Yoofɔyoo ko Hemɔkɛyeli Ha Edamɔ Awerɛho Sane Naa

“Kɛ́ nyɛnine eshɛ wolo nɛɛ nɔ lɛ, no tsɔɔ akɛ mihe eyabaaa nii yɛ opireshɛn ni afee mi lɛ mli ni mitsɔ misɛɛ.”

WIEMƆI nɛɛ ni ji wiemɔi ni yoofɔyoo ko ni ji Kristofonyo ni atsɛɔ lɛ Carmen lɛ kɛkpa wolo ko ni eŋma ebiyei etɛ ni eye afii 25, 19, kɛ 16 lɛ hiɛ. Nɔ ni ba ji akɛ opireshɛn lɛ eyayeee omanye, ni awerɛho sane ji akɛ Carmen gbo.

Kɛ mɔ ko kpá shi ena akɛ ebaagbo eshi ebiyei etɛ yɛ shihilɛ ni tamɔ nɛkɛ mli lɛ etsui baakumɔ waa. Hemɔkɛyeli ni mli wa ni yoofɔyoo nɛɛ yɔɔ yɛ Yehowa kɛ eshiwoi lɛ amli lɛ ha edamɔ awerɛho nɛɛ naa, ni enɛ haaa eyoyoro, taakɛ anaa faŋŋ yɛ ewolo ni taa mɔ tsuiŋ ni eŋma lɛ mli lɛ. Kadimɔ nɔ ni ekɛɛ ebiyei lɛ.

“Klɛŋklɛŋ kwraa lɛ, miikɛɛ nyɛ akɛ miisumɔ nyɛ kɛ mitsui fɛɛ. . . . Nyɛji biyei ni nyɛmɛi fɛɛ baasumɔ ni amɛná, ni mikɛ nyɛ shiɔ mitsitsi.

“Mina ni kulɛ mikɛ nyɛ aaahi shi kɛyashi Nyɔŋmɔ jeŋ hee ni ewo he shi lɛ aaaba . . . , shi akɛni enyɛŋ eba lɛ nakai hewɔ lɛ, mibi Nyɔŋmɔ koni eye ebua nyɛ ni nyɛya nɔ nyɛye anɔkwa taakɛ nyɛfeɔ lɛ. Wɔŋmɛ wɔtsui shi yɛ kaai babaoo mli, ni Yehowa kwako wɔ pɛŋ. . . . No hewɔ lɛ nyɛyaa nɔ nyɛkɛ nyɛhe afɔa gbɛtsɔɔmɔ ni etsɔɔ esafo lɛ nɔ ekɛhaa lɛ nɔ, ni nyɛyaa nɔ nyɛfia asafo lɛ kɛ onukpai lɛ asɛɛ. Nyɛshiɛa daa ni nyɛsumɔa nyɛmimɛi fɛɛ.

“Wɔmli ni egbala nɛɛ sɛɛ etsɛŋ. . . . Miikpa nyɛ fai ni nyɛkɛ nyɛnɔ ni mitɔ̃ lɛ kɛ nyɛ shishi ni miyanuuu lɛ loo bɔ ni misumɔɔ nyɛ mihaa lɛ ni mihaaa nyɛle lɛ afa mi. . . . Mile akɛ nyɛteŋ mɔ fɛɛ mɔ yɛ ehiamɔ nii. Yehowa le nyɛteŋ mɔ fɛɛ mɔ hiamɔ nii fe bɔ ni nyɛle, ni ebaatsu nɔ fɛɛ nɔ ni he hiaa nyɛ lɛ he nii eha nyɛ, ni ebaawo nyɛtsuishiŋmɛɛ lɛ he nyɔmɔ.

“Nyɛhaa nyɛhiɛ ahia oti ni ma nyɛhiɛ ni ji shihilɛ yɛ jeŋ hee lɛ mli lɛ nɔ daa—ni nyɛtiua sɛɛ daa koni nyɛnine ashɛ nɔ. Yehowa ajɔɔ nyɛ ni ewaje nyɛ koni nyɛye anɔkwa kɛyawula shi. . . . Mibiyei ni misumɔɔ, nyɛkayea awerɛho. Misumɔɔ nyɛ naakpa!”

Sane ni yɔɔ awerɛho baanyɛ ebanina mɔ fɛɛ mɔ trukaa. Maŋtsɛ Salomo ní hi shi yɛ blema lɛ ŋma akɛ: “Ejaakɛ be kɛ nibii ni aleee ni baa trukaa ninaa amɛ fɛɛ.” (Jajelɔ 9:11, NW) Shi mɛi ni yɔɔ Nyɔŋmɔ mli hemɔkɛyeli ni mli wa lɛ baanyɛ aná hekɛnɔfɔɔ tamɔ bɔfo Paulo, ekɛɛ akɛ: “Miyɛ hewalɛ yɛ nɔ, ákɛ gbele jio wala jio . . . aloo nii ní abɔ lɛ amli nɔ kroko jio, amɛnyɛŋ amɛgbala wɔkɛ Nyɔŋmɔ suɔmɔ ní yɔɔ Kristo Yesu, wɔ-Nuŋtsɔ lɛ, mli lɛ mli.”—Romabii 8:38, 39; Hebribii 6:10.