Sanebimɔi ni Jɛ Kanelɔi Adɛŋ

Beni kaselɔi lɛ nu akɛ Petro ni awo lɛ tsuŋ lɛ damɔ shinaa lɛ shi lɛ, mɛni hewɔ ni amɛkɛɛ akɛ: “Ebɔfo ni” lɛ?—Bɔfoi lɛ Asaji 12:15.

Ekolɛ kaselɔi lɛ susu yɛ gbɛ ni ejaaa nɔ akɛ bɔfo ko ni ji tsulɔ ni damɔ shi kɛha Petro lɛ ji mɔ ni damɔ agbó lɛ naa lɛ. Susumɔ wiemɔi ni fata sane nɛɛ he lɛ he okwɛ.

No mli lɛ Herode emɔ Petro, ni égbe Yakobo. No hewɔ lɛ kaselɔi lɛ heɔ yeɔ jogbaŋŋ akɛ nakai nɔŋŋ abaagbe Petro. Akɛ kɔsɔŋkɔsɔ fimɔ Petro ni awo lɛ tsuŋ, ni asraafoi akui srɔtoi ejwɛ to naa koni amɛbu ehe ni ekajo foi, ni asraafoi ejwɛ yɔɔ kuu fɛɛ kuu mli. Kɛkɛ ni yɛ gbɛkɛ ko mli lɛ, bɔfo ko tsɔ naakpɛɛ gbɛ nɔ ejie lɛ ni enyiɛ ehiɛ kɛshi gboklɛfoi atsu lɛ mli. Beni naagbee lɛ Petro yɔse nɔ ni yaa nɔ lɛ, ekɛɛ akɛ: “Kpaako miná mile krɛdɛɛ akɛ Nuŋtsɔ lɛ etsu ebɔfo lɛ kɛba, ni ebajie mi yɛ Herode dɛŋ.”—Bɔfoi lɛ Asaji 12:1-11.

Amrɔ nɔŋŋ kɛkɛ ni Petro tee Maria ni ji Yohane Marko nyɛ lɛ shia, ni kaselɔi babaoo ebua amɛhe naa yɛ jɛmɛ. Beni eshi agbó lɛ, tsulɔyoo ko ni gbɛi ji Rode lɛ tee koni eyakwɛ mɔ ni ji. Beni tsulɔyoo lɛ yɔse Petro gbee lɛ, eshi lɛ edamɔ agbó lɛ naa, ni ejo foi koni eyabɔ mɛi krokomɛi lɛ amaniɛ! Klɛŋklɛŋ lɛ, kaselɔi lɛ heee amɛyeee akɛ Petro damɔ agbo lɛ naa. Yɛ no najiaŋ lɛ, amɛsusu yɛ gbɛ ni ejaaa nɔ akɛ: “Ebɔfo ni.”—Bɔfoi lɛ Asaji 12:12-15.

Ani kaselɔi lɛ hé amɛye akɛ agbe Petro momo, ni ákɛ emumɔ lɛ pɛ yɔɔ agbó lɛ naa lɛ? Ebaawa akɛ eeeba lɛ nakai, ejaakɛ Yesu sɛɛnyiɛlɔi lɛ le Ŋmalɛ naa anɔkwale ni kɔɔ gbohii lɛ ahe lɛ—ákɛ “amɛleee nɔ ko nɔ ko.” (Jajelɔ 9:5, 10) Belɛ, te kaselɔi lɛ tsɔɔ tɛŋŋ beni amɛkɛɛ akɛ: “Ebɔfo ni” lɛ?

Yesu kaselɔi lɛ le akɛ yɛ yinɔsane bei fɛɛ mli lɛ, bɔfoi yeɔ amɛbuaa Nyɔŋmɔ webii. Ákɛ nɔkwɛmɔnɔ lɛ, Yakob wie “bɔfo lɛ ni kpɔ̃ mi kɛje efɔŋ fɛɛ mli lɛ” he. (1 Mose 48:16) Ni Yesu gba esɛɛnyiɛlɔi lɛ sane ko ni kɔɔ gbekɛ fioo ko ni yɔɔ amɛteŋ lɛ he akɛ: “Nyɛkwɛa jogbaŋŋ koni nyɛkagbe mɛi bibii nɛɛ ateŋ mɔ kome he guɔ; ejaakɛ miikɛɛ nyɛ akɛ, amɛbɔfoi ni yɔɔ ŋwɛi lɛ kwɛɔ mitsɛ ni yɔɔ ŋwɛi lɛ hiɛ daa.”—Mateo 18:10.

Miishɛɛ sane ji akɛ, Young’s Literal Translation of the Holy Bible lɛ tsɔɔ wiemɔ agʹge·los (“bɔfo”) lɛ shishi akɛ “tsulɔ.” Etamɔ nɔ ni Yudafoi komɛi heɔ yeɔ akɛ Nyɔŋmɔ tsulɔ fɛɛ tsulɔ yɛ lɛ diɛŋtsɛ ebɔfo—yɛ gbɛ ko nɔ lɛ, “bɔfo ni buɔ mɔ he.” Yɛ anɔkwale mli lɛ, susumɔ ni tamɔ nɛkɛ bɛ Nyɔŋmɔ Wiemɔ lɛ mli. Ni kɛlɛ, eeenyɛ efee akɛ beni kaselɔi lɛ kɛɛ akɛ, “ebɔfo ni” lɛ, no mli lɛ amɛmiisusu akɛ bɔfo ni ji tsulɔ ko ni damɔ shi kɛha Petro lɛ ji mɔ ni damɔ agbó lɛ naa lɛ.