Ani Oona akɛ Hiamɔ ko Yɛ?
1 Awie Yehowa he akɛ Yelikɛbuamɔ kɛ Abobaa He. Wɔle akɛ wɔbaanyɛ wɔya eŋɔɔ yɛ hiamɔ be mli ni ebaaye ebua wɔ. (Lala 18:2; 46:2) Wɔbaanyɛ wɔkase esubaŋ ni tsɔɔ henumɔ ni ejieɔ lɛ kpo nɛɛ kɛtsɔ mɛi krokomɛi ni wɔkɛ wɔhe aaaha ni wɔye wɔbua amɛ beni wɔna hiamɔ ko lɛ.
2 Mɛni kanyaa mɔ ko koni ebɔ mɔdɛŋ eyaye ebua mɔ kroko lɛ? Mɛi pii naa enɛ akɛ nifeemɔ ko ni tsɔɔ suɔmɔ kɛ mɔbɔnalɛ. Eka shi faŋŋ akɛ Nyɔŋmɔ Wiemɔ lɛ woɔ he hewalɛ. (Rom. 15:1) Paulo wo wɔ hewalɛ koni ‘wɔkafo wɔnɔ mli, shi wɔfo wɔnaanyo nɔ mli.’—Filip. 2:4.
3 Enɛ ji nɔ ko ni wɔ fɛɛ wɔbaanyɛ wɔna efeemɔ mli miishɛɛ. (Bɔf. 20:35) Paulo hala Timoteo ni edako lɛ akɛ nɔkwɛmɔ nɔ ni tsɔɔ mɔ ko ni enyɛmimɛi lɛ “he sane dɔɔ lɛ krɔŋŋ.” (Filip. 2:20) Ehi akɛ wɔyɛ obalahii kɛ obalayei bibii pii yɛ asafoi lɛ amli ŋmɛnɛ ni hiɛ subaŋ ni tamɔ nakai nɔŋŋ. Shi kɛ gbekɛbii loo onukpai ji wɔ hu lɛ, nibii yɛ ni wɔbaanyɛ wɔfee kɛ wɔna hiamɔ nii ko.
4 Ani onu he pɛŋ akɛ mɛi komɛi yɛ hiamɔ nii ni abaanyɛ asusu he jogbaŋŋ? Ekolɛ nyɛmi nuu loo nyɛmi yoo ko eyaje helatsamɔ he, ni mɛi fioo ko basara lɛ; loo mɔ ko bakumɔ yɛ gbɔmɔtsoŋ, shi mɔ ko bɛ ni baaye abua lɛ kɛfee nii loo ni eye ebua kɛ shia nitsumɔi. Yesu buɔ mɛi ni sɔmɔɔ Yehowa lɛ akɛ weku ko mlibii ni miisɔmɔ amɛhe yɛ anɔkwayeli mli. (Mar. 3:33-35) Etsɔɔ yɛ gwaŋtɛi kɛ abotiai ahe abɛbua lɛ mli akɛ, mɛi ni naa Maŋtsɛ lɛ ninejurɔ nɔ duromɔ mli ŋɔɔmɔ lɛ nine shɛɔ nɔ yɛ yelikɛbuamɔ ni amɛkɛha Maŋtsɛ lɛ nyɛmimɛi lɛ hewɔ.—Mat. 25:40.
5 Te Mafee Tɛŋŋ Maye Mabua? Mɛni abaanyɛ afee ni akɛye abua be mli ni hiamɔ ko ni yɔɔ faŋŋ eba lɛ? Ani wɔbaanyɛ wɔtsɔ hiɛ wɔye wɔbua yɛ gbɛ ko nɔ? Ekolɛ mɛi ni edara yɛ ni hewalɛwoo he miihia amɛ, shi amɛbɛ nanemɛi ni bɛŋkɛ amɛ ni baaye abua amɛ. Ekolɛ obalahii kɛ obalayei bibii yɛ ni yelikɛbuamɔ he miihia amɛ. Ekolɛ weku hee ni yɔɔ wiemɔ lɛ he miishɛɛ ni gbekɛbii fa yɛ mli lɛ eba Maŋtsɛyeli Asa lɛ nɔ, shi shiɛlɔ ni kɛ amɛ kaseɔ nii lɛ bɛ jɛmɛ. Ekolɛ amɛhiɛ aaasɔ akɛ mɔ ko kɛ ehe aaaha ni eye ebua kɛha gbekɛbii lɛ anɔkwɛmɔ.
6 Yɛ be mli ni suɔmɔ ni wɔyɔɔ kɛha anɔkwale lɛ kɛ Yehowa gbɛjianɔtoo lɛ faa kɛyaa hiɛ lɛ, hiɛsɔɔ ni wɔyɔɔ kɛ mɛi krokomɛi ni yɔɔ asafo lɛ mli lɛ ahesusumɔ lɛ hu faa babaoo. Paulo wo hewalɛ ni wɔlɛɛ mli yɛ nɛkɛ gbɛ nɔ. (2 Kor. 6:11-13) Yesu ma nɔ mi akɛ suɔmɔ ni wɔjieɔ lɛ kpo wɔtsɔɔ wɔhe lɛ ji gbɛ titri ni wɔtsɔɔ nɔ wɔkɛtsɔɔ akɛ esɛɛnyiɛlɔi ji wɔ lɛlɛŋ.—Yoh. 13:35.
7 No hewɔ lɛ kɛ wɔna hiamɔ ko lɛ, esa akɛ anɔkwa suɔmɔ kɛha wɔ nyɛmimɛi kɛ asafo lɛ atsirɛ wɔ ni wɔtsɔ hiɛ wɔye wɔbua yɛ gbɛ fɛɛ gbɛ ni wɔbaanyɛ nɔ. (Gal. 6:9, 10) Mɛi krokomɛi ahesusumɔ nɛɛ gbalaa wɔ kɛbɛŋkɛɔ wɔhe kpaakpa yɛ suɔmɔ kɛ ekomefeemɔ kpaai amli. (1 Kor. 10:24) Nɛkɛ gbɛ nɔ wɔtsɔɔ wɔtsuɔ wɔ gbɛfaŋnɔ koni wɔkɛye wɔbua ni atsu hiamɔ ko he nii yɛ asafo lɛ mli.