1994 “Nyɔŋmɔ Gbeyeishemɔ” Yehowa Odasefoi a-Kpokpaa Wulu nɔ Kpee

¹ Anu wiemɔi ni taa mɔ tsuiŋ ni tsɔɔ bɔ ni hiɛ sɔ wiemɔi ahe gbɛjianɔtoo ni haa mɔ tsui nyɔɔ emli yɛ mumɔŋ lɛ he kɛjɛ mɛi 117,116 ni tee afi 1993 “Ŋwɛi Nitsɔɔmɔ” Kpokpaa Wulu nɔ kpeei yɛ Ghana lɛ ateŋ mɛi pii anaa. Abaptisi mɛi heei ni amɛyifalɛ sa kadimɔ ni ji 2,089 yɛ ŋwɛi nitsɔɔmɔ ni anaa yɛ Biblia lɛ mli lɛ toiboo hewɔ. Akɛni wɔna wiemɔi ahe gbɛjianɔtoo ni tswaa mɔ maa shi tamɔ nɛkɛ mli ŋɔɔmɔ yɛ nyɛsɛɛ afi lɛ mli hewɔ lɛ, esa akɛ no akanya wɔ lɛlɛŋ koni wɔbɔ mɔdɛŋ fɛɛ ni wɔɔnyɛ ni wɔyabo wiemɔi ni kanyaa mɔ ni ato he gbɛjianɔ kɛha “Nyɔŋmɔ Gbeyeishemɔ” Kpokpaa Wulu nɔ Kpeei ni abaafee lɛ toi. Yɛ naagbai pii ni adesai kɛkpeɔ ŋmɛnɛ lɛ fɛɛ sɛɛ lɛ, eka shi faŋŋ akɛ wɔ fɛɛ wɔbaabɔ mɔdɛŋ ni wɔ diɛŋtsɛ lɛ wɔya kpee lɛ koni wɔto gbɛjianɔ hu ni wɔ Biblia mli nikaselɔi kɛ wɔ aya. Ebaafee nɔ ni woɔ mɔ hewalɛ ni kanyaa mɔ diɛŋtsɛ yɛ be mli ni wɔyaa nɔ wɔkɛ Nyɔŋmɔ gbeyeishemɔ sɔmɔɔ Yehowa yɛ gbɛtsii nii fɛɛ ni baajie amɛhe kpo yɛ gbii ni jwere wɔhiɛ lɛ amli lɛ fɛɛ sɛɛ.

² Kwɛmɔ ni oto okpeeyaa lɛ he gbɛjianɔ jogbaŋŋ kɛ sɔlemɔ hu koni oba jɛmɛ ni onyɛ ona gbii etɛ lɛ fɛɛ mli mumɔŋ wiemɔi ni ŋɔɔ ni ato he gbɛjianɔ lɛ mli ŋɔɔmɔ, kɛjɛ be ni akɛ sɔlemɔ jeɔ shishi lɛ nɔ kɛyashi be ni akɛ sɔlemɔ aaakpa. Okɛ suɔmɔ atsu nii koni okɛ mɛi ni yelikɛbuamɔ he baahia amɛ lɛ afata ogbɛjianɔtoi lɛ ahe, titri lɛ mɛi heei ni yɔɔ wiemɔ lɛ he miishɛɛ lɛ, bɔni afee ni amɛ hu amɛnyɛ amɛyabo kpee lɛ fai sɔrɔtoi lɛ fɛɛ toi. Ebaaye ebua waa akɛ okɛ Biblia mli nikaselɔi fɛɛ ni baato gbɛjianɔ ni amɛya lɛ aaasusu sane ni yɔɔ nɔ ni aŋma ahɔ mli nɛɛ he. (Gal. 6:10) Wiemɔi ahe gbɛjianɔtoo lɛ kɛ lala baaje shishi Sohaa, 9:50 a.m. ni ebaaba naagbee aaafee 5:00 p.m. Gbɛjianɔtoo lɛ baaje shishi Hɔɔ, 9:00 a.m. ni ekɛ lala kɛ sɔlemɔ baagbe naa aaafee 5:00 p.m. Hɔgbaa leebi gbɛjianɔtoo lɛ baaje shishi 9:00 a.m., ni gbi lɛ gbɛjianɔtoo lɛ baagbe naa kwraa aaafee 4:15 p.m. Saji ni nyiɛ sɛɛ nɛɛ baaye abua bo yɛ gbɛjianɔ ni otoɔ kɛtsɔɔ hiɛ lɛ mli.

