Kpeei kɛha Shiɛmɔyaa ni He Baa Sɛɛnamɔ
1 Yɛ Luka 10:1-11 lɛ, wɔyɛ nɔ ni aŋma afɔ shi ni kɔɔ kpee ko ni Yesu kɛ kaselɔi heei 70 ni akɛ nitsumɔ wo amɛdɛŋ ni no aye abua amɛ ni amɛsaa amɛhe kɛha shiɛmɔ nitsumɔ lɛ fee lɛ he amaniɛbɔɔ. Ekɛ gbɛtsɔɔmɔi pɔtɛɛ komɛi ha koni eye ebua ni amɛfee mɛi ni ato amɛ gbɛjianɔ, ni amɛsaa amɛhe amɛha nɔ ni amɛaakɛɛ, ni amɛtsu shihilɛi ni mli wawai ahe nii. Wɔbaanyɛ wɔkase nii kɛtsɔ sane nɛɛ mlipɛimɔ nɔ.
2 Eka shi faŋŋ akɛ kaselɔi 70 lɛ fɛɛ ba koni amɛkɛ Yesu afee kpee lɛ. Afiteɔ be babaoo yɛ Kpeei ni afeɔ kɛha shiɛmɔyaa lɛ shishi kɛji aŋkroaŋkroi kpeɔ sɛɛ daa. Bei pii lɛ sɛɛ ni amɛkpeɔ lɛ haa ehe bahiaa ni atao hefatalɔi kɛha shiɛmɔyaa kɛ shikpɔŋkuku lɛ mli nitsumɔ he gbɛjianɔtoo kroko. Bei pii lɛ enɛ haa kuu muu lɛ fɛɛ kpeɔ sɛɛ. Wɔ fɛɛ wɔbaanyɛ wɔtsu wɔgbɛfaŋnɔ kɛtsɔ jɛmɛ ni wɔbaashɛ mra nɔ koni wɔfee kralo akɛ wɔɔya shikpɔŋkuku lɛ mli amrɔ nɔŋŋ.
3 Yesu kɛ saneyitso kɛha sanegbaa pɔtɛɛ ko ha kuu lɛ koni amɛkɛtsu nii, ni ji, “Nyɔŋmɔ maŋtsɛyeli lɛ.” (Luka 10:9) Akɛwo wɔdɛŋ ni wɔshiɛ nakai shɛɛ sane lɛ nɔŋŋ wɔtsɔɔ, ni bei pii lɛ wɔhiɛ sɔɔ ŋaawoi ni akɛhaa yɛ nɔ ni esa akɛ wɔkɛɛ lɛ he lɛ. Nikasemɔ nɔkwɛlɔ lɛ baanyɛ akwɛ Reasoning wolo lɛ, ni kɛ hiɛkpamɔ wiemɔi ni fa fe 40 kɛ Ŋmalɛi ni sa ni abaanyɛ akɛtsu nii yɛ shihilɛi sɔrɔtoi ashishi lɛ haa lɛ mli. Shiɛmɔ wiemɔ kome loo enyɔ ni abaakwɛ mli kuku lɛ baanyɛ aye abua wɔ ni wɔha nɔ ni wɔbaakɛɛ lɛ ahi wɔjwɛŋmɔ mli, ni no aye abua wɔ ni wɔkɛ ekãa babaoo awie yɛ shinaai anaa.
4 Jeee akɛ Yesu kɛɛ ekaselɔi lɛ nɔ ni amɛbaakɛɛ kɛkɛ shi ekɛɛ amɛ bɔ ni amɛaakɛɛ enɛ amɛha hu. (Luka 10:5,6) Nɔkwɛmɔ nii ni afeɔ yɛ Sɔɔmɔ Kpee he gbɛjianɔtoo lɛ mli lɛ tsɔɔ wɔ bɔ ni wɔwie ni emɔ shi hu. Nikasemɔ nɔkwɛlɔ lɛ baanyɛ akwɛ nɔ ni akɛha yɛ naagbee kpee lɛ mli lɛ ekoŋŋ ni ekɛ ŋaawoi ni tsɔɔ bɔ ni abaanyɛ akɛtsu nii yɛ shiɛmɔ mli nakai gbi lɛ aha. Ŋmalɛ mli shiɛmɔ wiemɔ ni waaa he nɔkwɛmɔ nɔ kuku baanyɛ aye abua koni wɔbua nii ni wɔsusuɔ he lɛ anaa ni wɔto naa wɔwo wiemɔi amli.
5 Yesu wo ekaselɔi lɛ ŋaa hu yɛ amɛjeŋba he. (Luka 10:7, 8) Nikasemɔ nɔkwɛlɔ lɛ baanyɛ ekɛ gbɛtsɔɔmɔ ni sa jogbaŋŋ hu aha ni no aye abua ni wɔkwa nɔ fɛɛ nɔ ni baajie wɔjwɛŋmɔ kɛjɛ wɔnitsumɔ lɛ nɔ lɛ. Ekolɛ ebaawo wɔ ŋaa yɛ wɔhe naa ni wɔɔbua yɛ gbɛjegbɛi akoji anaa loo yɛ be ni wɔfiteɔ ni wɔkɛ shitee-kɛ-wolɔi jeɔ ŋwane lɛ he. Ebaakai wɔ yɛ bɔ ni ehe hiaa ni wɔhiɛ shia-kɛ-shia kadimɔ wolo ni aŋmala nɔ nii jogbaŋŋ lɛ he. Ekolɛ ehe baahia ni akai fɔlɔi ni amɛkwɛ amɛbii anɔ jogbaŋŋ.
6 Kaselɔi 70 lɛ kɛ Yesu ŋaawoi lɛ tsu nii ni no sɛɛ lɛ “[amɛ]ku amɛsɛɛ amɛba kɛ miishɛɛ.” (Luka 10:17) Kɛ wɔkɛ gbɛtsɔɔmɔ ni wɔnine shɛɔ nɔ yɛ kpeei kɛha shiɛmɔyaa shishi lɛ tsu nii lɛ, wɔ hu wɔbaanyɛ wɔkpa gbɛ akɛ wɔɔna miishɛɛ babaoo yɛ Maŋtsɛyeli sane lɛ shiɛmɔ mli.—Bɔf. 13:48, 49, 52.