Sanebimɔ He
◼ Kɛ mɔ ko kɛɛ akɛ, “Okɛ mi asɔle dã, koni no sɛɛ lɛ okɛ sane ni oyɔɔ lɛ aba” lɛ, ani esa akɛ Odasefonyo lɛ akpɛlɛ nɔ eha lɛ?
Esa akɛ akɛ sɔlemɔ aje Biblia mli nikasemɔi fɛɛ ni emɔ shi jogbaŋŋ lɛ shishi daa yɛ wɔ shia-kɛ-shia shiɛmɔ nitsumɔ lɛ mli. Wɔ sɔlemɔ ni biɔ Yehowa gbɛtsɔɔmɔ kɛ jɔɔmɔ lɛ tsɔɔ bɔ ni wɔkɛ wɔhe fɔɔ E-nɔ kɛ bɔ ni wɔkpɛlɛɔ E-nɔ akɛ Mɔ ni kudɔɔ saji ni wɔtsɔɔ lɛ.—Yes. 54:13.
Beni Yesu, sɔɔlɔ kɛ Maŋtsɛyeli lɛ he nitsɔɔlɔ ni he esa fe fɛɛ lɛ kwɛɔ kpee ko kɛha shiɛmɔyaa nɔ lɛ, ekɛ gbɛtsɔɔmɔi pɔtɛɛi komɛi ha koni ekɛye ebua ekaselɔi lɛ koni amɛfee mɛi ni ato amɛhe gbɛjianɔ jogbaŋŋ, kɛ bɔ ni amɛaafee amɛtsu shihilɛi ni mli wawai ahe nii yɛ sɔɔmɔ nitsumɔ lɛ mli. Yɛ nɔ najiaŋ ni eeebi koni amɛsɔle klɛŋklɛŋ koni akɛjɔɔ shiatsɛmɛi lɛ atsuii ahe lɛ, ekɛɛ akɛ: “Shi kɛ nyɛmiibote shia lɛ, nyɛŋaa lɛ,” ni “nyɛshiɛa nyɛkɛa akɛ: ‘Ŋwɛi maŋtsɛyeli lɛ eshɛ shi etã.’ ”—Mat. 10:7, 12.
Shi kɛlɛ, akɛni shiatsɛmɛi pii teeɔ shitee-kɛ-woo wiemɔ nɛɛ shi hewɔ lɛ, mɛni esa akɛ afee? Odasefoi pii ni he esa lɛ gbeleɔ mfoniri ni yɔɔ Obaanyɛ Ohi Shi wolo lɛ baafa 230 lɛ amrɔ nɔŋŋ, ni amɛkɛ hesaa tsɔɔ mli akɛ Odasefoi sɔleɔ ni amɛtsɔɔ sɔlemɔ po yɛ mɛi krokomɛi ashiai amli. Kɛkɛ lɛ amɛgbele ŋaawoi ni abaanyɛ akɛtsu nii ni yɔɔ Reasoning wolo lɛ baafa 295 lɛ amɛkɛma nɔ mi akɛ mɛi babaoo hu teeɔ sanebimɔ nɛɛ nɔŋŋ shi. No sɛɛ lɛ, amɛwoɔ shiatsɛ lɛ hewalɛ koni amɛbo toi beni amɛkaneɔ hetoo ni akɛha lɛ. Enɛ eye omanye bei pii.
Mɛi krokomɛi hu tsɔɔ ŋaa gbɛ nɔ amɛbiɔ shiatsɛ lɛ ni etsɔɔ he ni kɛɔ akɛ esa akɛ asɔle dani agba Biblia mli sane lɛ yɛ. Sane kroko ni sa kadimɔ waa ni jɛɔ shiatsɛ lɛ ŋɔɔ ji: Yesu kɛɛ, “He ni mɛi enyɔ loo mɛi etɛ ebua amɛhe naa yɛ, yɛ migbɛi anɔ lɛ, miyɛ amɛteŋ,” ni amɛkɛtsɛɔ Mateo 18:20 lɛ sɛɛ akɛ nɔ ni enɛ damɔ nɔ. Ni wɔɔye wɔbua mɛi komɛi koni amɛle akɛ wɔsɔleɔ dani wɔjeɔ wɔ asafoŋ kpeei ashishi kɛ agbɛnɛ hu dani wɔkɛ wɔ Biblia kaselɔi lɛ aaaje sanegbaa shishi lɛ eha amɛye shihilɛ lɛ nɔ kunim bei pii.
Yɛ hei ni efɔɔɔ kaa ni shiatsɛ lɛ feɔ shiŋŋ yɛ he akɛ asɔle dani agba sane ko lɛ, shiɛlɔi ni he esa lɛ ebi lɛ ni lɛ diɛŋtsɛ esɔle. Shi kɛlɛ, eka shi faŋŋ akɛ shiɛlɔ lɛ ekɛɛɛ “Amen” ni anuɔ loo nɔ ni anuuu lɛ ni ekɛkpɛlɛ nɔ yɛ sɔlemɔ lɛ naagbee mli. (Okɛto September 15, 1962 Buu-Mɔɔ lɛ baafai 575 kɛ 576 he.) Hei ni shiatsɛ lɛ ji yoo ni lɛ etsɔ hiɛ esɔle lɛ, nyɛmimɛi hii kɛ ŋmalɛi tamɔ 1 Timoteo 2:8, 11, 12 kɛ 1 Korintobii 14: 34, 35 lɛ etsu nii koni amɛkɛye amɛbua lɛ ni ele yoo gbɛfaŋnɔ yɛ Nyɔŋmɔ gbɛjianɔtoo lɛ mli.
Ŋwanejee ko bɛ he akɛ Satan kɛ esamaŋfoi lɛ etswa amɛ fai shi akɛ jeee akɛ amɛaafite Yehowa sɔɔlɔi ni ejɔɔ amɛhe nɔ lɛ atoiŋjɔlɛ kɛ amɛmiishɛɛ lɛ pɛ kɛkɛ yɛ sɔɔmɔ nitsumɔ lɛ mli yɛ naagbee gbii nɛɛ amli, shi eeeya nɔ emɔmɔ je lɛŋ bii lɛ amli tswɛ ni eŋmɛɛɛ amɛhe kwraa hu. (Yes. 42:6, 7) Mɛi ni kaa he amɛhiɔ shihilɛ ni ewo duŋ nɛɛ mli ni amɛyeee amɛhe oyai ‘kɛyaaa gɔji lɛ anɔ’ dani amanehulu kpeteŋkpele lɛ “fɛibe” lɛ aba lɛ baalaaje amɛwala. (Mat. 24:16, 20, 21) Abaanyɛ aye abua mɛi babaoo lolo koni amɛjo Satan nɔyeli niji ni mɔmɔɔ mɛi lɛ naa foi kɛtsɔ Nyɔŋmɔ Wiemɔ lɛ mli nitsɔɔmɔ ni mɔɔ shi lɛ nɔ, koni amɛna amɛkɛ Yehowa teŋ wekukpaa kpakpa.—Bɔf. 26:18.