Nibii Fɔji Ebu yɛ He Fɛɛ He!

Ale yoo ko ni atsɛɔ lɛ Smita,a ni eye afii 35 ni yɔɔ Dhaka ni yɔɔ Bangladesh lɛ waa akɛ ejieɔ suɔmɔ kpo ni esusuɔ mɔ he waa. Mɛi le lɛ akɛ mɔ ko ni hiɛ wa kɛnitsumɔ ni yɔɔ miishɛɛ ni edako tsɔ ni sumɔɔ ni eye ebua mɛi ni amɛkase nɔ ni ekase yɛ Nyɔŋmɔ he lɛ. Kwɛ bɔ ni ewekumɛi kɛ enanemɛi lɛ anaa kpɛ amɛhe hã be ni hela ko tswa Smita ojo ni eyeee otsi ni egbo lɛ!

Ale James kɛ eŋa ni dara ko tsɔ ni yɔɔ amɛ afii 30 afii lɛ amli lɛ hu waa taakɛ ale Smita lɛ pɛpɛɛpɛ. Be ko, aaafee April mli lɛ, amɛtee amɛyasara amɛnaanyo ko yɛ Wuoyigbɛ Ŋshɔ lɛ Anaigbɛ yɛ United States. Amɛkuuu amɛsɛɛ dɔŋŋ kɛbaa amɛshĩa yɛ New York. Amɛná tsɔne mli oshara, ni amɛ fɛɛ amɛgboi, enɛ hã amɛsuɔlɔi kɛ mɛi ni amɛkɛtsuɔ nii lɛ werɛ ho amɛhe waa.

Ŋmɛnɛ lɛ, ehe ehiaaa ni oya shɔŋŋ dani ona akɛ efɔŋfeemɔ kɛ piŋmɔ ebu. Tai gbeɔ asraafoi kɛ mɛi ni jeee asraafoi fɛɛ. Aaye mɛi ni efeko nɔ ko awui. Osharai kɛ helai ni yɔɔ gbeyeigbeyei ninaa mɔ fɛɛ mɔ, ekɔɔɔ he eko afii abɔ ni mɔ ko eye loo hegbɛ ni mɔ ko yɔɔ. Adebɔɔ naa oshara kpataa maji ahiɛ ni eshiii eko kwraa. Hiɛaŋkwɛmɔ kɛ jalɛsane ni ayeee ebu yɛ he fɛɛ he. Ekolɛ, bo diɛŋtsɛ lɛ, aye bo sane fɔŋ pɛŋ.

Ejeee tɔmɔ akɛ mɔ ko baabi saji tamɔ:

• Mɛni hewɔ nibii fɔji baa mɛi kpakpai anɔ?

• Ani esa akɛ ashwa Nyɔŋmɔ yɛ nibii nɛɛ ahe?

• Ani osharai baa kɛkɛ, aloo adesai ji mɛi ni feɔ?

• Ani Karma, ni shishi ji, kɛ́ mɔ ko miipiŋ lɛ ejɛ esha ni efee dani egbo ni asaa afɔ lɛ ekoŋŋ lɛ, ji nɔ ni hãa epiŋɔ?

• Kɛ́ Nyɔŋmɔ ofe ko yɛ lɛ, mɛni hewɔ ebuuu mɛi kpakpai ahe kɛjɛɛɛ osharai ahe lɛ?

• Ani be ko baaba ni efɔŋfeemɔ kɛ nɔnaa bɛ dɔŋŋ?

Dani wɔbaanyɛ wɔhã sanebimɔi nɛɛ ahetoo lɛ, esa akɛ wɔnu hetoi kɛhã sanebimɔi enyɔ ni yɔɔ shishigbɛ nɛɛ lɛ ashishi: Mɛni hewɔ nibii fɔji baa be fɛɛ be, kɛ mɛni Nyɔŋmɔ baafee?