³ He Ni Obaaya Yɛ: Yɛ shihilɛi fɛɛ mli lɛ, he ni ato he gbɛjianɔ aha bo ni oya ji nɔ ni bɛŋkɛ asafo mli ni oyɔɔ lɛ fe fɛɛ lɛ. Ni aaana sɛii ni fa, woji, niyenii, wɔɔhei, kɛ ekrokomɛi lɛ damɔ jwɛŋmɔ ni ahiɛ akɛ shiɛlɔi lɛ ateŋ mɛi ni fa baaya kpee lɛ yɛ he ni ato gbɛjianɔ akɛ asafo ni amɛyɔɔ mli lɛ aya lɛ nɔ. Akɛ emli saji titrii lɛ eha yɛ nɔ ni aŋma ahɔ mli nɛɛ baafa 6. Belɛ, ehe miihia ni asafoi lɛ fɛɛ abɔ mɔdɛŋ ni amɛkɛ gbɛjianɔtoo ni atsɔɔ lɛ atsu nii. Titri lɛ yɛ asafoi ni yɔɔ maŋtiasei amli lɛ gbɛfaŋ.

⁴ Kɛ abaafee kpeei enyɔ yɛ wiemɔ kome too lɛ nɔŋŋ mli yɛ maŋtiase ko mli lɛ, nyɛmimɛi komɛi baasumɔ ni amɛya kpeei enyɔ lɛ fɛɛ. Yɛ be mli ni ŋwanejee ko bɛ he akɛ enɛ baaha amɛna hegbɛ kɛha hewalɛwoo babaoo lɛ, fɛɛ sɛɛ lɛ ekɛ naagbai baa yɛ nibii ni akɛtsuɔ nii ni akɛfeɔ kpee lɛ gbɛfaŋ, ni no haaa yiŋtoo hewɔ ni asumɔɔ ni mɛi ayifalɛ lɛ afee nɔ ni sa koni nitsumɔ ni tsɔɔ kpee lɛ hiɛ kɛ nɔ ni atsuɔ yɛ kpee lɛ sɛɛ lɛ akafa tsɔ lɛ aye omanye. Yɛ enɛ hewɔ lɛ wɔmiibi ni nyɛmimɛi ni yɔɔ maŋtiasei amli lɛ aya kpee ni ato aha amɛ yɛ nakai maŋtiase lɛ mli lɛ pɛ. Kɛ amɛmiitao ni amɛya kpee ni ji enyɔ, shi jeee yɛ maŋtiase nɛɛ nɔŋŋ mli lɛ, no lɛ ejeee naagba kɛha wɔ. Yɛ nyɛmimɛi ni akɛ kpee shishi nitsumɔi komɛi ni he hiaa woɔ amɛdɛŋ ni amɛtsuɔ he nii ni no hewɔ lɛ amɛnaaa hegbɛ ni amɛbo wiemɔi lɛ fai komɛi atoi lɛ agbɛfaŋ lɛ, aŋmɛɔ amɛ gbɛ ni amɛya kpee ni ji enyɔ ni abaafee yɛ nakai maŋtiase lɛ nɔŋŋ mli lɛ. Kɛfata he lɛ, kɛji wiemɔ he naagba hewɔ lɛ, nyɛmimɛi komɛi baasumɔ ni amɛya kpee lɛ yɛ maŋtiase kroko mli, shi jeee he ni atsɔɔ ni amɛ asafo lɛ aya lɛ, no hu gbɛ yɛ akɛ amɛfeɔ nakai.

