo yoo ji bo ni okɛ nuu feɔ Biblia mli nikasemɔ lɛ.—Mat. 10:16.

Ehe miihia ni wɔkwɛ jogbaŋŋ, yɛ be mli ni wɔhalaa mɔ ko ni wɔkɛ lɛ baatsu nii yɛ shiɛmɔ nitsumɔ lɛ mli lɛ. Eyɛ mli akɛ shiɛlɔi ni ji nuu kɛ yoo baanyɛ atsu nii kutuu bei komɛi moŋ, shi esaaa akɛ enɛ yaa nɔ daa, ni enɛ baahi kɛ aaya lɛ kutuu. Taakɛ eji daa lɛ, kɛ wɔyɛ shiɛmɔ nitsumɔ lɛ mli po lɛ, nilee bɛ mli akɛ, kɛ nuu ji bo lɛ okɛ yoo loo kɛ yoo lɛ okɛ nuu ni jeee ogbalashihilɛ mli hefatalɔ lɛ pɛ baahi he ko banee. No hewɔ lɛ, esa akɛ nyɛmi nuu ni kwɛɔ shiɛmɔyaa kuu lɛ nɔ lɛ kɛ jwɛŋmɔ kpakpa atsu nii, yɛ be mli ni ejaa shiɛlɔi ni baatsu nii kutuu ni mɛi ni yeko afii 20 hu fata he lɛ.

Kɛ wɔkɛ jwɛŋmɔ kpakpa tsu nii be fɛɛ be lɛ, ‘wɔtoŋ’ wɔhe loo mɛi krokomɛi “pãmpi.”—2 Kor. 6:3.