Wɔ Maŋtsɛyeli Ekomefeemɔ lɛ Mli ni Wɔɔhiɛ Daa
1 Nyɔŋmɔ Maŋtsɛyeli lɛ ji nɔyeli diɛŋtsɛ ni yɔɔ hewalɛ kɛ hegbɛ. No ji Yesu shiɛmɔ lɛ yitso. (Mat. 4:17) Mɛi krokomɛi ni aaatsɔɔ amɛ nii kɛ Maŋtsɛyeli anɔkwale lɛ he odaseyeli ji Yesu sɔɔmɔ nitsumɔ lɛ fa titri. Etsɔɔ wɔ ni wɔsɔle wɔbi Maŋtsɛyeli lɛ ni wɔya nɔ wɔtao no klɛŋklɛŋ. (Mat. 6:9, 10, 33) Ni wɔɔya nɔ wɔhi Yehowa gbɛjianɔtoo lɛ masɛi kpaakpa, ni wɔtsu wɔshiɛmɔ ni akɛwo wɔdɛŋ lɛ he nii, kɛ je lɛ ni wɔɔtsi wɔhe kɛaajɛ he lɛ yeɔ buaa wɔ koni wɔya nɔ wɔhiɛ wɔ Maŋtsɛyeli ekomefeemɔ lɛ mli. Wɔtsɔɔ wɔ nifeemɔi kɛ wiemɔi anɔ wɔtsɔɔ akɛ wɔfiɔ Maŋtsɛyeli lɛ sɛɛ.—Yoh. 18:37.
2 Kɛjɛ 1914 kɛbaa nɛɛ, Maŋtsɛyeli lɛ ebatsɔ nɔ ni yɔɔ diɛŋtsɛ kɛha majianɔ bii akpekpei abɔ. Esoro ekomefeemɔ ni Maŋtsɛyeli lɛ shishibii nɛɛ jieɔ lɛ kpo lɛ kwraa yɛ je ni mli egbala he. Esa akɛ wɔha Maŋtsɛyeli lɛ afee nɔ ni yɔɔ diɛŋtsɛ yɛ wɔ shihilɛi amli, kɛ́ eeefee hewalɛ ko ni feɔ mɛi ekome lɛ. Mɛni haa efeɔ nɔ ni yɔɔ diɛŋtsɛ kɛhaa wɔ lɛ?
3 Taakɛ nɔyelii krokomɛi yɔɔ lɛ, Maŋtsɛyeli lɛ yɛ mlai ni ato ashwie shi. Kɛlɛ, nɔ ni haa esoroɔ no ji akɛ, emlai lɛ yɛ Biblia lɛ mli. Nyɔŋmɔ Wiemɔ lɛ kanemɔ daa lɛ kɛ nɔ ni abiɔ kɛjɛɔ wɔdɛŋ akɛ Maŋtsɛyeli lɛ shishibii lɛ he kaimɔi ni he hiaa lɛ haa wɔ. Wɔ woji lɛ ni wɔkɛaafee teemɔŋ nikasemɔ kɛ gbɛtsɔɔmɔ ni jɛɔ “tsulɔ anɔkwafo kɛ nilelɔ” lɛ ŋɔɔ lɛ yeɔ ebuaa wɔ koni wɔkɛ Nyɔŋmɔ mlai atsu nii yɛ wɔ daa gbi shihilɛi amli. (Mat. 24:45) Be mli ni wɔkɛtsuɔ nii yɛ nakai gbɛ nɔ lɛ, Maŋtsɛyeli lɛ bafeɔ nɔ ni yɔɔ diɛŋtsɛ kɛhaa wɔ babaoo, ni etsiɔ wɔ kɛbɛŋkɛɔ wɔhe kpaakpa yɛ jeŋ muu fɛɛ nyɛmimɛi ekomefeemɔ mli, ni efeɔ wɔ jálɔi aweku kome, yɛ Yesu nɔyeli shishi.