⁵ Yɛ asafoi ni yɔɔ shɔŋŋ lɛ agbɛfaŋ lɛ, ekolɛ nibii tamɔ wiemɔ, gbɛ lɛ jɛkɛmɔ, kɛ tsɔne ni akɛbaaya lɛ baaha efee nɔ ni hi waa akɛ amɛaaya kpee lɛ yɛ he kroko moŋ fe he ni ato ni amɛya lɛ. Akɛ nɔkwɛmɔ nɔ lɛ, ekolɛ Kasoa kɛ Nyanyanu asafoi lɛ baasumɔ ni amɛya Accra “B” loo Accra “C” kpee lɛ fe ni amɛaaya Akim Oda. Nakai asafoi lɛ yɛ hegbɛ ni amɛhalaa he ni amɛbaaya. Shi kɛlɛ, esa akɛ asafoi ni baakpɛ yiŋ akɛ amɛbaaya kpee kroko ni jeee nɔ ni ato ni amɛya lɛ atswa kpokpaa nɔkwɛlɔ lɛ adafi kɛtsɔ hiɛ kwraa koni ekato amɛsaramɔ be he gbɛjianɔ kɛmiiha nakai otsi ni amɛbaaya kpee lɛ.

⁶ Ŋaawoi kɛha Tsu Taomɔ: Akɛ Room Request woji lɛ eko emaje asafo fɛɛ asafo. Ofainɛ ŋmaa Room Request wolo lɛ eko nɔ nii, kɛ ootao wɔɔhe kɛtsɔ kpee he gbɛjianɔtoo lɛ nɔ, koni okɛha asafo lɛ woloŋmalɔ lɛ ni ema nɔ mi, koni no sɛɛ lɛ okɛmaje kpee ni obaaya lɛ. ESAAA ni akɛ tsubimɔ woji kɛ kpee he woji krokomɛi ni aŋmalaa lɛ majeɔ nitsumɔ he nine ni yɔɔ Accra lɛ.

⁷ Hiamɔ Nii Krɛdɛɛ: Nɛkɛ gbɛjianɔtoo nɛɛ yɛ kɛha shiɛlɔi ni feɔ nɔkwɛmɔ nɔ kpakpa, kɛ amɛbii ni baa amɛjeŋ jogbaŋŋ ni Asafo Sɔɔmɔ Ajinafoi Akuu lɛ kpɛlɛɔ amɛnɔ lɛ pɛ. Esa akɛ asafoi ni mɛi ni yɔɔ hiamɔ nii krɛdɛɛ yɔɔ mli lɛ ato gbɛjianɔ ni amɛye amɛbua amɛ fe nɔ ni amɛkɛ gbɛnaa nii nɛɛ aaafɔ kpee gbɛjianɔtoo lɛ nɔ. Onukpai kɛ mɛi krokomɛi ni le mɔ aŋkro ko hiamɔ nii lɛ baanyɛ aye abua nakai mɔ lɛ yɛ suɔmɔ mli. Bei pii lɛ, enɛ biɔ ni shiɛlɔi asusu mɛi ni yɔɔ be-fɛɛ sɔɔmɔ lɛ mli, mɛi ni edara yɛ afii amli, mɛi ni bɛ gbɔmɔtsoŋ hewalɛ, kɛ ekolɛ mɛi krokomɛi lɛ ahiamɔ nii ahe. Shiɛlɔi lɛ baanyɛ aye abua kɛtsɔ ya ni amɛkɛ amɛ aaaya loo amɛhiamɔ nii ni amɛaatsu he nii yɛ gbɛi krokomɛi anɔ lɛ nɔ.​—⁠Yak. 2:​15-17; 1 Yoh. 3:​17, 18.

