Mumɔ Krɔŋkrɔŋ Lɛ Mɛni Hewɔ Mɛi Ayiŋ Efutu Amɛ yɛ He Lɛ?

MƐNI ji mumɔ krɔŋkrɔŋ lɛ? Etamɔ nɔ ni sanebimɔ nɛɛ waaa kwraa, shi ehetoo lɛ námɔ baanyɛ afee nɔ ni wa. Pope Benedict XVI lɛ kɛɛ kuu ko yɛ Australia akɛ: “Etamɔ nɔ ni wɔnyɛŋ wɔnu nɔ ni Mumɔ lɛ ji lɛ shishi fitsofitso.”

Yɛ anɔkwale mli lɛ, mɛi hiɛ susumɔi babaoo yɛ sanebimɔ ni ji, Mɛni ji mumɔ krɔŋkrɔŋ lɛ? he, ni mɛi krokomɛi hu bɛ nɔmimaa yɛ nɔ ni mumɔ lɛ ji lɛ he. Naa hetoi komɛi ni mɛi komɛi haa yɛ sanebimɔ nɛɛ he:

• Eji mɔ ko diɛŋtsɛ ni yɔɔ Kristo kaselɔi lɛ amli.

• Ŋwɛi nilee, ni ji Nyɔŋmɔ mla ni miitsu nii.

• Gbɛ ni Nyɔŋmɔ tsɔɔ nɔ ejieɔ ehe shi yɛ je lɛ mli.

• Mɔ ni ji etɛ yɛ Triniti lɛ mli.

Mɛni hewɔ mɛi hiɛ susumɔi srɔtoi yɛ mumɔ krɔŋkrɔŋ lɛ he lɛ? Yiŋfutumɔ nɛɛ je shishi yɛ afi 300 Ŋ.B. afii lɛ amli, beni Nyɔŋmɔjamɔ he nilelɔi komɛi tsɔɔ akɛ mumɔ krɔŋkrɔŋ lɛ ji mɔ ko, ni yɛ gbɛ ko nɔ lɛ ekɛ Nyɔŋmɔ yeɔ egbɔ lɛ. Shi susumɔ nɛɛ bɛ Ŋmalɛi lɛ amli, ni asaŋ mra be mli Kristo sɛɛnyiɛlɔi lɛ hu ehiɛɛɛ susumɔ ni tamɔ nɛkɛ. Wolo ni ji New Catholic Encyclopedia lɛ tsɔɔ mli akɛ: “Kpaŋmɔ Momo lɛ etsɔɔɔ kɔkɔɔkɔ akɛ Nyɔŋmɔ mumɔ lɛ ji mɔ ko . . . Nyɔŋmɔ mumɔ lɛ ji Nyɔŋmɔ hewalɛ.” Nakai wolo lɛ nɔŋŋ kɛfata he akɛ: “Kpaŋmɔ Hee lɛ mli ŋmalɛi lɛ ateŋ babaoo wieɔ Nyɔŋmɔ mumɔ lɛ he akɛ eji nɔ̃ ko, shi jeee mɔ ko; anaa enɛ titri yɛ bɔ ni ŋmalɛi nɛɛ haa efeɔ faŋŋ akɛ tsakpãa ko kã mumɔ lɛ kɛ Nyɔŋmɔ hewalɛ lɛ teŋ lɛ mli.”

Shishinumɔ yɛ he akɛ, ewa kɛha mɛi akɛ amɛaasusu hewalɛ he akɛ eji mɔ ko. No hewɔ lɛ, niiamlipɛimɔ ko ni afee nyɛsɛɛ nɛɛ yɛ United States lɛ ha ana akɛ, mɛi babaoo ekpɛlɛɛɛ susumɔ ni ahiɛ akɛ mumɔ krɔŋkrɔŋ lɛ ji mɔ ko loo “nɔ̃ ko ni wala yɔɔ mli” lɛ nɔ. Ani amɛsusumɔ lɛ ja? Aloo esa akɛ wɔhe Nyɔŋmɔjamɔ he nilelɔi ni maa nɔ mi doo akɛ “Mumɔ Krɔŋkrɔŋ lɛ ji Mɔ ko diɛŋtsɛ ni esoro lɛ yɛ Tsɛ lɛ kɛ Bi lɛ he” lɛ wɔye?

Bɔni afee ni wɔná hetoo ni ja jogbaŋŋ lɛ, esa akɛ wɔkwɛ Nyɔŋmɔ Wiemɔ, ni ji Biblia lɛ, ni tsɔɔ nɔ ni mumɔ krɔŋkrɔŋ lɛ ji lɛ mli fitsofitso lɛ mli. Bɔfo Paulo ŋma akɛ: “Ŋmalɛ fɛɛ ŋmalɛ lɛ ejɛ Nyɔŋmɔ Mumɔ lɛ mli, ni ehe yɛ sɛɛnamɔ hã nitsɔ̃ɔmɔ kɛ hiɛkãmɔ.”—2 Timoteo 3:16, Ga Biblia hee.

Mɛni hewɔ esa akɛ otao anɔkwale ni kɔɔ mumɔ krɔŋkrɔŋ lɛ he lɛ? Ejaakɛ kɛ́ oná ole nakai anɔkwale lɛ, ebaanyɛ eha oná yelikɛbuamɔ kɛjɛ Nyɔŋmɔ ŋɔɔ. Ani bei komɛi lɛ, onuɔ he akɛ obɛ nyɛmɔ ni okɛaakpee shihilɛi komɛi ni okɛkpeɔ lɛ anaa? Yesu wo ekaselɔi lɛ ashi akɛ: “Nyɛbia, ni aaaha nyɛ . . . Kɛji . . . nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛ nɔŋŋ nyɛtsɛ ni yɔɔ ŋwɛi lɛ eŋɔŋ Mumɔ krɔŋkrɔŋ ehaŋ mɛi ni biɔ lɛ lɛ.”—Luka 11:9, 13.

Yɛ saji ni nyiɛ sɛɛ lɛ amli lɛ, wɔbaaha Ŋmalɛi lɛ atsɔɔ wɔ nɔ ni mumɔ krɔŋkrɔŋ lɛ ji. Agbɛnɛ hu, wɔbaana bɔ ni ebaanyɛ eye ebua wɔ yɛ wɔshihilɛ mli.

[Wiemɔ ni akɔ ni akɛmiitsu nii ni yɔɔ baafa 3]

Ŋmalɛi lɛ tsɔɔ wɔ nɔ ni mumɔ krɔŋkrɔŋ lɛ ji