Ani Jeŋ ni Ekomefeemɔ Yɔɔ Mli Baanyɛ Aba?

ANI wɔjeŋ nɛɛ miibɛŋkɛ toiŋjɔlɛ he aloo ema eyi shi kɛmiiya hiɛkpatamɔ mli? Etamɔ nɔ ni abaanyɛ akɛ sane naataamɔi ni kɔneɔ mɔ yiŋ aha yɛ susumɔi enyɔ nɛɛ eko fɛɛ eko he.

Yɛ gbɛ ko nɔ lɛ, je lɛŋ hiɛnyiɛlɔi lɛ ekomɛi kɛ hekɛnɔfɔɔ wieɔ jeŋ fɛɛ toiŋjɔlɛ he akɛ eji oti ko ni abaanyɛ ashɛ he, ejaakɛ amɛsusuɔ akɛ kɛji anáaa toiŋjɔlɛ yɛ jeŋ fɛɛ lɛ, nɔ ni baaba je lɛ nɔ wɔsɛɛ lɛ baafee nɔ ni yɔɔ gbeyei waa diɛŋtsɛ. Yɛ gbɛ kroko nɔ lɛ, mɛi babaoo hu atsuii fãa waa kɛji amɛnu sanebimɔi tamɔ enɛɛmɛi: Mɛɛ maji yɔɔ tawuu nibii ni kpataa nibii ahiɛ babaoo? Ani amɛkɛbaatsu nii? Mɛni baaba kɛji amɛkɛtsu nii?

Yinɔsane tsɔɔ akɛ béi kɛ hetsɛ̃ ji nibii ni haaa ekomefeemɔ ahi shi kɛjɛ blema beebe, ni bei pii lɛ jamɔ haa hetsɛ̃ kɛ béi nɛɛ amli woɔ wu moŋ fe nɔ ni eeeha amɛsɛɛ afo. Adafitswaa woloŋmalɔ James A. Haught ŋma akɛ: “Nɔ fɛɛ nɔ ni gbalaa gbɔmɛi amli lɛ baanyɛ ekɛ hetsɛ̃ aba, ni jamɔ ji nibii ni gbalaa gbɔmɛi amli fe fɛɛ lɛ ateŋ ekome.” Ekɛfata he akɛ: “Yɛ susumɔ ni mɛi babaoo hiɛ akɛ jamɔ haa mɛi feɔ ‘ekpakpa’ lɛ fɛɛ sɛɛ lɛ, eyɛ faŋŋ akɛ ehaa mɛi komɛi hu feɔ nibii fɔji diɛŋtsɛ.” Woloŋmalɔ Steven Weinberg hu hiɛ susumɔ ni tamɔ nakai nɔŋŋ. Eŋma akɛ: “Jamɔ pɛ haa mɛi ni kulɛ amɛji gbɔmɛi kpakpai lɛ feɔ efɔŋ.”

Ani hiɛnɔkamɔ ko yɛ akɛ be ko baashɛ ni je lɛ fɛɛ baafee ekome? Hɛɛ! Shi nɔ ni baaha jeŋ ekomefeemɔ aba lɛ jɛɛɛ adesa ko loo jamɔ ko ni adesa tsé, taakɛ wɔbaana lɛ.

[Wiemɔ ni akɔ ni akɛmiitsu nii ni yɔɔ baafa 3]

Ani je lɛ tamɔ okpɛlɛmi bibioo ko ni miihe afɛ?