⁸ Shi kɛlɛ, Rooming Department lɛ baabɔ mɔdɛŋ ni amɛna wɔɔhei ni sa kɛha shiɛlɔi ni yɔɔ hiamɔ nii krɛdɛɛ lɛ kɛ́ asafo lɛ mlibii nyɛŋ aye abua. Shiɛlɔi nɛɛ kɛ asafo lɛ woloŋmalɔ lɛ baagba amɛhiamɔ nii ahe sane. Esa akɛ woloŋmalɔ lɛ kɛ Asafo lɛ Sɔɔmɔ Ajinafoi awie he koni ekwɛ kɛji asafo lɛ baanyɛ aye abua aŋkroaŋkroi nɛɛ koni amɛna amɛ diɛŋtsɛ amɛ wɔɔhe. Kɛ asafo lɛ nyɛŋ aye abua lɛ, woloŋmalɔ lɛ baaha amɛ Room Request wolo lɛ eko. Mɔ ni taoɔ tsu lɛ baaŋma nɔ nii. No sɛɛ lɛ esa akɛ eha woloŋmalɔ lɛ nine ashɛ nɔ ekoŋŋ, ni lɛ hu ebaakwɛ kɛji nɔ fɛɛ nɔ ja yɛ nɔ lo, kɛ shihilɛ mli ni mɔ lɛ yɔɔ ni ehe hiaa akɛ atao tsu aha lɛ lɛ. Esa akɛ woloŋmalɔ lɛ aŋma wolo ni EKƐTSƆƆ MLI FITSOFITSO. Esa akɛ afee enɛɛmɛi fɛɛ kɛtsɔ hiɛ kwraa dani kpee be lɛ ashɛ. Kɛkɛ lɛ woloŋmalɔ lɛ kɛ tsubimɔ wolo lɛ baaha Rooming Department. Abaana mɔ ni biɔ tsu lɛ tɛɛ koni aha ni ele wɔɔhe lɛ he gbɛjianɔtoo.

⁹ Mɛi ni yɔɔ hiamɔ nii krɛdɛɛ lɛ afata Asafo lɛ Sɔɔmɔ Ajinafoi lɛ ateŋ mɔ kome he koni amɛyabi enɛ he sane yɛ Rooming Department kɛha amɛtsu ni akɛbaaha amɛ lɛ amrɔ nɔŋŋ ni amɛaashɛ he ni afeɔ kpee lɛ yɛ lɛ.

¹⁰ Ogbeekpamɔ He Miihia: Omanye ni nɛkɛ tsu taomɔ he gbɛjianɔtoo nɛɛ baaye lɛ damɔ mɛi fɛɛ ni ekɔɔ amɛhe lɛ agbeekpamɔ nɔ. (Heb. 13:17) No hewɔ lɛ, wɔmiibi ni mɔ fɛɛ mɔ kɛ Asafo lɛ tsu taomɔ he gbɛjianɔtoo lɛ atsu nii kwraa kɛmɔ shi ni amɛhi hei ni akɛha amɛ lɛ koni akafa tsɔ yɛ he kome.

¹¹ Niyenii He Gbɛjianɔtoo: Yɛ gbɛjianɔtoo ni haa wɔfeɔ nibii yɛ gbɛ ni yɔɔ mlɛo nɔ lɛ kɛ nitsumɔ hewɔ lɛ, abaato niyenii ni ehoomɔ waaa shi ehi jogbaŋŋ hu he gbɛjianɔ bɔni afee ni mɛi ni kɛ amɛhe eha ni amɛtsuɔ nii yɛ Food Service lɛ hu anyɛ ana mumɔŋ niyenii he gbɛjianɔtoo ni tswaa mɔ emaa shi lɛ he sɛɛ. Asafo lɛ hiɛ esɔ bɔ ni nyɛfi gbɛjianɔtoo nɛɛ sɛɛ yɛ tsutsu kpeei ni wɔfee lɛ ashishi lɛ waa diɛŋtsɛ, no hewɔ lɛ eewo wɔ hewalɛ ni wɔyahe niyenii ni abaato he gbɛjianɔ aha wɔ yɛ niyeli he lɛ, yɛ kpee lɛ shishi.

