Niyeli Be Jeee Be Kɛha Niyeli Kɛkɛ!

MƆ FƐƐ MƆ mii shɛɔ ehe kɛ́ eye niyenii ko ni ŋɔɔ. Kɛ́ wɔgba saji kpakpai ni wɔkɛ wɔsuɔlɔi ná naanyobɔɔ ni yɔɔ miishɛɛ be ni wɔyeɔ nii lɛ, ehaa niyeli bafeɔ nifeemɔ ko ni yɔɔ miishɛɛ ni haa wɔ mli filiɔ wɔ, shi jeee nɔ ni haa wɔ tɔɔ kɛkɛ. Wekui babaoo kɛfee amɛsu akɛ kɛ hooo kwraa lɛ amɛaabua amɛhe naa kutuu kɛye nii shikome yɛ gbi lɛ mli. Niyeli be haa wekui náa hegbɛ kɛgbaa nibii ni tee nɔ yɛ gbi lɛ mli loo amɛ gbɛjianɔtoi ahe sane. Fɔlɔi ni boɔ amɛbii lɛ awiemɔi kɛ susumɔi atoi lɛ yɔseɔ amɛbii bibii lɛ asusumɔi kɛ henumɔi. Be ni be shwieɔ mli lɛ, naanyobɔɔ ni yɔɔ miishɛɛ ni haa mɔ tsui nyɔɔ emli ni yaa nɔ yɛ niyeli be mli lɛ haa anuɔ he akɛ shweshweeshwefeemɔ, hekɛnɔfɔɔ, kɛ suɔmɔ yɛ weku lɛ mli, ni no woɔ weku ekomefeemɔ lɛ mli hewalɛ.

Ŋmɛnɛ, akɛni weku mli bii babaoo bɛ dekã ni amɛyɛ nɔ ko feemɔ be fɛɛ be hewɔ lɛ, ewa kɛha amɛ akɛ amɛaaná be kɛkpe kutuu kɛye nii. Yɛ je lɛŋ hei komɛi lɛ, maŋ kusumii eŋmɛɛɛ wekui agbɛ ni amɛye nii kutuu loo ni amɛwie kɛ́ amɛmiiye nii. Wekui krokomɛi hu asu ji ní amɛkwɛ TV kɛ́ amɛmiiye nii, ni enɛ haaa amɛná hegbɛ kwraa kɛgba sane ko ni he yɔɔ sɛɛnamɔ.

Shi kɛlɛ, fɔlɔi ni ji Kristofoi lɛ ahiɛ hiɔ amɛhe nɔ yɛ hegbɛi ni amɛkɛaatswa amɛshiabii amɛma shi lɛ ahe be fɛɛ be. (Abɛi 24:27) Ajɛ jeeŋmɔ akɛɛ fɔlɔi akɛ ‘be ni amɛta shi yɛ amɛshia’ lɛ ji hegbɛi ni fe fɛɛ ni amɛaatsɔ nɔ amɛkɛ amɛbii agba Nyɔŋmɔ wiemɔ lɛ he sane lɛ ateŋ ekome. (5 Mose 6:7) Ekome ni afeɔ kɛyeɔ nii kutuu yɛ be kɛ beaŋ lɛ haa fɔlɔi náa hegbɛ ni nɔ bɛ, ni amɛkɛdũɔ suɔmɔ ni mli kwɔ kɛha Yehowa kɛ ejalɛ shishitoo mlai lɛ amɛwoɔ amɛbii lɛ amli. Kɛ́ oha shihilɛ ni yɔɔ shĩa lɛ fee nɔ ni yɔɔ miishɛɛ ni haa mɔ tsui nyɔɔ emli lɛ, ebaaha niyeli be afee nɔ ni yɔɔ miishɛɛ kɛ nifeemɔ ni woɔ mɔ hewalɛ hu kɛha oweku lɛ. Hɛɛ, kaaha niyeli be fee be ni akɛyeɔ nii kɛkɛ!