Akɛ Mɛi Babaoo Miifata He
1 Taakɛ eji anɔkwale yɛ klɛŋklɛŋ afii oha lɛ mli lɛ, ŋmɛnɛ lɛ, shweremɔ ni Kristofoi asafo lɛ náa lɛ yɛ sɔrɔto kwraa. (Bɔf. 2:41; 4:4) Nyɛsɛɛ afi lɛ, abaptisi kaselɔi heei 366,579, nɔ ni kɛ aja mli lɛ, anáa gbɔmɛi 1,000 gbi fɛɛ gbi! Abaptisi gbɔmɛi fe akpekpe kome yɛ nyɛsɛɛ afii etɛ ni ho lɛ mli. Lɛlɛŋ, Yehowa etee nɔ ekɛ heyelilɔi babaoo miifata he.—Bɔf. 5:14.
2 Yelikɛbuamɔ kɛ tsɔsemɔ ni jɛ mɛi ni he wa yɛ hemɔkɛyeli lɛ mli lɛ ahe miihia mɛi heei babaoo ni bɛ Kristofoi ashihilɛ mli niiashikpamɔ lɛ. (Rom. 15:1) Mɛi komɛi yɛ mra be mli Kristofoi lɛ ateŋ, ni yɛ amɛbaptisimɔ lɛ sɛɛ afii komɛi po lɛ, ‘amɛfooo mli kɛyaaa dalɛ mli.’ (Heb. 5:12; 6:1) No hewɔ ni Paulo ma hei ni he hiaa ni Kristofoi adara yɛ mumɔŋ yɛ lɛ nɔ mi yɛ ewolo ni eŋma eyaha Hebribii lɛ mli lɛ. Mɛni ji enɛɛmɛi, ni abaanyɛ akɛ yelikɛbuamɔ ni he hiaa lɛ aha yɛ mɛɛ gbɛ nɔ?
3 Ní Aaana Nikasemɔ Sui Kpakpai: Yɛ Paulo gbɛtsɔɔmɔ lɛ kɛ gbeekpãmɔ naa lɛ, ní aaatsɔ nikaselɔ kpakpa lɛ biɔ ni akase “niyenii kpakpa” ni Yehowa gbɛjianɔtoo lɛ kɛhaa lɛ jogbaŋŋ kɛmɔ shi, ni atĩ mli, ni akɛtsu nii. (Heb. 5:13, 14; kwɛmɔ August 15, 1993 Buu-Mɔɔ, baafãi 12-17.) Kɛtsɔ mumɔŋ saji ni okɛ heyelilɔi heei aaagba, ni okɛ amɛ aaasusu anɔkwale ni tamɔ ojarawa tɛi ni okase yɛ oteemɔŋ nikasemɔ mli lɛ nɔ lɛ, obaawo amɛ hewalɛ ni amɛna nikasemɔ sui kpakpai. Ekolɛ, yɛ bei komɛi amli lɛ, obaanyɛ ofɔ̃ mɔ hee ko nine ni ebafata ohe yɛ oteemɔŋ nikasemɔ loo weku nikasemɔ mli.
4 Kpeei ni Abaaya Daa: Nɔkwɛmɔ nɔ ni ofeɔ yɛ anɔkwayeli mli, kɛ ekãawoo wiemɔi ni suɔmɔ yɔɔ mli lɛ, baaye abua mɛi heei ni yɔɔ asafo lɛ mli lɛ, ni amɛtsi amɛhe kɛjɛ nɔ kroko ni gbaa mɔ naa ni Paulo tsĩ tã lɛ he—Kristofoi akpeei ni ayaaa taakɛ mɛi komɛi “fɔɔ feemɔ” lɛ. (Heb. 10:24, 25) Ye obua amɛ ni amɛle jogbaŋŋ akɛ kpeei lɛ ji nɔ ni amɛwala damɔ nɔ yɛ mumɔŋ yɛ asafo lɛ mli. Tsɔ hiɛ ni oha amɛna miishɛɛ akɛ amɛfata wɔ nyɛmifeemɔ lɛ he.
5 Hekɛnɔfɔɔ ni Akɛaaya Yehowa Ŋɔɔ: Bɔni afee ni wɔye helooŋ gbɔjɔmɔi kɛ wɔtɔmɔi anɔ kunim lɛ, esa akɛ wɔkwɛ Yehowa gbɛ yɛ sɔlemɔ mli, ni wɔtsɔɔ lɛ bɔ ni wɔsusuɔ nii ahe waa wɔhaa, kɛ nibii ni gbaa wɔnaa waa. Taakɛ Paulo wo hewalɛ lɛ, esa akɛ mɛi heei lɛ akase akɛ, kɛtsɔ Yehowa dɛŋ yelikɛbuamɔ ni amɛaabi lɛ nɔ lɛ, ehe ehiaaa ni amɛshashao shi. (Heb. 4:15, 16; 10:22) Bo diɛŋtsɛ oniiashikpamɔi ni kɔɔ enɛ he ni ooogba mɔ hee lɛ, baawo hekɛnɔfɔɔ ni eyɔɔ akɛ Yehowa boɔ sɔlemɔi ni jɛ tsuiŋ atoi lɛ mli hewalɛ.
6 Be he Gbɛjianɔ ni Aaato Kɛha Sɔɔmɔ Nitsumɔ Lɛ: Paulo tsɔɔ hu akɛ, kɛ wɔkɛ ‘yijiemɔ afɔle haa Nyɔŋmɔ daa’ lɛ, ewoɔ mɔ hewalɛ yɛ mumɔŋ. (Heb. 13:15) Ani obaanyɛ ofɔ̃ shiɛlɔ hee ko nine ni ebafata ohe yɛ otsi lɛ mli gbɛjianɔ sɔrɔtoi ni oto kɛha shiɛmɔ nitsumɔ lɛ mli? Ekolɛ, nyɛyi enyɔ lɛ fɛɛ baanyɛ ni nyɛsaa nyɛhe yɛ shiɛmɔ wiemɔi ni akɛtsuɔ nii lɛ mli, loo nyɛsusu sɔɔmɔ nitsumɔ lɛ fã ko ni mɔ hee lɛ ekako eko feemɔ dã lɛ he.
7 Gbɔmɛi babaoo ni akɛfataa he lɛ haa wɔnaa miishɛɛ babaoo. Wɔhe ni wɔkɛaawo mɛi heei ni yɔɔ asafo lɛ mli lɛ atsɔsemɔ kɛ ŋaawoo mli waa lɛ baaye abua amɛ ni amɛna hemɔkɛyeli ni mli wa ni he hiaa, koni ‘amɛkɛbaa amɛsusumai ayi’ lɛ.—Heb. 3:12, 13; 10:39.