¹² Bolgatanga Kpee: Abaafee “Nyɔŋmɔ Gbeyeishemɔ” Kpokpaa Wulu nɔ Kpeei ni atoɔ he gbɛjianɔ lɛ naagbee nɔ yɛ Bolgatanga kɛjɛ January 6 kɛyashi 8, 1995. Abaawie Frafra kɛfata Twi wiemɔ lɛ he, taakɛ afee yɛ “Ŋwɛi Nitsɔɔmɔ” Kpokpaa Wulu nɔ Kpee lɛ shishi lɛ. Ehe bahia ni atsake he ni abaafee kpee lɛ yɛ lɛ kɛjɛ Tamale kɛya Bolgatanga yɛ béi ni yaa nɔ yɛ Kooyigbɛ Kpokpaa lɛ nɔ lɛ hewɔ. Aawo nyɛmimɛi fɛɛ ni jɛ wuoyigbɛ ni baanyɛ aya lɛ hewalɛ ni amɛya kpee nɛɛ, shi Asafo lɛ etoŋ bɔs krɛdɛɛ he gbɛjianɔ kɛhaŋ gbɛfaa lɛ afi nɛɛ. Aawo mɛi ni toɔ gbɛjianɔ koni amɛya lɛ hewalɛ ni amɛye odase tɛɛ ni amɛfee trukaa odaseyeli hu beni amɛyɔɔ Bolgatanga lɛ. Eyɛ mli akɛ Asafo lɛ etoŋ bɔs krɛdɛɛ he gbɛjianɔ afi nɛɛ moŋ, shi wɔmiiwo mɛi fɛɛ ni yɔɔ he miishɛɛ akɛ amɛaaya lɛ hewalɛ koni amɛbɔi amɛhe saamɔ kɛha kpee lɛ.

¹³ Nitsumɔ ni Tsɔɔ Kpee Hiɛ: Hiɛ esɔ enɛ he nii ni nyɛtsu yɛ tsutsu ko lɛ jogbaŋŋ. Taakɛ afɔɔ feemɔ lɛ, abaama agba, abaatao wɔɔhei, kɛ nitsumɔi krokomɛi. Wɔyɛ hiɛnɔkamɔ akɛ mɛi fɛɛ ni yɔɔ he ni abaafee kpee lɛ yɛ kɛ asafoi ni bɛŋkɛ jɛmɛ fɛɛ lɛ baato amɛ nitsumɔi ahe gbɛjianɔ koni amɛfata he kɛtsu nitsumɔ ni he hiaa nɛɛ kɛmɔ shi yɛ otsii lɛ anaagbee kɛ otsi lɛ mli gbii lɛ amli. Mɛi pii ni kɛ amɛhe baawo volunteer nitsumɔ lɛ mli koni amɛye amɛbua lɛ ahe baahia hu yɛ kpee lɛ shishi, no hewɔ lɛ okɛ oweku lɛ ato gbɛjianɔ koni nyɛfata he kɛtsu enɛ yɛ kpee ni nyɛbaaya lɛ shishi.

