“Nɔ ko ni Fe Fɛɛ ni Mikpaaa Gbɛ ni Ba”

NƆTSAMƆ SKUL tsɔɔlɔ ko ni yɔɔ Spain lɛ ŋma akɛ: “Yehowa Odasefoi ejie ekomefeemɔ diɛŋtsɛ, anɔkwayeli ni osato bɛ mli, kɛ nɔ ni fe fɛɛ lɛ hemɔkɛyeli ni mli wa waa kpo nɔ ni fa fe afii 100 sɔŋŋ nɛ.” Mɛni tsirɛ tsɔɔlɔ nɛɛ—ni heee eyeee akɛ Nyɔŋmɔ yɛ lɛ—ni ewie nɛkɛ sane nɛɛ?

Nɔ ni kɛ enɛ ba ji akɛ, abi Noemí ni eji Yehowa Odasefonyo ni yaa nɔtsamɔ skul lɛ ni eŋma niŋmaa kaa ko, ni niŋmaa kaa nɛɛ fata eskul nikasemɔ naagbee kaa lɛ he. Ekpɛ eyiŋ akɛ ebaaŋma ekaa lɛ kɛkɔ saneyitso ni ji “Afaseo Okadi yɛ Nazi Nɔyeli Shishi” lɛ he.

Mɛni hewɔ ehala nakai saneyitso lɛ? Noemí tsɔɔ mli akɛ: “Akɛni tsɔɔlɔ ko ji mɔ ni baakwɛ miniŋmaa kaa lɛ mli hewɔ lɛ, misusu akɛ manyɛ maŋɔ nɛkɛ hegbɛ nɛɛ ni mikɛye lɛ odase. Sane ni kɔɔ bɔ ni Yehowa Odasefoi ni hi shi yɛ Nazi Germany lɛ tee nɔ amɛhiɛ emuuyeli mli kpɛŋŋ lɛ he lɛ ta mitsuiŋ waa. Miheɔ miyeɔ akɛ ebaata mɛi krokomɛi hu atsuiiaŋ nakai nɔŋŋ.”

Noemí niŋmaa kaa lɛ ná mɛi krokomɛi babaoo anɔ hewalɛ kwraa fe bɔ ni ekolɛ ekpa gbɛ. Yɛ October 5, 2002 lɛ, afee niiamlipɛimɔ he akaŋshii ko yɛ maŋ lɛ mli ni kɔɔ adebɔɔ he nilee kɛ adesai ashihilɛ mli saji ahe nilee he, ni eniŋmaa kaa lɛ ha ená jweremɔ nɔ̃ yɛ enɛ mli. Nilelɔi kpanakpanaai akuu ko ni emli bii ji mɛi 20, ní ahala amɛ kɛjɛ Spain univɛsitii srɔtoi ni amɛhe gbɛi waa lɛ amli lɛ ji mɛi ni hala mɛi ni esa ákɛ akɛ akaŋshii lɛ he jweremɔ nii lɛ aha amɛ lɛ.

Mɔ ni kɛ Noemí jweremɔ nɔ̃ lɛ ha lɛ ji Pilar del Castillo ní eji maŋsɔɔlɔ ni kwɛɔ wolokasemɔ nɔ yɛ Spain lɛ. Noemí ŋɔ hegbɛ lɛ ni eha maŋsɔɔlɔ lɛ vidio kasɛt ni ji Jehovah’s Witnesses Stand Firm Against Nazi Assault lɛ eko. Maŋsɔɔlɔ lɛ kɛ miishɛɛ hé nikeenii lɛ.

Adafitswaa wolo ni yɔɔ Noemí maŋ ni ji Manresa lɛ mli lɛ wie Noemí mɔdɛŋbɔɔ yɛ eskul nikasemɔ mli lɛ he, ni ewie saji ni yɔɔ eniŋmaa kaa lɛ mli lɛ hu ahe. Yɛ nakai beaŋ nɔŋŋ lɛ, eskul tsɔɔlɔ nukpa lɛ bi koni ekɛ eniŋmaa kaa lɛ eko aha ni akɛfata afii 75 ni skul lɛ eye lɛ he gbi jurɔ ni abaaye lɛ he gbɛjianɔtoo lɛ he.

Noemí kɛɛ akɛ: “Enɛ ji nɔ ko ni fe fɛɛ ni mikpaaa gbɛ ni ba yɛ minɔtsamɔ skul nikasemɔi lɛ amli. Mimli fili mi waa diɛŋtsɛ beni mikane hiɛkpamɔ wiemɔi ni Owula Jorge Tomás Calot, ni ji mitsɔɔlɔ lɛ, ŋma kɛha miniŋmaa kaa lɛ, eŋma akɛ:

“‘Miheee miyeee akɛ Nyɔŋmɔ yɛ, shi miisumɔ ni makpɛlɛ nɔ kwraa akɛ Mɔ ni Nɔ Kwɔ Fe Fɛɛ nɛɛ ni kanyaa ejálɔi koni amɛná “suɔmɔ” ni mli wa ni osato bɛ mli “amɛha amɛnanemɛi” lɛ yɛ shihilɛ mli diɛŋtsɛ.’”