Mɛni Hewɔ Esa akɛ Ofee Nɔ ni Ja?

BE KO lɛ nilelɔ ko wie akɛ: “Suɔmɔ lɛ miyɛ eko moŋ, shi ekpakpafeemɔ ni ebɔ mi. Ejaakɛ ekpakpa ni misumɔɔ lɛ mifeee; shi efɔŋ ni misumɔɔɔ lɛ, no moŋ mifeɔ.” Mɛni hewɔ nuu nɛɛ naaa lɛ mlɛo akɛ eeefee ekpakpa ni eshweɔ akɛ efee lɛ? Etsɔɔ mli akɛ: “Belɛ minaa mla nɛɛ akɛ mi ni misumɔɔ akɛ mafee nɔ ni hĩ lɛ, efɔŋ moŋ kpɛtɛ mihe. Ejaakɛ mimligbɛ gbɔmɔ lɛ mii shɛɔ yɛ Nyɔŋmɔ mla lɛ he; shi minaa mla kroko yɛ mihenii lɛ amli ni kɛ mijwɛŋmɔ mla lɛ wuɔ ta ni eŋɔɔ mi nom ehaa esha mla lɛ ni yɔɔ mihenii lɛ amli lɛ.”—Romabii 7:18, 19, 21-23.

Sane nɛɛ ní bɔfo Paulo ŋma aaafee afii 2,000 ni eho nɛ lɛ haa wɔnaa nɔ̃ hewɔ ni ewaa kɛhaa adesai ni yeee emuu lɛ akɛ amɛaafee nɔ ni ja. Ebiɔ ni mɔ aná nibii ni ja afeemɔ he miishɛɛ dani ebaanyɛ efee nii ni ja, titri lɛ kɛ́ eyaje shihilɛi ni mli wawai amli. No hewɔ lɛ, esa akɛ wɔbi wɔhe akɛ, Mɛni ji nɔ̃ titri hewɔ ni esa akɛ wɔfee nɔ ni ja?

Susumɔ nɔ ni Ŋmalɛi lɛ kɛɔ yɛ mɛi ni baa amɛjeŋ jogbaŋŋ lɛ awɔsɛɛ shihilɛ he lɛ he okwɛ. Lala 37:37, 38 lɛ kɛɔ wɔ akɛ: “Saramɔ mɔ ni hi kɛwula shi, ní okwɛ mɔ ni ja lɛ; ejaakɛ nakai gbɔmɔ lɛ, aaahi aha lɛ wɔsɛɛ. Shi nɔtɔ̃lɔi lɛ, aaakpata amɛhiɛ shikome; mɛi fɔji awɔsɛɛ be lɛ sɛɛ aaafo.” Abɛi 2:21, 22 lɛ kɛɔ wɔ akɛ: “Mɛi ni ja lɛ aaahi shikpɔŋ lɛ nɔ, ni mɛi ni eye emuu lɛ aaashwɛ yɛ nɔ; shi aaafolɔ mɛi fɔji lɛ kɛaajɛ shikpɔŋ lɛ nɔ, ni aaafamɔ kutumpɔfoi lɛ kɛaajɛ nɔ.”

Eyɛ mli akɛ shiwoi nɛɛ kɛ ekrokomɛi ni yɔɔ Biblia lɛ mli lɛ kanyaa wɔ ni wɔkɔɔ gbɛ ni sa Nyɔŋmɔ hiɛ moŋ, shi jeee nomɛi ji nɔ̃ titri hewɔ ni wɔfeɔ nakai. Nɔ̃ titri hewɔ ni wɔfeɔ nakai lɛ kɔɔ sane ko ni kɔɔ bɔɔ nii fɛɛ ni ji adesai kɛ ŋwɛibɔfoi ahe lɛ he. Saneyitso ni nyiɛ sɛɛ lɛ wieɔ nakai sane lɛ he, ni etsɔɔ bɔ ni ekɔɔ wɔhe ehaa lɛ hu mli.