Ani Abaanyɛ Awo Kojolɔ Ŋaa?

BE NÍ ato kɛha Sladjana ni ji Yehowa Odasefonyo ko ni yɔɔ Croatia lɛ koni eya saneyelihe ko yɛ shika he saji ahewɔ lɛ shɛ. Yoo nɛɛ yashɛ jɛmɛ yɛ be ni ato lɛ naa pɛpɛɛpɛ, ni ekɛ ehe yatsɔɔ kojolɔ lɛ. Shi mɔ ni ekɛná sane lɛ kpe sɛɛ. Akɛni Sladjana miisumɔ akɛ eye odase hewɔ lɛ, beni mɔ fɛɛ mɔ mɛɔ lɛ, efee ekãa ni ekɛ kojolɔ lɛ yagba sane.

Ebi kojolɔ lɛ akɛ: “Ofainɛ, ani ole akɛ eshwɛ fioo ní akɛ kojolɔi kɛ saneyelihei tsuŋ nii dɔŋŋ yɛ shikpɔŋ lɛ nɔ?” Ŋmɛnɛŋmɛnɛ beaŋ kojolɔi ahe ewieɔ lɛ.

Kojolɔ lɛ naa kpɛ ehe, kɛkɛ ni ekwɛ yoo lɛ gãa, ni etswaaa esɛŋ po. Jɛmɛ nɔŋŋ kɛkɛ ni aje sane lɛ yeli shishi. Beni amɛgbe naa ni Sladjana te shi koni ekɛ ewaonaa gbɛi awo wolo ko shishi lɛ, kojolɔ lɛ ma eyi shi ni ewie ablɛbi kɛbi lɛ akɛ: “Ani oyɛ nɔmimaa yɛ nɔ ni okɛɛ mi bianɛ nɔŋŋ akɛ, eshwɛ fioo ní akɛ kojolɔi kɛ saneyelihei tsuŋ nii dɔŋŋ yɛ shikpɔŋ lɛ nɔ lɛ he?”

Sladjana ha lɛ hetoo akɛ: “Ofainɛ hɛɛ, miyɛ nɔmimaa diɛŋtsɛ yɛ nɔ ni mikɛɛ lɛ he!”

Kojolɔ lɛ bi lɛ akɛ: “Mɛɛ odaseyeli oyɔɔ ni tsɔɔ akɛ nɔ ni owieɔ lɛ ji anɔkwale?”

Sladjana ha hetoo akɛ: “Eyɛ Biblia lɛ mli.”

Kojolɔ lɛ kɛɛ ebaasumɔ ni ena nɛkɛ odaseyeli nɛɛ, shi ebɛ Biblia. No hewɔ lɛ Sladjana kɛɛ ebaatao eko eha lɛ. Odasefoi tee kojolɔ lɛ ŋɔɔ, ni amɛyaha lɛ Biblia, ni amɛwo lɛ hewalɛ koni eha akɛ lɛ akase Biblia lɛ daa otsi. Kojolɔ lɛ kpɛlɛ nɔ, ni etsɛɛɛ ni ebatsɔ̃ Yehowa Odasefonyo.

Wiemɔi ni yɔɔ Lala 2:10 lɛ ba mli yɛ enɔ akɛ: “No hewɔ lɛ, nyɛ maŋtsɛmɛi, nyɛlea nii! Nyɛ shikpɔŋ nɔ kojolɔi, nyɛboa ŋaawoo toi!” Kwɛ bɔ ni wɔmli filiɔ wɔ kɛ́ mɛi nɛɛ jɛ heshibaa mli amɛkpɛlɛ Yehowa gbɛtsɔɔmɔ ni suɔmɔ yɔɔ mli lɛ nɔ!

[Mfoniri ni yɔɔ baafa 32]

Sladjana kɛ kojolɔ lɛ