Mra Be Mli Germany Biblia Kɛ Nyɔŋmɔ Gbɛi Lɛ Tsu Nii
NYƆŊMƆ gbɛi diɛŋtsɛ ni ji Yehowa lɛ jeɔ kpo shii akpei abɔ yɛ New World Translation of the Holy Scriptures, ni afee yɛ Germany wiemɔ mli yɛ afi 1971 lɛ mli.a Shi kɛlɛ, enɛ jeee Biblia ni yɔɔ Germany wiemɔ mli ni kɛ Nyɔŋmɔ gbɛi lɛ tsu nii klɛŋklɛŋ kwraa. Eeenyɛ efee akɛ, Biblia ni yɔɔ Germany wiemɔ mli ni kɛ Nyɔŋmɔ gbɛi lɛ tsu nii klɛŋklɛŋ kwraa lɛ ji nɔ ni Johann Eck ni ji Roma Katolik jamɔ lɛ he nilelɔ ko ni ale lɛ waa lɛ fee yɛ aaafee afii 500 sɔŋŋ ni eho nɛ lɛ.
Afɔ́ Johann Eck yɛ Germany wuoyigbɛ yɛ afi 1486. Beni eye afii 24 lɛ, ebatsɔ Nyɔŋmɔjamɔ he nilelɔ tsɔɔlɔ nukpa yɛ Ingolstadt univɛsiti, ni ehiɛ nɛkɛ gbɛnaa nɛɛ mli kɛyashi be ni egbo yɛ afi 1543 lɛ mli. Eck hi shi yɛ Martin Luther beaŋ, ni mɛi enyɔ nɛɛ bɔ naanyo yɛ be fioo ko mli. Shi sɛɛ mli lɛ, Luther batsɔ Jamɔ Hiɛtsakelɔi lɛ ahiɛnyiɛlɔ, shi Eck tee nɔ efã Katolik Jamɔ lɛ he.
Bavaria odehe lɛ fã Eck koni etsɔɔ Biblia lɛ shishi kɛya Germany wiemɔ mli, ni akala eshishitsɔɔmɔ lɛ yɛ afi 1537. Taakɛ wolo ni ji Kirchliches Handlexikon lɛ tsɔɔ mli lɛ, Eck shishitsɔɔmɔ lɛ kɛ shishijee niŋmaa lɛ nyiɛ kpaakpa, ni no hewɔ lɛ, “esa akɛ akpɛlɛ nɔ akɛ eja jogbaŋŋ fe bɔ ni mɛi ekpɛlɛ nɔ kɛbashi amrɔ nɛɛ akɛ eja lɛ.” Eck tsɔɔ 2 Mose 6: 3 lɛ shishi akɛ: “Miji Nuŋtsɔ lɛ, ni jie ehe kpo etsɔɔ Abraam, Isak, kɛ Yakob akɛ Nyɔŋmɔ Ofe lɛ: ni migbɛi Adonai lɛ, mihako amɛle no.” Eck kɛ niiamlitsɔɔmɔ wiemɔ ni ji: “Gbɛi Yehoua Adonai Lɛ” fata kuku nɛɛ he yɛ afãgbɛ. Biblia he nilelɔi babaoo heɔ amɛyeɔ akɛ enɛ ji klɛŋklɛŋ kwraa ni akɛ Nyɔŋmɔ gbɛi diɛŋtsɛ lɛ tsu nii yɛ Biblia ni yɔɔ Germany wiemɔ mli lɛ mli.
Shi kɛlɛ, ale Nyɔŋmɔ diɛŋtsɛ gbɛi lɛ ni atee nɔ akɛtsu nii afii akpei abɔ. Akɛ gbɛi lɛ tsu nii klɛŋklɛŋ kwraa yɛ Hebri wiemɔ mli, ni akɛtsu nii koni akɛtsɔɔ akɛ “Yehowa” ji anɔkwa Nyɔŋmɔ koome lɛ. (5 Mose 6:4) Aaafee afii 2,000 ni eho nɛ lɛ, aŋma Yesu wiemɔ ni ewie akɛ eha mɛi ele Nyɔŋmɔ gbɛi lɛ, yɛ Hela wiemɔ lɛ mli. (Yohane 17:6) Kɛjɛ nakai beaŋ kɛbaa nɛɛ, akala gbɛi lɛ yɛ wiemɔi srɔtoi pii amli, ni yɛ Lala 83:19 lɛ mlibaa naa lɛ, etsɛŋ ni mɛi fɛɛ baaná ale akɛ mɔ ni ekome too egbɛi ji Yehowa lɛ, lɛ ji Mɔ ni Kwɔ Fe Fɛɛ yɛ shikpɔŋ lɛ nɔ fɛɛ.
[Shishigbɛ niŋmaa]
a Yehowa Odasefoi ji mɛi ni fee, ni afee klɛŋklɛŋ nɔ̃ lɛ yɛ afi 1961. Amrɔ nɛɛ atsɔɔ fɛɛ loo efã ko shishi kɛtee wiemɔi ni fa fe 50 mli.
[Mfoniri ni yɔɔ baafa 32]
Eck Biblia ni ji Afi 1558 nɔ̃ lɛ, ni kɛ Yehowa gbɛi lɛ he niiamlitsɔɔmɔ wiemɔ fata 2 Mose 6:3 lɛ he yɛ afãgbɛ lɛ