¹⁴ Kpee Shishi Badge kɛ nɔ ni Akɛhɔɔ Mli Lɛ: Aawo asafo fɛɛ asafo ŋaa ni amɛkɛ Literature Request Form (S-14) lɛ atsu nii ni amɛkɛshɛ badge kɛ plastic ni akɛhɔɔ mli lɛ kɛha “Nyɔŋmɔ Gbeyeishemɔ” Kpokpaa Wulu nɔ Kpeei lɛ. Nyɛfainɛ nyɛkwɛa ni nyɛŋmaa nɔ fɛɛ nɔ fɛfɛo yɛ nɔ ni nyɛkɛ klɛŋklɛŋ nɔ lɛ amajea Asafo lɛ AMRƆ NƆŊŊ koni anyɛ atsu kpee he nibii ni nyɛtaoɔ nɛɛ ahe nii yɛ be ni sa mli. Nyɛhaa ahia nyɛjwɛŋmɔ mli akɛ nyɛnaŋ badge kɛ nɔ ni akɛhɔɔ mli lɛ eko yɛ kpeei lɛ ashishi.

¹⁵ Lalai: Lalai ni ato he gbɛjianɔ akɛ abaala yɛ kpee lɛ shishi lɛ nyiɛ sɛɛ nɛɛ, ni ato naa yɛ bɔ ni amɛbaatsara nɔ lɛ naa: 53, 175, 85, 79, 187, 155, 19, 13, 47, 180, 177, 113, 143, 191, 33, 114, kɛ 222. Yɛ ŋaawoo ni akɛha yɛ Efesobii 5:19 lɛ hewɔ lɛ, aawo wɔ fɛɛ hewalɛ ni wɔfata he kɛla yɛ be mli ni atswaa saŋku-lalai lɛ yɛ kpeei lɛ ashishi lɛ.

¹⁶ Wiemɔi ni Amɔmɔɔ loo Video Mfoniri-Shamɔi: Asafo lɛ etoŋ gbɛjianɔ ko kɛhaŋ wiemɔi loo drama lɛ mɔɔmɔ yɛ kpaa nɔ. Esa akɛ aŋkroaŋkroi ni baamɔmɔ wiemɔi lɛ yɛ kpaai anɔ kɛha amɛhe lɛ afee nakai yɛ gbɛ ni gbaŋ mɛi ni eba kpee lɛ shishi lɛ anaa loo egbalaŋ amɛjwɛŋmɔ kɛjɛŋ wiemɔ lɛ nɔ. Titri lɛ, esaaa akɛ amɛtaa sarawa hewalɛ kpaa loo wiemɔi adekai lɛ asɛɛ kpaai lɛ ahe. Wɔhiɛ baasɔ ekome ni nyɛkɛ wɔ aaafee yɛ enɛ mli lɛ waa diɛŋtsɛ.

¹⁷ Naagbee: Wɔnine baashɛ nitsɔɔmɔ kɛ hewalɛwoo babaoo nɔ yɛ wɔ “Nyɔŋmɔ Gbeyeishemɔ” Kpokpaa Wulu nɔ Kpeei lɛ ashishi koni wɔdara yɛ Nyɔŋmɔ gbeyeishemɔ mli. Akɛ nitsɔɔmɔ ni tamɔ nɛkɛ baaha yɛ wiemɔi, nɔkwɛmɔ nii, kɛ drama kome mli, kɛfata niiashikpamɔi ni abaagba lɛ ahe. Eba akɛ Yehowa tsulɔ fɛɛ tsulɔ aaato gbɛjianɔ amrɔ nɛɛ koni ehi “Nyɔŋmɔ Gbeyeishemɔ” Kpokpaa Wulu nɔ Kpeei lɛ ashishi gbii etɛ lɛ fɛɛ kɛjɛ lala kɛ sɔlemɔ ni akɛgbeleɔ kpee lɛ nɔ yɛ Sohaa leebi kɛyashi naagbee sɔlemɔ lɛ nɔ yɛ Hɔgbaa shwane.

[Akrabatsa ni yɔɔ baafa 6]

1994 “NYƆŊMƆ GBEYEISHEMƆ” KPOKPAA WULU NƆ KPEEI

Gbii kɛ Hei ni Atsɔɔ ni Abaafee Yɛ

Dec 23-25, 1994 Accra “B” Twi 2A, 26

Takoradi “B” Twi/Fanti 24, 28

Kumasi “B” Twi 10, 35