4 Ekomefeemɔ Kɛtsɔ Maŋtsɛyeli Shiɛmɔ Nɔ: Nitsumɔ ni akɛwo wɔdɛŋ ji ni wɔshiɛ Maŋtsɛyeli lɛ he sanekpakpa lɛ “kɛyashi shikpɔŋ lɛ naagbee hei lɛ.” (Bɔf. 1:8) Ni aaashiɛ “kɛ jwɛŋmɔ kome” lɛ feɔ wɔ ekome be mli ni wɔbɔɔ mɔdɛŋ ni ‘wɔwo’ Yehowa “hiɛ nyam” lɛ. (Rom. 15:5, 6) Ni wɔkɛ wɔ nanemɛi nitsulɔi ni yɔɔ jeŋ fɛɛ lɛ aaatsu he nii yɛ ekãa mli lɛ woɔ wɔ hemɔkɛyeli hewalɛ, ni eŋmɛɔ gbɛ ni Yehowa mumɔ lɛ tsuɔ nii kɛtsɔɔ wɔmli koni wɔtsu eyiŋtoo he nii. “Babaoo ni ayɔɔ feemɔ yɛ Nuntsɔ lɛ nitsumɔ lɛ mli” lɛ haa ‘wɔfiɔ shi ni wɔgbugbaaa.’—1 Kor. 15:58, NW.
5 Satan bɔɔ mɔdɛŋ ni efite ekomefeemɔ ni wɔyɔɔ lɛ yɛ shikpɔji pii anɔ, kɛtsɔ wɔ shiɛmɔ nitsumɔ lɛ ni ekɛ ehe woɔ mli koni efite lɛ lɛ nɔ. Ekɛ gbɛi sɔrɔtoi fɛɛ tsuɔ nii bɔ ni ebaanyɛ koni etee mligbalamɔ kɛ yiŋfutumɔ shi, koni ebɔ mɔdɛŋ etee nɔmɔ kɛ béi ashi. (Abɛi 6:19; Gal. 5:19-21, 26) Ebaasumɔ ni wɔkɛ wɔhe awo je lɛŋ béi amli koni eha wɔfi afa kome sɛɛ yɛ maŋkwramɔ kɛ maŋ saji amli po. (Yak. 3:14-16) Ŋmalɛi lɛ woɔ wɔ ŋaa koni wɔte shi wɔwo ehewalɛ lɛ; kɛ jeee nakai lɛ, ebaami wɔ akɛ enaaloo. (1 Pet. 5:8, 9) Esaaa akɛ aŋmɛɔ gbɛ ni Maŋtsɛyeli hiɛnɔkamɔ ni yɔɔ diɛŋtsɛ lɛ laajeɔ kɛjɛɔ wɔ tsui kɛ jwɛŋmɔi amli.
6 Ekomefeemɔ ni wɔɔhiɛ mli lɛ biɔ jwɛŋmɔŋ toiŋjɔlɛ kɛ nilee ni jɛ ŋwɛi. Kɛ shihilɛi amli bawa, titri lɛ, kɛ ekɔɔ wɔ nyɛmimɛi ahe lɛ, esa akɛ wɔjie mumɔ lɛ yibii akpo, koni wɔha toiŋjɔlɛ aya nɔ. Je lɛŋ subaŋi, tamɔ henɔwomɔ, hetsɛ̃, kɛ mɛi ahiɛnyam taomɔ gbalaa mɛi ateŋ ni esa akɛ aye nomɛi anɔ. (Efes. 4:1-3; Kol. 3:5-10, 12-14) Ehe miihia ni wɔha susumɔi kpakpai ni tswaa mɔ maa shi ayi wɔjwɛŋmɔ mli obɔ. Maŋtsɛyeli lɛ ji nɔ ni yɔɔ diɛŋtsɛ yɛ wɔ shihilɛi amli! Shi esa akɛ wɔha wɔhiɛ ahi wɔhe nɔ, ni wɔha eya nɔ nakai!—Efes. 6:11, 13.
7 Wɔ Maŋtsɛyeli hiɛnɔkamɔ ni yɔɔ diɛŋtsɛ ni yɔɔ naakpɛɛ lɛ feɔ wɔ ekome yɛ ekomefeemɔ mumɔ ni baŋ naagbee kɔkɔɔkɔ lɛ mli.—Lala 133:1.